ជនសង្ស័យក្នុងភេរវកម្មបូស្តុនទាំងពីរនាក់បងប្អូនដិតជាប់នឹងដើមកំណើតTchétchenie
Tamerlan និង Djokhar Tsarnaev ដែលជាជនសង្ស័យពីររូប ក្នុងអំពើភេរវកម្មបំផ្ទុះគ្រាប់បែកនៅបូស្តុនសហរដ្ឋអាមេរិកនោះ ជាបងប្អូនបង្កើននឹងគ្នា មានដើមកំណើតនៅ Tchétchenieនៃសហព័ន្ធរុស្ស៊ី។ យោងតាមសមាជិកមួយរូបនៃគ្រួសាររបស់ពួកគេ បងប្អូនទាំងពីររូបនៅតែមានអារម្មណ៍ស្រលាញ់ដិតជាប់នឹងដើមកំណើត Tchétchenie របស់ខ្លួន ហើយមិនដែលចុះសម្រុងនឹងការរស់នៅក្នុងសង្គមអាមេរិកនោះឡើយ។ Tamerlan Tsarnaev ដែលជាបងប្រុស បានស្លាប់កាលពីព្រឹកថ្ងៃសុក្រម្សិលមិញ បន្ទាប់ពីត្រូវក្រុមប៉ូលិសចាប់ខ្លួនបាន។ ហើយនៅល្ងាចថ្ងៃសុក្រក្រុមប៉ូលិសបានបញ្ចប់ប្រតិបត្តិការរបស់ខ្លួន ដោយចាប់បានខ្លួន Djokhar។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៥
Tamerlan និង Djokhar Tsarnaev ជនសង្ស័យពីររូប ក្នុងអំពើភេរវកម្មបំផ្ទុះគ្រាប់បែកនៅបូស្តុនសហរដ្ឋអាមេរិក គឺជាបងប្អូនបង្កើតនឹងគ្នារស់នៅធំដឹងក្តី និងទទួលបានការសិក្សាខ្ពង់ខ្ពស់រហូតថ្នាក់មហាវិទ្យាល័យ នៅសហរដ្ឋអាមេរិក។ ពួកគេមានដើមកំណើតនៅ Tchétchenie ក្នុងសហព័ន្ធរុស្ស៊ី។ Tamerlan មានអាយុ ២៦ ឆ្នាំ រីឯDjokhar អាយុ១៩ឆ្នាំ។
ក្រុមគ្រួសារបងប្អូនត្រកូល Tsar-naev ប្រហែលជាបានភៀសខ្លួនចេញពី Tchétchenie ដែលជាតំបន់រងខ្ទេចខ្ទាំដោយសង្គ្រាមរវាងរដ្ឋអំណាចរុស្ស៊ីនិងក្រុមឧទ្ទាម កាលពីទស្សវត្សរឆ្នាំ ១៩៩០។ ពួកគេបានមករស់នៅ សហរដ្ឋអាមេរិក នៅក្រុង Cambridge ជិតក្រុងបូស្តុន កាលពីឆ្នាំ២០០៣។ យោងតាមឳពុកមារបស់ពួកគេ ជនសង្ស័យទាំងពីរនាក់បងប្អូន ពុំដែលរស់នៅចុះសម្រុងក្នុងសង្គមអាមេរិកនោះឡើយ។ ពួកគេនៅតែស្រលាញ់ងុបងល់នឹងដើមកំណើត Tchétchenie របស់ខ្លួន។ ផ្ទុយទៅវិញ Djokhar Tsarnaev បានទទួលសញ្ជាតិអាមេរិកាំង ក្នុងឆ្នាំ២០១២ កន្លងទៅ។
ឆ្លើយតបនឹងសំនួរដែលថា ហេតុអ្វីបានជាពួកគេបង្កនូវអំពើភេរវកម្មនៅបូស្តុន? Djokhar បានឆ្លើយថា គឺបណ្តាលមកពីពួកគេស្អប់ខ្ពើមបណ្តាជនទាំងឡាយដែលរស់នៅចុះជាមួយសង្គមអាមេរិក។ ហើយទង្វើរបស់ពួកគេគ្មានបុព្វហេតុអ្វីទាក់ទងនឹងសាសនាអ៊ីស្លាមនោះទេ។ ចំលើយរបស់ Djokhar មានលក្ខណៈផ្ទុយស្រលះពីអ្វីដែលឳពុកពួកគេធ្លាប់បានលើកឡើង។ យោងតាមឳពុករបស់ជនសង្ស័យទាំងពីរនេះ បងប្អូនពួកគេទាំងពីរគឺជាអ្នកប្រតិបត្តិតាមសាសនាអ៊ីស្លាមឥតងាករេ។
ជនសង្ស័យTamerlan Tsarnaev កាលនៅរស់ ជានិស្សិតផ្នែកវិស្វកម្មមួយរូបនៅបូស្តុន។ Tamerlan ធ្លាប់បានប្រាប់ថា ពុំដែលមានមិត្តភក្តិជាជនជាតិអាមេរិកាំងសូម្បីតែម្នាក់សោះឡើយ។ អាជ្ញាធរមិនបានផ្តល់សញ្ជាតិអាមេរិកាំងដល់Tamerlan ឡើយ ដោយសារតែកាលពីឆ្នាំ ២០០៩ Tamerlan ធ្លាប់ប្រើអំពើហិង្សាទៅលើមិត្តស្រីរបស់ខ្លួន។ នៅក្នុងគេហទំព័រ Youtube ដែលគេគិតថាជាគេហទំព័ររបស់Tamerlan គេសង្កេតឃើញមានរូបភាពវីដេអូជាច្រើនទាក់ទងនឹងអ៊ីស្លាម ត្រូវបានរក្សាទុកជាវីដេអូផ្នែកភេរវកម្ម ដែលម្ចាស់គេហទំព័រមានការពេញនិយម។
ខុសពីបងប្រុសខ្លួន Djokhar Tsarnaev ហាក់រស់នៅចុះសម្រុងក្នុងសង្គម។ ជនសង្ស័យរូបនេះ ធ្លាប់បានឈ្នះពានរង្វាន់ទីក្រុង Cambridge កាលពីឆ្នាំ២០០៥ ដោយបានទទួលប្រាក់២៥០០ដុល្លារ។ Djokhar ពុំដែលបង្កអំពើហិង្សាអ្វី រឺបង្ហាញនូវលក្ខណៈអ្វីដែលអាចអោយគេគិតថា ខ្លួននឹងបង្កអំពើភេរវកម្មនៅបូស្តុននោះទេ។
អ្នកវិភាគនានា បានប្រៀបធៀបបងប្អូនទាំងពីររូបនេះ ទៅនឹងសកម្មជនជីហាដជំនាន់ថ្មី ដែលជាសកម្មជនបង្កអំពើភេរវកម្ម នៅតំបន់ដែលខ្លួនរស់នៅ។ ជម្លោះនៅ Tchétchenie ដែលជាទឹកដីកំណើតរបស់បងប្អូនត្រកូល Tsarnaev ត្រូវបានក្រុមភេរវកម្មអាល់កៃដា ប្រើជាធ្នាក់តាមរយៈវីដេអូក្នុងគេហទំព័រអ៊ីនថឺនេត ដើម្បីទាក់ទាញសកម្មជនថ្មីៗ អោយចូលប្រលូកក្នុងការវាយប្រហារភេរវកម្ម។
វីដេអូអ៊ីស្លាមដែល Tamerlan ចាប់អារម្មណ៍នោះ បានបង្ហាញច្បាស់ថា Tamerlan បានចាប់អារម្មណ៍ងុបងល់ទៅលើចលនាអ៊ីស្លាម។ ហើយការបំផ្ទុះគ្រាប់បែកពីរគ្រាប់នៅបូស្តុន កន្លងមក អាចជាអំពើភេរវកម្មដែលកើតមានតែក្នុងប្រទេសតែប៉ុណ្ណោះ គឺពុំលក្ខណៈជាភេរវកម្មអន្តរជាតិនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ