នាសមាជនៅទីក្រុង Tampa លោកស្រី Rice បារម្ភពីតួនាទីរបស់ស.រ.អា.នៅលើពិភពលោក
អតីតរដ្ឋមន្ត្រីក្រសួងកាបរទេសអាមេរិកលោកស្រី Condoleezza Rice នាសមាជនៅយប់ថ្ងៃពុធម្សិលមិញនៅទីក្រុង Tampa ដើម្បីជ្រើសតាំងបេក្ខជនប្រធានាធិបតីតំណាងបក្សសាធារណរដ្ឋបានថ្លែងបង្ហាញឲ្យឃើញនូវក្តីបារម្ភរបស់លោកស្រីពាក់ព័ន្ធនឹងតួនាទីរបស់សហរដ្ឋអាមេរិកនៅលើពិភពលោកដែលចេះតែធ្លាក់ចុះដុនដាបទៅៗ ដែលជា “កត្តាអាចធ្វើឲ្យពិភពលោកជួបនឹងគ្រោះថ្នាក់”។
ចុះផ្សាយនៅថ្ងៃ៖
ស្តាប់ - ០២:៣៣
ប្រមុខដឹកនាំផ្តាច់ការនៅប្រទេសអ៊ីរ៉ង់ និងនៅប្រទេសស៊ីរីគំរាមដល់សន្តិសុខតំបន់។ ចំណែកឯប្រទេសរុស្ស៊ីនិងប្រទេសចិនវិញ ជាអ្នកខាឃាំងដល់ការរិះរកដំណោះស្រាយឲ្យវិបត្តិសន្តិសុខដែលពិភពលោកកំពុងពើបជួប។ នៅពេលទន្ទឹមគ្នានេះ គេនាំគ្នាចោទសួរថា “តើសហរដ្ឋអាមេរិកកំពុងធ្វើអ្វី?” នេះជាសម្រែករបស់ អតីតរដ្ឋមន្ត្រីក្រសួងកាបរទេសអាមេរិកលោកស្រី Condoleezza Rice នាឱកាសសមាជនៅទីក្រុង Tampa ដើម្បីជ្រើសតាំងបេក្ខជនប្រធានាធិបតីតំណាងបក្សសាធារណរដ្ឋ។
លោកស្រី Condoleezza Rice បានថ្លែងបញ្ជាក់ទៀតថា “អ្នកដឹងទេ?នៅពេលដែលមិត្តឬបច្ចាមិត្តរបស់អ្នកពុំអាចឆ្លើយតបនឹងសំណួរនេះបាន នោះពិភពលោកអាចក្លាយជាទីកន្លែងមួយប្រកបដោយគ្រោះថ្នាក់។ នៅសម័យសង្គ្រាមលោកលើកទីពីរ ស.រ.អា.អាចបំពេញតួនាទីរបស់ខ្លួន ស.រ.អា.បានការពារសិទ្ធិសេរីភាពរបស់ប្រជាជន ស.រ.អា.បានការពារសេដ្ឋកិច្ចទីផ្សារ”។
លោកស្រីអតីតរដ្ឋមន្ត្រីក្រសួងកាបរទេសអាមេរិកបានថ្លែងបន្ថែមទៀតថា “ស.រ.អា.គ្មានជម្រើសអ្វីឡើយ ដោយហេតុថា បើស.រ.អា.មិនក្លាយជាប្រទេសដឹកនាំគេទេ នោះពិភពលោកអាចក្លាយជាទីកន្លែងមួយប្រកបដោយគ្រោះថ្នាក់ ដោយហេតុថា ប្រទេសដទៃផ្សេងទៀតអាចក្លាយជាអ្នកដឹកនាំ ក៏ប៉ុន្តែប្រទេសនោះគ្មានឧត្តមគតិថ្លៃថ្លា ចេះការពារសិទ្ធិសេរីភាពរបស់ប្រជាជន និងការពារសេដ្ឋកិច្ចទីផ្សារឡើយ”។
លោកស្រី Condoleezza Rice បានថ្លែងបរិហារទៀតថា “ពិភពលោកទាំងមូលកំពុងងាកមកមើលសហរដ្ឋអាមេរិក តើគេឃើញអ្វី? គេឃើញស.រ.អា.កំពុងរស់សប្បាយហួសពីសមត្ថភាពរបស់ខ្លួន ស.រ.អា.កំពុងដើរខ្ចីប្រាក់គេ ស.រ.អា.កំពុងបំផ្លាញអនាគតរបស់ប្រជាពលរដ្ឋអាមេរិកាំងជំនាន់ក្រោយ”។
គួរបញ្ជាក់ថា សម្រែកបរិហាររបស់ អតីតរដ្ឋមន្ត្រីក្រសួងកាបរទេសអាមេរិកលោកស្រី Condoleezza Rice មានយ៉ាងបែបនេះ ក៏ពីព្រោះតែការបោះឆ្នោតជ្រើសតាំងប្រធានាធិបតីអាមេរិកនៅខែវិច្ឆិកាឆ្នាំ២០១២ខិតកាន់តែជិតមកដល់ ដូច្នេះហើយបានជាឆ្លៀតឱកាសសមាជនៅយប់ថ្ងៃពុធម្សិលមិញ នៅទីក្រុង Tampa ដើម្បីជ្រើសតាំងបេក្ខជនប្រធានាធិបតីតំណាងបក្សសាធារណរដ្ឋ លោកស្រី Condoleezza Rice ឆ្លៀតទម្លាក់កំហុសទៅលើលោក បារ៉ាក់អូបាម៉ា ដែលជាប្រធានាធិបតីអាមេរិកជិតផុតអាណត្តិ ហើយក៏ជាគូប្រជែងដ៏ស្វិតស្វាញរបស់បេក្ខជនប្រធានាធិបតីនៃបក្សសាធារណរដ្ឋ Mitt Romney ផងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ