គណៈប្រតិភូភូមាទៅជំរំបង់ក្លាដែស សម្រាប់គម្រោងធ្វើមាតុភូមិនិវត្តន៍ជនភៀសខ្លួនរ៉ូហ៊ីងយ៉ា
គណៈប្រតិភូរបស់រដ្ឋាភិបាលសឹកភូមា ចំនួន ១៥នាក់បានធ្វើដំណើរទៅដល់ជំរំជនភៀសខ្លួនរ៉ូហ៊ីងយ៉ា នៅក្នុងទឹកដីបង់ក្លាដែស កាលពីថ្ងៃព្រហស្បតិ៍ម្សិលមិញ នៅក្នុងក្របខណ្ឌនៃការអនុវត្តគម្រោងសាកល្បង ទាក់ទងនឹងការធ្វើមាតុភូមិនិវត្តន៍ជនភៀសខ្លួនរ៉ូហ៊ីងយ៉ា ទៅកាន់ប្រទេសដើម ភូមា។ ជនភៀសខ្លួនរ៉ូហ៊ីងយ៉ា ដែលរត់គេចពីអំពើហិង្សា នៅរដ្ឋរ៉ាឃីនភាគខាងជើងភូមា នៅតែមិនទាន់ទុកចិត្តរដ្ឋាភិបាលសឹកភូមាដែលពួកគេចោទប្រកាន់ថា ជាអ្នកទទួលខុសត្រូវលើការសម្លាប់រង្គាលជនជាតិភាគតិចរ៉ូហ៊ីងយ៉ា នៅរដ្ឋរ៉ាឃីន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
ចាប់តាំងពីរបបសឹកប្រកាសត្រៀមខ្លួនទទួលមាតុភូមិនិវត្តន៍របស់ជនភៀសខ្លួនរ៉ូហ៊ីងយ៉ា កាលពីខែមីនា មន្រ្តីភូមា ធ្វើដំណើរជាលើកទី២ ទៅជួបជនភៀសខ្លួនរ៉ូហ៊ីងយ៉ា នៅក្នុងជំរំបង់ក្លាដែស។
តាមសេចក្តីរាយការណ៍របស់ទីភ្នាក់ងារព័ត៌មានបារាំង AFP គណៈប្រតិភូភូមា១៤នាក់ ក្នុងសំលៀកបំពាក់ស៊ីវិលបានធ្វើដំណើរតាមទូកទៅជំរំក្នុងទឹកដីបង់ក្លាដែស ទៅជួបជនភៀសខ្លួនរ៉ូហ៊ីងយ៉ា ២០០នាក់ ដែលស្ថិតក្នុងចំណោមមនុស្ស១០០០នាក់ ដំបូងគេ ដែលត្រូវធ្វើមាតុភូមិនិវត្តន៍ត្រលប់ទៅភូមា។
បង់ក្លាដែសធ្លាប់បានចុះកិច្ចព្រមព្រៀងជាមួយរដ្ឋាភិបាលស៊ីវិលរបស់លោកស្រីអ៊ុងសាន ស៊ូជី កាលពីឆ្នាំ ២០១៨ ដែលនៅក្នុងនោះ ភូមាយល់ព្រមទទួលជនជាតិរ៉ូហ៊ីងយ៉ា ដែលបានរត់ភៀសខ្លួនពីរដ្ឋរ៉ាឃីន ទៅនៅកកផ្តុំក្នុងជំរំភៀសខ្លួន ក្នុងទឹកដីបង់ក្លាដែស។ អំពើហិង្សា និងការធ្វើទុកបុកម្នេញរបស់កងទ័ពភូមា នៅរដ្ឋរ៉ាឃីន កាលពីឆ្នាំ ២០១៧ បានធ្វើឲ្យប្រជាជនរ៉ូហ៊ីងយ៉ាជាង ៧សែននាក់ រត់ទៅជ្រកកោន នៅប្រទេសជិតខាងបង់ក្លាដែស។
ប៉ុន្តែ នៅ៥ឆ្នាំមកនេះ គម្រោងធ្វើមាតុភូមិនិវត្តន៍ជនភៀសខ្លួនរ៉ូហ៊ីងយ៉ាត្រូវជាប់គាំង ដោយសារវិបត្តិកូវីដ និងបញ្ហានយោបាយ នៅភូមា ជាទីដែលកងទ័ពធ្វើរដ្ឋប្រហារដណ្តើមអំណាចដឹកនាំពីរដ្ឋាភិបាលស៊ីវិលរបស់លោកស្រី អ៊ុងសាន ស៊ូជី។
នៅដើមឆ្នាំ របបសឹកភូមាប្រកាសចាប់ផ្តើមសាជាថ្មី គម្រោងសាកល្បងធ្វើមាតុភូមិនិវត្តន៍ជនភៀសខ្លួនរ៉ូហ៊ីងយ៉ា ជាង១ពាន់នាក់ ក្នុងខណៈពេលដែលជនជាតិរ៉ូហ៊ីងយ៉ា ដល់ទៅជាង១លាននាក់ កំពុងរស់នៅភៀសខ្លួន ក្នុងជំរំបង់ក្លាដែស។ វត្តមានរបស់គណៈប្រតិភូ ភូមាមានគោលដៅ បញ្ចុះបញ្ចូល ប្រជាជនភាគតិចរ៉ូហ៊ីងយ៉ា ដែលនៅតែមិនទាន់ទុកចិត្តលើអាជ្ញាធរភូមា។
ជនភៀសខ្លួនរ៉ូហ៊ីងយ៉ាម្នាក់ដែលស្ថិតក្នុងបញ្ជីឈ្មោះ អ្នកត្រូវធ្វើមាតុភូមិនិវត្តន៍និយាយប្រាប់ទីភ្នាក់ងារព័ត៌មានបារាំង AFPថា គេមិនចង់វិលត្រលប់ទៅរដ្ឋរ៉ាឃីន ក្នុងប្រទេសភូមាវិញទេ ព្រោះថា អាជ្ញាធរភូមានៅតែមិនទាន់អាចធានាសុវត្ថិភាព សន្តិសុខ នៅពេលពួកគេត្រលប់ទៅទឹកដីភូមាវិញ។ ម្យ៉ាង អាជ្ញាធរភូមា នៅតែបដិសេធមិនផ្តល់សញ្ជាតិភូមា ដែលជាហេតុធ្វើឲ្យពួកគេត្រូវរស់នៅដូចស្ថានភាពដើម នៅមុនអំពើហិង្សា ឆ្នាំ ២០១៧ ពោលគឺជនជាតិរ៉ូហ៊ីងយ៉ា ត្រូវគេចាត់ទុកជាជនអន្តោប្រវេសន៍ខុសច្បាប់ គ្មានសញ្ជាតិ និងគ្មានសិទ្ធិទទួលបានការសិក្សា ធ្វើការដូចជនជាតិភូមា។ ជនភៀសខ្លួនរ៉ូហ៊ីងយ៉ា រឹតតែមិនយល់ស្របជាមួយគម្រោងរដ្ឋាភិបាលភូមា ព្រោះ ថា កន្លែងដែលរដ្ឋាភិបាលសឹកភូមាត្រៀមទទួលដាក់ពួកគេទៀតសោត គឺជំរំដែលគេបង្កើតជាពិសេស ក្នុងរដ្ឋរ៉ាឃីន ពោល គឺមិនមែនដីភូមិដែលពួកគេធ្លាប់រស់នៅ តាំងពីដូនតា រាប់ជំនាន់នោះទេ។ ការចាកចេញពីជំរំមួយទៅ ជំរំមួយទៀត មិនមែនជាដំណោះស្រាយសម្រាប់ជនភៀសខ្លួនរ៉ូហ៊ីងយ៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ