ឧត្តមស្នងការសិទ្ធិមនុស្សទាញសញ្ញាអាសន្នការផ្សងព្រេងមរណៈរបស់ជនជាតិរ៉ូហ៊ីងយ៉ា
រត់ភៀសខ្លួនចេញពីការធ្វើទុក្ខបុកម្នេញ នៅភូមា និងជីវិតអត្តខាត់នៅក្នុងជំរំជនភៀសខ្លួននៅបង់ក្លាដែស ជនជាតិរ៉ូហ៊ីងយ៉ាត្រូវមកជួបគ្រោះថ្នាក់ស្លាប់បាត់បង់ជីវិតនៅក្នុងទឹកសមុទ្រ។ តាមការទាញសញ្ញាអាសន្នរបស់ឧត្តមស្នងការសិទ្ធិមនុស្សរបស់អង្គការសហប្រជាជាតិ ប្រជាជនភាគតិចរ៉ូហ៊ីងយ៉ា យ៉ាងតិច ៣៤៨នាក់ ស្លាប់នៅក្នុងគ្រោះថ្នាក់លិចទូកក្នុងសមុទ្រ Andaman និងនៅឈូងសមុទ្របង់ហ្កាល់ កាលពីឆ្នាំ ២០២២។
ចុះផ្សាយនៅថ្ងៃ៖
ស្តាប់ - ០២:១៦
នៅឆ្នាំ ២០២២ ប្រជាជនភាគតិចរ៉ូហ៊ីងយ៉ា ជាង ៣៥០០នាក់បានប៉ុនប៉ងធ្វើដំណើរតាមទូកឆ្លងសមុទ្រ ដើម្បីស្វែងរកទ្រនំជីវិតនៅដែនដីថ្មី ប៉ុន្តែ ជាអកុសល ៣៤៨នាក់ នៅក្នុងចំណោមពួកគេទាំងនោះ បានស្លាប់នៅក្នុងការលិចទូកក្នុងសមុទ្រ។
តាមលោកស្រីShabia Mantoo អ្នកនាំពាក្យរបស់ឧត្តមស្នងការសិទ្ធិមនុស្ស របស់អង្គការសហប្រជាជាតិ ចំនួនជនជាតិរ៉ូហ៊ីងយ៉ា ដែលផ្សងគ្រោះថ្នាក់ ជិះទូកតាមសមុទ្របានកើនឡើង បើប្រៀបធៀបនឹងឆ្នាំ ២០២១ ដែលមានមនុស្សប្រមាណ ៧០០នាក់ប៉ុណ្ណោះ។ ទូកដែលដឹកជនជាតិភាគតិចរ៉ូហ៊ីងយ៉ាភាគច្រើនមានប្រភពចេញមកពីភូមា និងបង់ក្លាដែស ជាទីដែលប្រជាជនភាគតិចរ៉ូហ៊ីងយ៉ា កាន់តែអស់សង្ឃឹមនឹងជីវិតក្រោមការធ្វើទុក្ខបុកម្នេញរបស់យោធាភូមា និងជីវិតអត្តខាត់ ក្រីក្រលំបាកវេទនា នៅក្នុងជំរំបង់ក្លាដែស បន្ទាប់ពីពួកគេបានរត់ភៀសខ្លួន គេចចេញពីការបង្រ្កាបហិង្សារបស់កងទ័ពភូមា នៅឆ្នាំ ២០១៧។
នៅក្រោយធ្វើដំណើររាប់សប្តាហ៍ទូកដឹកជនជាតិរ៉ូហ៊ីងយ៉ា មួយចំនួនបានចូលចត នៅម៉ាឡេស៊ី ឥណ្ឌូណេស៊ី ភូមា និងបង់ក្លាដែស។
៤៥%នៃអ្នកដំណើរជាមនុស្សស្រី កុមារ ដែលមួយចំនួនរងគ្រោះដោយការជួញដូរមនុស្ស ការបែកបាក់គ្រួសារ ការរំលោភផ្លូវភេទ និងអំពើហិង្សារើសអើង។ បើតាមការលើកឡើងរបស់អ្នកនាំពាក្យឧត្តមស្នងការសិទ្ធិមនុស្ស ប្រជាជនរ៉ូហ៊ីងយ៉ាទាំងនោះ បាននិយាយថា ពួកគេជិះទូក ផ្សងគ្រោះថ្នាក់ក្នុងសមុទ្រ ដើម្បីស្វែងរកការការពារ សន្តិសុខ ការជួបជុំគ្រួសារ ហើយនិងជីវភាពល្អប្រសើរនៅកន្លែងរស់នៅថ្មី។
នៅថ្ងៃអង្គារ អ្នកនាំពាក្យរបស់ឧត្តមស្នងការសិទ្ធិមនុស្សបានអំពាវនាវសុំអន្តរាគមន៍ជំនួយពីអាជ្ញាធរជើងទឹករបស់ប្រទេសនៅក្នុងតំបន់ ដើម្បីជួយសង្រ្គោះទូកដឹកប្រជាជនរ៉ូហ៊ីងយ៉ាដែលកំពុងត្រសែត អណ្តែតនៅក្នុងសមុទ្រ។ នៅពីរខែចុងឆ្នាំ ២០២២ ទូក៤ ដែលដឹកជនជាតិរ៉ូហ៊ីងយ៉ា ៤៥០នាក់ បានធ្វើដំណើរទៅដល់ខេត្តអាឆេ ប្រទេសឥណ្ឌូណេស៊ី។ ប៉ុន្តែ ទូកមួយគ្រឿងទៀតដែលដឹកមនុស្ស១៨០នាក់ បានលិចទៅក្នុងសមុទ្រ ដោយគ្មាននៅសល់អ្នករួចរស់ជីវិតម្នាក់ទេ។
តាមមន្រ្តីអង្គការសហប្រជាជាតិ ការព្រងើយកន្តើយ ខ្វះសាមគ្គីភាព និងសហប្រតិបត្តិរវាងប្រទេសពាក់ព័ន្ធនៅក្នុងតំបន់ នឹងធ្វើឲ្យសមុទ្រAndaman និងឈូងសមុទ្របង់ហ្កាល់ក្លាយជាវាលកប់ខ្មោចប្រជាជនភាគតិចរ៉ូហ៊ីងយ៉ា។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ