បង់ក្លាដែស៖ ជនភៀសខ្លួនរ៉ូហ៊ីងយ៉ា១២០០០នាក់ បាត់បង់ជម្រកបន្ទាប់ពីអគ្គីភ័យមួយទៀតបានឆាបឆេះជំរំ
ជំរំជនភៀសខ្លួនរ៉ូហ៊ីងយ៉ាមួយកន្លែង នៅភាគអាគ្នេយ៍ប្រទេសបង់ក្លាដែស ត្រូវអគ្គីភ័យឆាបឆេះ លេបត្របាក់ កាលពីថ្ងៃអាទិត្យ ទី៥មីនាម្សិលមិញ។ យ៉ាងហោចណាស់ ជនភៀសខ្លួនរ៉ូហ៊ីងយ៉ា ចំនួន១២០០០នាក់ ដែលបានបាត់បង់ជម្រក ដោយសារតែគ្រោះអកុសលនេះ។ មុនពេលមានអគ្គីភ័យ ជីវភាពរស់នៅរបស់ជនភៀសខ្លួនរ៉ូហ៊ីងយ៉ា ក្នុងជំរំនៅបង់ក្លាដែស គឺមានភាពលំបាកយ៉ាប់យ៉ឺនរួចណាស់ទៅហើយ។
ចុះផ្សាយនៅថ្ងៃ៖
ស្តាប់ - ០២:៣១
លោក Mijanur Rahman មន្ត្រីនគរបាលបង់ក្លាដែស ទទួលបន្ទុកជនភៀសខ្លួន បានប្រាប់អ្នកយកព័ត៌មានបារាំង AFP ថា អគ្គីភ័យបានចាប់ផ្តើមឆាបឆេះ នៅវេលារសៀលថ្ងៃអាទិត្យ ត្រង់តំបន់លេខ១១ នៃជំរំ Kutupalong។ ជំរំនេះ គឺជាជំរំជនភៀសខ្លួនធំជាងគេបង្អស់មួយ ក្នុងពិភពលោក។
ព្រះអគ្គីបានលេបត្របាក់ យ៉ាងលឿនរហ័សនូវផ្ទះខ្ទមសង់ពីឫស្សីជាប់ៗគ្នា ចំនួនប្រមាណ២០០០ខ្នង។ ជនរ៉ូហ៊ីងយ៉ា ដែលបានភៀសខ្លួនមកពីភូមា ចំនួនប្រមាណ១២០០០នាក់ បានបាត់បង់ទីជម្រក ដោយសារតែគ្រោះមហន្តរាយអគ្គីភ័យនេះ។
ក្នុងចំណោមសំណង់ដែលត្រូវបានភ្លើងឆាបឆេះ ក៏មានផងដែរនូវសំណង់វិហារម៉ូស្កេឥស្លាមចំនួន៣០អាគារ ព្រមទាំងសំណង់មជ្ឈមណ្ឌលបណ្តុះបណ្តាលជនភៀសខ្លួន ចំនួនជាង២០ខ្នង។ តែយ៉ាងណា អគ្គីភ័យនេះ មិនបានបង្កឲ្យមានមនុស្សស្លាប់ឬរងរបួសទេ។ ប្រជាជនព្រមទាំងក្រុមសមត្ថកិច្ច បានចំណាយពេលចំនួន៣ម៉ោង ទំរាំអាចពន្លត់ភ្លើងបាន។ ប្រភពដដែល បញ្ជាក់ឲ្យដឹងថា អាជ្ញាធរបង់ក្លាដែស កំពុងតែព្យាយាមស៊ើបអង្កេត ស្វែងរកប្រភពពិតដែលបង្កឲ្យមានអគ្គីភ័យនេះ។
គួរបញ្ជាក់ថា អគ្គីភ័យតែងតែកើតមានជាញឹកញាប់ នៅតាមជំរំជនភៀសខ្លួនរ៉ូហ៊ីងយ៉ា ដែលជាទូទៅពួកគេរស់នៅ ក្នុងស្ថានភាពជីវភាព ដ៏សែនលំបាកជាទីបំផុត។ របាយការណ៍មួយរបស់ក្រសួងការពារជាតិបង់ក្លាដែស បានបញ្ជាក់ឲ្យដឹងថាកាលពីខែកុម្ភៈកន្លងទៅថា នៅរវាងពីខែមករាឆ្នាំ២០២១ ដល់ខែធ្នូ ឆ្នាំ២០២២ គឺមានករណីអគ្គីភ័យចំនួន២២២លើក នៅតាមជំរំជនភៀសខ្លួនរ៉ូហ៊ីងយ៉ា ហើយដែលមាន៦០ករណី គឺជាករណីដុតភ្លើងដោយចេតនាឧក្រិដ្ឋ។ យ៉ាងណាមិញ កាលពីខែមីនា ឆ្នាំ២០២១ ករណីភ្លើងឆេះមួយ បានបណ្តាលឲ្យស្លាប់មនុស្ស១៥នាក់ និងបានបំផ្លាញជម្រករបស់ជនភៀសខ្លួនរ៉ូហ៊ីងយ៉ា ចំនួនប្រមាណ៥ម៉ឺននាក់។
គួររំលឹកថា ដោយរងនូវការធ្វើទុក្ខបុកម្នេញ កាប់សម្លាប់ដុតផ្ទះសម្បែង បង្កឡើងដោយកងទ័ពភូមា ជនជាតិរ៉ូហ៊ីងយ៉ា ប្រមាណ៧សែននាក់ បានរត់ភៀសខ្លួនចេញពីរដ្ឋរ៉ាឃីន ភាគខាងលិចភូមា មករកទីមានសុវត្ថិភាពនៅបង់ក្លាដែស កាលពីរវាងចុងឆ្នាំ២០១៧។ រហូតមកទល់ពេលនេះ ពួកគេនៅមិនទាន់មានពន្លឺសង្ឃឹម ថាអាចវិលត្រលប់ទៅភូមិស្រុកកំណើត នៅភូមាវិញឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ