ភូមាប្រកាសត្រៀមទទួលយកជនភៀសខ្លួនរ៉ូហ៊ីងយ៉ាឱ្យត្រលប់ទៅស្រុកកំណើតវិញ
ជាង៥ឆ្នាំក្រោយពីបានរត់គេចខ្លួនមកជ្រកក្រោនក្នុងជំរំលើទឹកដីបង់ក្លាដែស ដើម្បីគេចពីការធ្វើទុក្ខបុកម្នេញ និងបង្ក្រាបយ៉ាងហិង្សាពីសំណាក់យោធាភូមា ជនជាតិភាគតិចកាន់សាសនាអ៊ីស្លាមរ៉ូហ៊ីងយ៉ា អាចត្រលប់ទៅស្រុកកំណើតវិញ។ របបសឹកភូមាបានប្រកាសនៅថ្ងៃពុធទី ២២មីនា ត្រៀមទទួលយកជនភៀសខ្លួនរ៉ូហ៊ីងយ៉ា ចាប់ពីពាក់ខែមេសាទៅ។
ចុះផ្សាយនៅថ្ងៃ៖
ស្តាប់ - ០២:០៤
ភូមាត្រៀមជាស្រេចនឹងទទួលយកជនភៀសខ្លួនរ៉ូហ៊ីងយ៉ាឱ្យត្រលប់មកស្រុកកំណើតវិញ។ នេះបើតាមការសំដីរបស់អ្នកនាំពាក្យរដ្ឋាភិបាលសឹកភូមា ដោយបញ្ជាក់ទៀតថាជនភៀសខ្លួនធ្វើមាតុភូមិនិវត្តន៍មួយក្រុមដំបូង មានគ្នាចំនួនប្រមាណ១០០០ពាន់នាក់។
ជាមាតុភូមិនិវត្តន៍ស្របតាមកិច្ចព្រមព្រៀងរវាងប្រទេសទាំងពីរ ដែលជាប់គាំងតាំងពីយូរមកហើយ។ បង់ក្លាដែលនិងភូមាបានចុះកិច្ចព្រមព្រៀងធ្វើមាតុភូមិនិវត្តន៍ជនភៀសខ្លួនរ៉ូហ៊ីងយ៉ា តាំងពីឆ្នាំ២០១៧មក ប៉ុន្តែវិបត្តិកូវីដ១៩ និងរដ្ឋប្រហារយោធា បានមករារាំង បង្ឃាំងជនភៀសខ្លួនឱ្យបន្តរស់ដោយគ្មានសិទ្ធិធ្វើការក្នុងជំរំរខេករខាក រំពឹងតែលើជំនួយស្បៀងអាហារ។ ដំណើរការធ្វើមាតុភូមិនិវត្តន៍ ទើបត្រូវបានផ្តល់សន្ទុះឡើងវិញ ក្រោយទស្សនកិច្ចផ្លូវការរបស់គណៈប្រតិភូភូមានៅជំរំជនភៀសខ្លួនបង់ក្លាដែស កាលពីសប្តាហ៍មុន។ ដោយមានចិនជាអាជ្ញាកណ្តាល និងជួយសម្រួលមួយផ្នែកដោយអង្គការសហប្រជាជាតិ គណៈប្រតិភូជាន់ខ្ពស់ភូមាចំនួន ១៧រូបបានទៅជួបសំណេះសំណាលជាមួយជនរ៉ូហ៊ីងយ៉ា ប្រមាណ៤៨០នាក់ នៅជំរំប្រទេសបង់ក្លាដែសមានជនភៀសខ្លួនសរុបជិតមួយលាននាក់។
ប៉ុន្តែជនភៀសខ្លួនរ៉ូហ៊ីងយ៉ា ភាគច្រើន មិនទុកចិត្តលើគម្រោងមាតុភូមិនិវត្តន៍នេះទេ។ ពួកគេបានបញ្ជាក់បា្រប់ទីភ្នាក់ងារសារពត៌មានបារាំងAFP ថា ពុំមានចម្លើយតបទៅនឹងសំណើសុំការធានាសន្តិសុខ និងការទទួលស្គាល់សញ្ជាតិរ៉ូហ៊ីងយ៉ា ពីសំណាក់អាជ្ញាធរសឹកភូមាទេ។ រស់នៅក្នុងទឹកដីភូមា តាំងពីជាច្រើនជំនាន់មកហើយ ប៉ុន្តែភូមាតែងចាត់ទុកជនជាតិរ៉ូហ៊ីងយ៉ាជាអ្នកក្រៅ គ្មានប្រទេស គ្មានសញ្ជាតិ និងគ្មានសិទ្ធិដូចពលរដ្ឋភូមាទូទៅឡើយ។
កាលពីថ្ងៃអាទិត្យ ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន បានអះអាងម្តងទៀតថា ពុំទាន់មានលក្ខខណ្ឌ ប្រាកដប្រជា និងប្រកបដោយនិរន្តភាពសម្រាប់ធ្វើមាតុភូមិនិវត្តន៍ជនភៀសខ្លួនរ៉ូហ៊ីងយ៉ាពីបង់ក្លាដែសទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ