សភាម៉ាឡេស៊ី បោះឆ្នោតផ្តល់ទំនុកចិត្តដល់លោក អាន់វ៉ា អ៊ីប្រាហ៊ីម ជានាយករដ្ឋមន្ត្រី
ទីបំផុតទៅ នៅថ្ងៃច័ន្ទ ទី ១៩ធ្នូ រដ្ឋសភាម៉ាឡេស៊ី បានសម្រេចបោះឆ្នោត ដោយផ្ទាល់មាត់ ផ្តល់ទំនុកចិត្តដល់លោក អាន់វ៉ា អ៊ីប្រាហ៊ីម ធ្វើជានាយករដ្ឋមន្ត្រី។ នាយករដ្ឋមន្ត្រីម៉ាឡេស៊ីរូបនេះ គឺជាអតីតអ្នកនយោបាយបក្សប្រឆាំងដ៏លេចធ្លោ។ ការបោះឆ្នោតប្រព្រឹត្តទៅ នៅថ្ងៃទី១៩វិច្ឆិកា ទើបតែ១៩ធ្នូ ទើបរដ្ឋសភាសម្រេចផ្តល់ទំនុកចិត្ត។ នេះក៏ព្រោះតែការប្រទាញប្រទង់នយោបាយខ្លាំង។
ចុះផ្សាយនៅថ្ងៃ៖
ស្តាប់ - ០២:៣៥
លោក អាន់វ៉ា អ៊ីប្រាហ៊ីម បានថ្លែងប្រាប់បណ្តាញសារព័ត៌មានថា លោកទទួលសំឡេងគាំទ្រ ១៤៨ លើ២២២ សំឡេង នៃសមាជិករដ្ឋសភាជាតិម៉ាឡេស៊ី។ ការសម្រេចផ្តល់ទំនុកចិត្តពីសភានេះ គឺក្រោយពេលដែលពីប្រទាញប្រទង់នយោបាយ ជាងមួយខែមកហើយ។ ក្នុងការបោះឆ្នោតមួយខែមុន លោក អាន់វ៉ា អ៊ីប្រាហ៊ីម សន្យាធ្វើកំណែទម្រង់ជាច្រើនចំណុចសម្រាប់ជាតិ ហើយពេលនេះ លោកថ្លែងក្តីសង្ឃឹមថាការសម្រេចផ្តល់ទំនុកចិត្តរបស់សភា ឲ្យលោកដឹកនាំរដ្ឋាភិបាលចម្រុះ គឺអាចនឹងឲ្យរូបលោកសម្រេចកែទម្រង់ជាតិដូចសន្យា។
ម្យ៉ាងទៀត លោក អាន់វ៉ា អ៊ីប្រាហ៊ីម ជាប្រមុខបក្សប្រឆាំងដ៏លេចធ្លោ ក៏សង្ឃឹមថាវត្តមានរបស់លោកដឹកនាំរាជរដ្ឋាភិបាល គឺបញ្ចប់សម័យកាលមិនច្បាស់លាស់។ មិនច្បាស់លាស់ព្រោះថា ម៉ាឡេស៊ី ជារដ្ឋមួយនៅតំបន់អាស៊ីអាគ្នេយ៍ ដែលជួបការផ្លាស់ប្តូរថ្នាក់ដឹកនាំដល់ទៅ៤លើក ក្នុងរយៈពេល៤ឆ្នាំ។
អ្នកវិភាគស្ថានការណ៍នយោបាយនៅម៉ាឡេស៊ី គឺមើលឃើញផ្ទុយពីនេះ។ អ្នកវិភាគនយោបាយលោក Oh Ei Sun បញ្ជាក់ប្រាប់ទីភ្នាក់ងារព័ត៌មានបារាំង APF ថា រដ្ឋាភិបាលចម្រុះរបស់លោក អាន់វ៉ា អ៊ីប្រាហ៊ី គឺមិនអាចមានស្ថិរភាពបានទេ និងច្បាស់ជាជួបឧបសគ្គផ្សេងៗជាមិនខាន ក្នុងរយៈពេល ៥ ឆ្នាំទៅមុខ។
សូមជ្រាបថា លោក អាន់វ៉ា អ៊ីប្រាហ៊ីម គឺជាអតីតមេដឹកនាំក្រុមនិស្សិតម៉ាឡេស៊ីដ៏លេចធ្លោ។ នាទសវត្សរ៍១៩៩០ លោកធ្លាប់កាន់តួនាទីជារដ្ឋមន្ត្រីក្រសួងសេដ្ឋកិច្ច និងជាឧបនាយករដ្ឋមន្ត្រី ក្រោមរដ្ឋកាលរបស់ មហាធៀរ មហាម៉ាត់ ប៉ុន្តែ អ្នកនយោបាយទាំងពីរបានឈ្លោះទាស់ទែងខ្វែងគំនិតគ្នា ចំពោះចំណាត់ការដោះស្រាយវិបត្តិសេដ្ឋកិច្ចឆ្នាំ១៩៩៧-៩៨។
លោក អាន់វ៉ា អ៊ីប្រាហ៊ីម បានត្រូវបណ្តេញចេញពីតំណែង ហើយត្រូវគេចាប់ដាក់មន្ទីរឃុំឃាំង ក្រោមបទចោទប្រព្រឹត្តអំពើពុករលួយ និងរួមភេទតាមរន្ធគូទ។ បទចោទប្រកាន់ទាំងនេះ ត្រូវលោក អាន់វ៉ា អ៊ីប្រាហ៊ីម ទាត់ចោលនិងចាត់ទុកថា «មានចរិតនយោបាយ»។
នៅឆ្នាំ២០១៥ រូបលោកត្រូវជាប់ពន្ធនាគារជាថ្មី តាមរយៈបទចោទប្រកាន់ដដែល គឺ រួមភេទតាមរន្ធគូទ។ ព្រះមហាក្សត្រម៉ាឡេស៊ី បានធ្វើអន្តរាគមន៍ ចេញក្រឹត្យព្រះរាជទានលើកលែងទោស។
នៅឆ្នាំ២០១៨ លោក អាន់វ៉ា អ៊ីប្រាហ៊ីម បានផ្សះផ្សាគ្នាឡើងវិញ ជាមួយលោក មហាធៀរ មហាម៉ាត់ ដើម្បីផ្តួលគូប្រជែង។ សម្ព័ន្ធភាព នេះ បានជាង២២ខែ ក៏រលាយទៅវិញ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ