ម៉ាឡេស៊ីបោះឆ្នោតសភាមុនអាណត្តិ សង្ឃឹមបិទបញ្ចប់វិបត្តិនយោបាយ រីងរៃដោយរឿងអាស្រូវពុករលួយ
ថ្ងៃសៅរ៍ទី១៩វិច្ឆិកា ប្រជាជនម៉ាឡេស៊ីប្រមាណ២១លាននាក់ ត្រូវចូលរួមបោះឆ្នោតជ្រើសរើសសមាជិកសភាទាំង២២២អាសនៈ។ ជាការបោះឆ្នោតសភា មុនអាណត្តិដល់ទៅ១០ខែ ដែលគេរំពឹងថា នឹងអាចឈានទៅរៀបចំរដ្ឋាភិបាលថ្មី ដើម្បីបិទបញ្ចប់វិបត្តិនយោបាយ ដែលបានអង្រួនប្រទេសម៉ាឡេស៊ីប៉ុន្មានឆ្នាំមកនេះ។ រឿងអាស្រូវពុករលួយដ៏ធំមហិមា របស់លោកអតីតនាយករដ្ឋមន្ត្រី ណាជីប រ៉ាហ្សាក់ និងដែលពាក់ព័ន្ធដល់គណបក្ស អង្គការជាតិបង្រួបបង្រួមម៉ាឡេ ហៅកាត់ថា Umno គឺជាដំបៅនយោបាយ ដែលប្រជាជនម៉ាឡេស៊ីចង់ព្យាបាលឲ្យជាសះស្បើយ។
ចុះផ្សាយនៅថ្ងៃ៖
ស្តាប់ - ០២:២៩
ព្រឹកថ្ងៃសៅរ៍ទី១៩វិច្ឆិកា ការិយាល័យបោះឆ្នោតចាប់ផ្តើមបើកទ្វារភ្លាម គេសង្កេតឃើញមនុស្សម្នា មកឈរតកន្ទុយគ្នា រងចាំចូលទៅបោះឆ្នោត យ៉ាងច្រើនកុះករ។ បើទោះបីកត្តាឧតុនិយម អាចមានភ្លៀងផ្គរខ្លាំងនៅថ្ងៃនេះ តែចំនួនមនុស្សដែលស្ទុះស្ទារមកចូលរួមបោះឆ្នោតនៅព្រឹកនេះ បានបង្ហាញក្តីសង្ឃឹមថា ចំនួនអ្នកចូលរួមបោះឆ្នោតប្រាកដជាមានកម្រិតខ្ពស់។
ឆ្លើយប្រាប់អ្នកយកព័ត៌មានបារាំង AFP នៅក្រុង Bera រដ្ឋ Pahang ស្ត្រីគ្រូបង្រៀនអាយុ២០ឆ្នាំម្នាក់ បានលើកឡើងថា ខ្លួនចង់បានរដ្ឋាភិបាលថ្មីដែលខ្លាំង រឹងមាំ ធ្វើឲ្យសេដ្ឋកិច្ចមានស្ថិរភាព ដើម្បីបង្កើតការងារឲ្យយុវជន។ បុរសចំណាស់ម្នាក់ទៀត អាយុ៦០ឆ្នាំ បានប្រាប់អ្នកយកព័ត៌មានយើងថា អ្វីដែលគាត់ចង់បាន គឺសុំត្រឹមតែជារដ្ឋាភិបាលដែលស្មោះត្រង់ មិនពុករលួយលួចជាតិ។
គួររំលឹកថា អស់រយៈពេល៤ឆ្នាំមកហើយ ដែលម៉ាឡេស៊ីពើបប្រទះនឹងវិបត្តិនយោបាយ បន្ទាប់ពីផ្ទុះរឿងអាស្រូវពុករលួយដ៏ធំមហាសាល ពាក់ព័ន្ទនឹងលោកអតីតនាយករដ្ឋមន្ត្រី ណាជីប រ៉ាហ្សាក់។ លោកណាជីប រ៉ាហ្សាក់ ដែលបច្ចុប្បន្នកំពុងជាប់ពន្ធនាគាររយៈពេល១២ឆ្នាំ។ ៤ឆ្នាំមកនេះ ម៉ាឡេស៊ីបានដូរនាយករដ្ឋមន្ត្រី៣នាក់ហើយ។ លោកនាយករដ្ឋមន្ត្រី Ismail Sabri Yaakob មកពីគណបក្ស អង្គការជាតិបង្រួបបង្រួមម៉ាឡេ ហៅកាត់ថា Umno ដែលមានសំឡេងភាគច្រើនបន្តិចបន្តួចក្នុងសភា បានសម្រេចប្រកាសរំលាយសភា ដើម្បីបោះឆ្នោតមុនអាណត្តិដល់ទៅ១០ខែនាពេលនេះ ដោយសង្ឃឹមថាបក្សខ្លួននឹងមានជ័យជំនះ។
ទន្ទឹមគ្នានេះ លោក Anwar Ibrahim មេសម្ព័ន្ធបក្សប្រឆាំងដ៏ធំជាងគេ បានប្រកាសថា សម្ព័ន្ធបក្សរបស់លោកអាចនឹងបានជ័យជំនះ មានសំឡេងភាគច្រើនក្នុងសភា បើទោះជាមិនសូវសង្ឃឹមថាឈ្នះដាច់ខ្លាំងក៏ដោយ។ លោក Anwar Ibrahim បានធ្វើយុទ្ធនាការឃោសនា ដោយផ្តោតទៅលើ ការប្រយុទ្ធប្រឆាំងនឹងអំពើពុករលួយ។ អំពើពុករលួយដែលគណបក្សកាន់អំណាចរាប់សិបឆ្នាំឈ្មោះ Umno បានឃុបឃិតគ្នាបែងចែកលាភសក្ការៈ។
យ៉ាងណាក៏ដោយ យោងតាមការវិភាគ បរិយាកាសនយោបាយម៉ាឡេស៊ី អាចនឹងស្ថិតនៅក្នុងភាពបែកបាក់ដដែលទេ ក្រោយការបោះឆ្នោតសភានៅថ្ងៃនេះ។ លោក Bridget Welsh សាស្ត្រាចារ្យសកលវិទ្យាល័យ Nottingham ម៉ាឡេស៊ី បានលើកឡើងថា អ្វីដែលគេព្រួយបារម្ភគឺថា ប្រសិនបើគណបក្ស Umno ឈ្នះឆ្នោតម្តងទៀត នោះបក្សនេះ នឹងរកវិធីដើម្បីដោះលែងលោកណាជីប រ៉ាហ្ស៉ាក់ ឲ្យចេញពីគុក និងការពារមនុស្សមានអំណាចផ្សេងៗទៀតក្នុងបក្ស មិនឲ្យទទួលទោសរឿងពុករលួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ