ម៉ាឡេស៊ី៖ អស្ថិរភាពនយោបាយបន្តមាន ក្រោយលទ្ធផលបោះឆ្នោតសភា ដែលគ្មានអ្នកឈ្នះដាច់
ចុះផ្សាយនៅថ្ងៃ៖
ស្តាប់ - ០៦:៥៩
ប្រជាជនម៉ាឡេស៊ី ប្រមាណ៧០% បានចូលរួមបោះឆ្នោតយ៉ាងកុះករ កាលពីថ្ងៃសោរ៍កន្លងទៅ ដើម្បីជ្រើសរើសសមាជិកសភា។ ជាការបោះឆ្នោតសភាមុនអាណត្តិដល់ទៅ១០ខែ បន្ទាប់ពីអតីតគណបក្សកាន់អំណាច បានសម្រេចរំលាយសភា ដោយសង្ឃឹមថានឹងអាចឈានទៅបង្កើតរដ្ឋាភិបាលថ្មី តាមរយៈការបោះឆ្នោតនេះ ជាមួយនឹងចំនួនអាសនៈរឹងមាំពេញដៃ។ ប្រមាណ៤ឆ្នាំមកហើយ ដែលម៉ាឡេស៊ី ឆ្លងកាត់អស្ថិរភាពនយោបាយ ផ្លាស់ប្តូរនាយករដ្ឋមន្ត្រីដល់ទៅ៣ដងរួចមកហើយ។ តែទីបំផុត ក្រោយការបោះឆ្នោត កាលពីថ្ងៃសៅរ៍ គីអស្ថិរភាពនៅតែមានដដែល។ លទ្ធផលបោះឆ្នោតបានបង្ហាញថា គ្មានក្រុមបក្សនយោបាយណាមួយឈ្នះដាច់នោះទេ។ ការចរចា ប្រជែងគ្នា កំពុងតែត្រូវបានធ្វើយ៉ាងសស្រាក់សស្រាំ ដើម្បីបង្កើតរដ្ឋាភិបាលចម្រុះ។
គ្មានអ្នកឈ្នះដាច់
ការបោះឆ្នោតសភា កាលពីថ្ងៃសៅរ៍កន្លងទៅនេះ មានការចូលរួមច្រើនកុះករណាស់ ពីប្រជាជនម៉ាឡេស៊ី។ អត្រាអ្នកទៅចូលរួមបោះឆ្នោត មានប្រមាណ៧០% នៃប្រជាជនមានឈ្មោះបោះឆ្នោតចំនួន២១លាននាក់។ ថ្វីបើកត្តាអាកាសធាតុ មានភ្លៀងផ្គរទឹកជន់លិចដោយកន្លែងផងក៏ដោយ តែគេសង្កេតឃើញ ប្រជាជនម៉ាឡេស៊ី ទាំងចាស់ទាំងចាស់ទាំងក្មេង តស៊ូមានទឹកចិត្តចង់សំដែងមតិតាមរយៈសន្លឹកឆ្នោតរបស់ខ្លួន ដើម្បីបិទបញ្ចប់វិបត្តិនយោបាយ រ៉ាំរ៉ៃដោយសារតែរឿងអាស្រូវពុករលួយ។
ចំពោះលទ្ធផលផ្លូវការ ដែលគេប្រកាសផ្សាយនៅព្រឹកថ្ងៃចន្ទនេះ គឺសម្ព័ន្ធគណបក្ស ដឹកនាំដោយលោក Anwar Ibrahim ដែលមានឈ្មោះថា សម្ព័ន្ធភាពដើម្បីក្តីសង្ឃឹម Pakatan Harapan បានទទួលអាសនៈចំនួន៨២ ក្នុងចំណោមអាសនៈសភាទាំង២២២។ បន្ទាប់មកទៀត ក្រុមសម្ព័ន្ធភាពជាតិ Parikatan Nasional ដឹកនាំដោយលោកអតីតនាយករដ្ឋមន្ត្រី Muhyiddin Yassin បានទទួលអាសនៈចំនួន ៧៣។
រីឯក្រុមសម្ព័ន្ធ ឈ្មោះ Barisan Nasional ដែលដឹកនាំដោយគណបក្សដ៏ធំ ធ្លាប់កាន់អំណាចប្រមាណ៦០ឆ្នាំ ឈ្មោះ អង្គារជាតិបង្រួបបង្រួមម៉ាឡេ ហៅកាត់ថា UMNO នោះ គឺបានទទួលអាសនៈតែ៣០ទេ។ គណបក្សUMNO នេះហើយដែលជាបក្សរបស់លោកអតីតនាយករដ្ឋមន្ត្រី ណាជីប រ៉ាហ្សាក់ ហើយដែកបច្ចុប្បន្នកំពុងជាប់ពន្ធនាគាររឿងពុករលួយ។ ហើយរដ្ឋាភិបាល ដឹកនាំដោយលោក Ismail Sabri Yaakob របស់គណបក្ស UMNO នេះដែរ ដែលបានប្រកាសរំលាយសភា បោះឆ្នោតមុនអាណត្តិនាពេលនេះ ដោយសង្ឃឹមថាបានឈ្នះដាច់តែម្នាក់ឯង តែទីបំផុតស្ថិតនៅលេខរៀងទី៣វិញ។ ដោយឡែក លោក ម៉ាហាធា ម៉ូហាម៉េត អតីតនាយករដ្ឋមន្ត្រីវ័យ៩៧ឆ្នាំ ដែលសង្ឃឹមថាបានត្រលប់មកកាន់តំណែងនេះម្តងទៀតនោះ ក៏បានចាញ់ឆ្នោតដែរ។ អាសនៈរបស់លោកនៅកោះLangkawi បានរបូតពីដៃហើយ។ មានន័យថា វាគឺជាអវសាន្តនយោបាយមែនទែនហើយ សម្រាប់លោកម៉ាហាធា ម៉ូហាម៉េត។
បក្សលោកAnwar Ibrahim សុខចិត្តចរចាបង្កើតរដ្ឋាភិបាលចម្រុះជាមួយគូសត្រូវ
សម្ព័ន្ធគណបក្សរបស់លោក Anwar Ibrahim បានសំឡេងឆ្នោតគ្រាន់បើជាងគេមែន តែមិនឈ្នះដាច់ខ្លាំងប៉ុន្មាននោះទេ។ ដូច្នេះត្រូវតែចរចា ប្រមូលបក្សផ្សេងទៀត មកបង្កើតរដ្ឋាភិបាលចម្រុះជាមួយ ធ្វើយ៉ាងណា ឲ្យបានគ្រប់សំឡេងភាគច្រើនក្នុងសភា ពោលគឺ១១២អាសនៈ ក្នុងចំណោម២២២។ នៅព្រឹកថ្ងៃចន្ទនេះ លោក Anwar Ibrahim បានអះអាងថា សម្ព័ន្ធគណបក្សលោកបាននិយាយចរចា ពេញមួយយប់ថ្ងៃអាទិត្យ ជាមួយគណបក្សកាន់អំណាច Barisan Nasional ដែលមាន៣០អាសនៈនោះ ដើម្បីបង្កើតរដ្ឋាភិបាលចម្រុះ ធ្វើការជាមួយគ្នា។
លោក Anwar Ibrahim គឺជាអ្នកនយោបាយបក្សប្រឆាំង ដែលតែងតែរិះគន់ គណបក្ស UMNO ដែលកាន់អំណាចរាប់សិបឆ្នាំ។ តែពេលនេះ លោកAnwar Ibrahim បានអះអាងថា លោកសុខចិត្តរៀបចំរដ្ឋាភិបាលចម្រុះជាមួយគណបក្សនេះ ដើម្បីបង្កើតរដ្ឋាភិបាលថ្មីមួយ ដែលមានតម្លាភាព គោរពលទ្ធិប្រជាធិបតេយ្យ ព្រមទាំងការពារផលប្រយោជន៍ប្រជាជាតិម៉ាឡេ។
ដោយឡែក សម្ព័ន្ធគណបក្ស Parikatan Nasional ដឹកនាំដោយលោកអតីតនាយករដ្ឋមន្ត្រី Muhyiddin Yassin ក៏បានអះអាងថា ខាងគេក៏កំពុងតែចរចា បង្កើតរដ្ឋាភិបាលចម្រុះដែរ។ លោក Muhyiddin Yassin បានប្រាប់អ្នកកាសែតនៅព្រឹកនេះថា សម្ព័ន្ធគណបក្សលោកត្រៀមធ្វើការជាមួយគ្រប់គណបក្សទាំងអស់ ធ្វើម៉េចក៏ដោយ ឲ្យតែបានគ្រប់ចំនួនអាសនៈភាគច្រើនក្នុងសភា។
សម្ព័ន្ធគណបក្ស Parikatan Nasional ជា គ្រោះថ្នាក់នៃទំនោរអ៊ីស្លាមជ្រុលនិយម
សម្រាប់ពេលនេះ គឺសម្ព័ន្ធបក្ស Barisan Nasional របស់បក្ស UMNO ដែលមាន៣០អាសនៈ ដែលកំពុងទារថ្លៃខ្លួន ព្រោះត្រូវក្រុមបក្សពីរទៀត ចរចាដណ្តើមគ្នាចង់បង្កើតរដ្ឋាភិបាលចម្រុះជាមួយ។ គិតត្រឹមពេលនេះ គ្មានសញ្ញាណជាក់ច្បាស់ណាមួយថា សម្ព័ន្ធបក្ស Barisan Nasional នេះ បានឆ្លើយយល់ព្រមធ្វើរដ្ឋាភិបាលចម្រុះ ជាមួយលោក Anwar Ibrahim ដែលជាគូសត្រូវរាប់សិបឆ្នាំនោះទេ។ តែយ៉ាងណា បើសម្ព័ន្ធបក្ស Barisan Nasional នេះចងសម្ព័ន្ធភាពបង្កើតរដ្ឋាភិបាលចម្រុះជាមួយ សម្ព័ន្ធគណបក្ស Parikatan Nasional ដឹកនាំដោយលោក Muhyiddin Yassin ក៏នៅតែមិនគ្រប់អាសនៈដែរ។ ដូច្នេះ គេត្រូវចរចា ជាមួយគណបក្សតូចតាចតាមរដ្ឋផ្សេងៗទៀត ឲ្យចូលរួមជាមួយ ប្រសិនបើគេចង់ដាក់រនាំង រារាំងមិនឲ្យលោកសម្ព័ន្ធគណបក្សប្រឆាំងដឹកនាំដោយលោក Anwar Ibrahim អាចដឹកនាំរដ្ឋាភិបាលបាន។
យ៉ាងណាក៏ដោយ អ្នកវិភាគនយោបាយនៅម៉ាឡេស៊ី បានសំដែងការបារម្ភដែរ ថាប្រសិនបើ សម្ព័ន្ធបក្ស Parikatan Nasional ដឹកនាំដោយលោក Muhyiddin Yassin អាចឈានទៅកាន់អំណាច មានន័យថារដ្ឋាភិបាលម៉ាឡេស៊ីនឹងកាន់តែមានទំនោរបែបអ៊ីស្លាមផ្តាច់ការជ្រុលនិយម។ លោក Oh Ei Sun អ្នកជំនាញនៅ Pacific Research Centre of Malaysia បានលើកឡើងថា សម្ព័ន្ធបក្សរបស់លោក Muhyiddin Yassin គឺជាសម្ព័ន្ធមនោគមវិជ្ជាសាសនាអ៊ីស្លាមអភិរក្សនិយម ចង់ប្រើច្បាប់អ៊ីស្លាមឆារីយ៉ា។ ពោលគឺវាមិនឆ្លើយតបទៅនឹងភាពចម្រុះជាតិសាសន៍ និងសាសនា សហគមនផ្សេងៗគ្នានៅម៉ាឡេស៊ីទេ ហើយមួយទៀតនោះ រដ្ឋាភិបាលជ្រុលនិយមគិតតែពីរឿងសាសនាអ៊ីស្លាមបែបនេះ នឹងមិនអាចដោះស្រាយបញ្ហាវិបត្តិសេដ្ឋកិច្ច ជួយជីវភាពប្រជាជនឲ្យល្អប្រសើរឡើយ។
តាមការបង្គាប់ពីព្រះបរមរាជវាំងម៉ាឡេស៊ី គឺគេត្រូវតែបញ្ជូនគម្រោងបង្កើតរដ្ឋាភិបាលចម្រុះជាក់ច្បាស់មួយ ដោយដាក់ស្នើឈ្មោះនាយករដ្ឋមន្ត្រីម្នាក់ផង ថ្វាយមកព្រះចៅស៊ុលតង់ ដើម្បីឡាយព្រះហស្ថលេខាយល់ព្រម ឲ្យបានមុនថ្ងៃចន្ទនេះ ម៉ោង២រសៀល។ ប៉ុន្តែដោយមានការស្នើសុំពីបក្សនយោបាយទាំងអស់ ឱសានុវាទចុងក្រោយនេះ ត្រូវបានរុញទៅដល់ថ្ងៃអង្គារស្អែក ម៉ោង២រសៀល ដើម្បីចំណាយពេលចរចាគ្នាបន្ថែមទៀត។ ថាមិនត្រូវ ឱសានុវាទនេះ អាចនឹងរុញពន្យាបន្ថែមទៀតក៏ថាបានដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ