សហរដ្ឋអាមេរិកបញ្ជូនជំនួយនិងពង្រឹងវត្តមានយោធា ទៅការពារអ៊ីស្រាអែល
ក្នុងនាមជាសម្ព័ន្ធមិត្តជាប្រវត្តិសាស្ត្រ សហរដ្ឋអាមេរិកបានផ្តល់ការគាំទ្រយោធាយ៉ាងលឿនរហ័សដល់អ៊ីស្រាអែលដែលទើបរងការវាយប្រហារពីសំណាក់ចលនាហាម៉ាស។ អាមេរិកបានសម្រេចនៅថ្ងៃអាទិត្យទី៨តុលា២០២៣ បញ្ជូនជំនួយយោធាដោយបន្ថែមនូវគ្រាប់រំសេវថ្មីៗនិងដោយបញ្ជូននាវាផ្ទុកយន្តហោះទៅកាន់តែកៀកអ៊ីស្រាអែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
ក្នុងពេលជួបពិភាក្សាជាមួយនាយករដ្ឋមន្ត្រីអ៊ីស្រាអែល នេតាន់យ៉ាហ៊ូ តាមទូរស័ព្ទ លោកប្រធានាធិបតីអាមេរិក បានប្រកាសផ្តល់ជំនួយបន្ថែមដល់ក្រុមយោធាអ៊ីស្រាអែល។ ជំនួយទាំងនោះបានចេញដំណើរទៅអ៊ីស្រាអែលហើយ ហើយជំនួយមួយវគ្គថ្មីទៀតក៏នឹងទៅតាមក្រោយនាប៉ុន្មានថ្ងៃខាងមុខ។ នេះបើតាមសេចក្តីថ្លែងការណ៍របស់សេតវិមាន។
ជាមួយនឹងសេចក្តីបញ្ជាក់ថាកញ្ចប់ជំនួយយោធាមួយវគ្គដំបូងនឹងទៅដល់អ៊ីស្រាអែលក្នុងពីរបីថ្ងៃខាងមុខ រដ្ឋមន្ត្រីក្រសួងការពារជាតិអាមេរិកលោក ឡយដ៍ អូស្ទីន បានបន្ថែមថា នាវាផ្ទុកយន្តហោះUSS Gerald Ford ដែលជានាវាផ្ទុកយន្តហោះដ៏ធំជាងគេបំផុតនៅលើពិភពលោក នឹងបង្វែរទៅកាន់សមុទ្ទមេឌីទែរ៉ាណេខាងកើតវិញ ពោលគឺឱ្យបានកៀកខាងអ៊ីស្រាអែល។ ស្ថិតនៅក្នុងសមុទ្ទមេឌីទែរ៉ាណេស្រាប់ នាវាអាមេរិកនេះ USS Gerald Ford កំពុងធ្វើប្រតិបត្តិការម្តុំ កាលពីដើមខែតុលា នៅសមុទ្ទIonienne ត្រង់ចន្លោះប្រទេសអ៊ីតាលីនិងក្រិក។ គឺជាការពង្រឹងវត្តមានអាមេរិកនៅក្នុងតំបន់។ នេះបើតាមការបញ្ជាក់លម្អិតរបស់លោករដ្ឋមន្ត្រីការពារជាតិ ដោយអះអាងថាអាមេរិករក្សាកម្លាំងសម្រាប់រារាំងជានិច្ចនិងជាស្រេចក្នុងកំរិតពិភពលោក។
ក្រោយការវាយប្រហាររបស់ចលនាហាម៉ាសលើអ៊ីស្រាអែល អ្នកទទួលខុសត្រូវគ្រប់និន្នាការនយោបាយបានគាំទ្រនយោបាយអាមេរិកជួយការពារអ៊ីស្រាអែល។ ប៉ុន្តែជំនួយយោធាបន្ថែមសម្រាប់អ៊ីស្រាអែល អាចនឹងត្រូវការប្រើពេលវេលាយូរ ដោយត្រូវឆ្លងកាត់ការអនុម័តពីព្រឹទ្ធសភានិងសភា ដែលកំពុងជាប់គាំងនយោបាយក្រោយការទម្លាក់ប្រធានសភាកាលពីសប្តាហ៍មុន។
ជំនួយយោធាអាមេរិកនេះ ជាចំណែកមួយនៃការឈ្លានពានមកលើប្រជាពលរដ្ឋប៉ាឡេស្ទីន។ នេះបើតាមប្រតិកម្មរបស់ចលនាហាម៉ាសដែលកាន់អំណាចនៅតំបន់ហ្កាហ្សា។
លើផ្នែកការទូតវិញ ប្រមុខការបរទេសអាមេរិកលោកអង់តូនីប្លីងកិន បានពន្យល់ថា រដ្ឋបាលអាមេរិកបានទាក់ទងទៅគ្រប់ប្រទេសដើម្បីផ្តល់ការគាំទ្រដល់អ៊ីស្រាអែលដោយប្រើអស់គ្រប់លទ្ធភាព មធ្យោបាយនិងឥទ្ធិពលរបស់ខ្លួន និងធានាថាជម្លោះនេះនឹងពុំបែកខ្ចាយទៅដល់តំបន់ផ្សេង។ លោកប្លីងកិនបានប្រាប់ឲ្យដឹងថា មានពលរដ្ឋអាមេរិកជាច្រើនស្ថិតក្នុងចំណោមជនរងគ្រោះស្លាប់បាត់បង់ជីវិត និងចាប់ខ្លួនដោយស្នាដៃចលនាហាម៉ាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ