អង្គការសហប្រជាជាតិបានព្រមានពីការបំពុលដោយប្លាស្ទិក និងអំពាវនាវជាថ្មីឲ្យកាត់បន្ថយផលិកម្មប្លាស្ទិក
នៅថ្ងៃព្រហស្បតិ៍ ទី២១ កញ្ញា នាយិកាប្រតិបត្តិនៃកម្មវិធីបរិស្ថានរបស់អង្គការសហប្រជាជាតិលោកស្រី Inger Andersen បានថ្លែងដោយព្រមានថា ផលិតកម្មប្លាស្ទិកកំពុងបន្តកើនឡើង ទោះបីជាគ្រប់គ្នាបានដឹងពីការបំពុលដោយប្លាស្ទិកចំពោះផែនដីក៏ដោយ។ លោកស្រី Inger Andersen បានយល់ឃើញថា បើកំណើនផលិតកម្មប្លាស្ទិកនៅបន្តមាន វិធានការកែច្នៃប្លាស្ទិកឡើងវិញតែមួយនៅមិនគ្រប់គ្រាន់ដើម្បីឲ្យពិភពលោកគ្មានប្លាស្ទិកបានទេ។
ចុះផ្សាយនៅថ្ងៃ៖
ស្តាប់ - ០២:៤៣
នាយិកាប្រតិបត្តិនៃកម្មវិធីបរិស្ថានរបស់អង្គការសហប្រជាជាតិលោកស្រី Inger Andersen បានថ្លែងយ៉ាងដូចនេះប្រាប់ AFP នៅក្រៅក្របខណ្ឌនៃមហាសន្និបាតអង្គការសហប្រជាជាតិក្នុងក្រុងញូយ៉ក។ តាមលោកស្រី Inger Andersen ជម្រើសនៃការប្រើប្លាស្ទិកឡើងវិញ និងជម្រើសនៃការកែច្នៃប្លាស្ទិកឡើងវិញនៅមិនគ្រប់គ្រាន់ទេ ប្រសិនបើផលិតកម្មប្លាស្ទិកកំពុងបន្តកើនឡើងនោះ។ នាយិកាប្រតិបត្តិនៃកម្មវិធីបរិស្ថានរបស់អង្គការសហប្រជាជាតិដដែលរូបនេះយល់ថា មានផ្លូវច្រើនដែលត្រូវដើរស្របគ្នាដើម្បីប្រយុទ្ធប្រឆាំងនឹងការបំពុលដោយប្លាស្ទិក។
ផ្លូវទី១ បំបាត់ចោលឲ្យបានច្រើនបំផុតដែលអាចធ្វើបាននូវប្លាស្ទិកដែលប្រើតែមួយលើករួចបោះចោល និងបញ្ឈប់ការប្រើប្លាស្ទិកវេចខ្ចប់ផលិផលដែលមិនចាំបាច់។ ឧទាហរណ៍ ដូចជាការប្រើប្លាស្ទិកដើម្បីខ្ចប់ចេក ឬក្រូចដោយលោកស្រី Inger Andersen យល់ថា ចេក និងក្រូចត្រូវបានការពារដោយសំបកពីធម្មជាតិរួចហើយ។ ផ្លូវទី២ គឺត្រូវគិតពីរបៀបធ្វើផលិតផលដោយមើលថា តើផលិតផលដែលជាវត្ថុរាវអាចផលិតទៅជាម្សៅបានទេ ព្រោះធ្វើយ៉ាងនេះដើម្បីបញ្ជៀសការប្រើដបប្លាស្ទិកដើម្បីច្រកវា។ អ្វីដែលលោកស្រី Inger Andersen ចង់បាន គឺការកាត់បន្ថយការប្រើប្លាស្ទិកឲ្យបានច្រើនបំផុតដែលអាចទៅធ្វើបាន។
ពិតណាស់សព្វថ្ងៃនេះ ពិភពលោកកំពុងប្រឹងប្រែងធ្វើការកែច្នៃប្លាស្ទិកឡើងវិញ និងប្រើប្រាស់ប្លាស្ទិកឡើងវិញ។ តែទន្ទឹមគ្នានេះ ផលិតកម្មប្លាស្ទិកក៏កំពុងបន្តកើនឡើងដែរ។ ក្នុងរយៈពេល ២០ឆ្នាំ ផលិតកម្មប្លាស្ទិកប្រចាំឆ្នាំបានកើនទ្វេដង ពោលមាន ៤៦០លានតោន។ បើគ្មានវិធានការអ្វីទេ ផលិកម្មប្លាស្ទិកប្រចាំឆ្នាំនឹងកើនមួយគុណនឹងបីពីពេលនេះទៅឆ្នាំ ២០៦០។ រីឯការកែច្នៃបា្លស្ទិកឡើងវិញមានត្រឹមតែ ៩% ប៉ុណ្ណោះ។ ចំណែកកាកសំណល់ប្លាស្ទិកគ្រប់ប្រភេទដែលនៅសល់បានធ្លាក់ចូលក្នុងសមុទ្រ ក្នុងក្រពះសត្វស្លាប និងនៅលើកំពូលភ្នំ នេះជាការបញ្ជាក់របស់លោកស្រី Inger Andersen ដោយបន្ថែមថា បើពិភពលោកបន្តប្រើប្លាស្ទិកដូចសព្វថ្ងៃ ពិភពលោកគ្មានថ្ងៃនឹងអាចបញ្ឈប់លំហូរប្លាស្ទិកទៅក្នុងសមុទ្របានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ