លោក ចូ បៃដិន ប្រកាសឈរឈ្មោះជាបេក្ខជនសម្រាប់ការបោះឆ្នោតអាណត្តិថ្មី ឆ្នាំ២០២៤
ក្នុងវ័យ៨០ឆ្នាំ ប្រធានាធិបតីសហរដ្ឋអាមេរិក លោក ចូ បៃដិន បានប្រកាសឈរឈ្មោះជាថ្មី សម្រាប់ការបោះឆ្នោតប្រធានាធិបតីសហរដ្ឋអាមេរិក ឆ្នាំ២០២៤។ ការប្រកាសបេក្ខភាពនេះ ធ្វើឡើងនៅក្នុងវីដេអូមួយ ផ្សាយនៅព្រឹកព្រលឹមថ្ងៃអង្គារ ទី២៥មេសា ពីរដ្ឋធានីវ៉ាស៊ីនតោន។ ក្នុងវីដេអូរយៈពេលជាង៣នាទី លោក ចូ បៃដិន មានប្រសាសន៍មួយៗ បង្កប់ដោយខ្លឹមសារយ៉ាងសាមញ្ញ តែច្បាស់លាស់ នោះគឺ «ការពារសិទ្ធិសេរីភាពជាមូលដ្ឋាន និងការពារលិទ្ធប្រជាធិបតេយ្យ» ហើយរួមគ្នាប្រឆាំងនឹង«គំនិតនិងចលនាជ្រុលនិយម»។ គំនិតនិងទង្វើជ្រុលនិយម ដែលលោក ចូ បៃដិន ចង់ចង្អុលបង្ហាញជាឧទាហរណ៍នោះ គឺ ព្រឹត្តិការណ៍ហិង្សាវាយលុកចូលកាន់កាប់វិមានកាពីតូលអាមេរិក កាលពីដើមឆ្នាំ២០២១ ដែលជាការញុះញ៉ុងនាំអាទិ៍ដោយលោក ដូ ណាល់ត្រា។
ចុះផ្សាយនៅថ្ងៃ៖
ស្តាប់ - ០១:១២
ខ្លឹមសារនៃវីដេអូឃោសនារបស់លោក ចូ បៃដិន ដែលមកពីគណបក្សប្រជាធិបតេយ្យ កំពុងកាន់អំណាច គឺចង់បង្ហាញដែរថា ប្រសិនបើគណបក្សប្រឆាំង បក្សសាធារណរដ្ឋឈ្នះឆ្នោត នោះគឺនឹងបង្កការគំរាមកំហែងដល់សិទ្ធិរំលូតកូន ប៉ះពាល់សិទ្ធិស្រឡាញ់ភេទដូចគ្នា និងសិទ្ធិទទួលបានការព្យាបាលត្រឹមត្រូវ ហើយបង្កការរើសអើងពូជសាសន៍ពណ៌សម្បុរ ជាដើម។
អាស្រ័យហេតុនេះ ប្រធានាធិបតីសហរដ្ឋអាមេរិក លោក ចូ បៃដិន អំពាវនាវឲ្យពលរដ្ឋអាមេរិក បោះឆ្នោតជូនរូបលោក ១អាណត្តិទៀត ដើម្បីសម្រេចកិច្ចការដែលគណបក្សប្រជាធិបតេយ្យរបស់លោក កំពុងតែធ្វើ។ លោកមានប្រសាសន៍ទៀត ថា «ខ្ញុំគិតថា យើងអាចធ្វើបាន»។ ពាក្យពេចន៍មួយនេះ ដែលលោកចង់យោងភ្ជាប់ ទៅនឹង ពាក្យស្លោករបស់លោក បារ៉ាក់ អូបាម៉ា អតីតប្រធានាធិបតី មកពីបក្សប្រជាធិបតេយ្យ ដែរ។
« សេរីភាព! សេរីភាពឯកជន គឺជាសិទ្ធិមូលដ្ឋានដ៏សំខាន់ ដែលយើងទាំងអស់គ្នា មាន ក្នុងនាមជា ពលរដ្ឋអាមេរិក! គ្មានអ្វីសំខាន់ជាងនេះទៀតទេ! (…)
គ្មានអ្វីសម្ងាត់ទេ! កិច្ចការក្នុងអាណត្តិទី១របស់ខ្ញុំ គឺប្រយុទ្ធដើម្បីលិទ្ធិប្រជាធិបតេយ្យ! (…)
ពេលប្រកាសឈរឈ្មោះបួនឆ្នាំមុន ខ្ញុំតស៊ូដើម្បីព្រលឹងជាតិយើង ហើយពេលនេះ ក៏យើងនៅតែប្តេជ្ញាប្រយុទ្ធតទៀត ព្រោះ ១អាណត្តិមិនគ្រប់គ្រាន់ទេ ដើម្បីបញ្ចប់ការងារ។(…)
ចំណោទសំណួរ ដែលយើងកំពុងប្រឈម គឺថា តើនៅប៉ុន្មានឆ្នាំខាងមុខ យើងមាន សេរីភាពច្រើនជាងនេះ ឬ សេរីភាពកាន់តែរួមតូចខើចខ្លីទៅ, សិទ្ធិកាន់តែច្រើន ឬកាន់តែរួញតិចជាងនេះ?
ខ្ញុំដឹងថា ខ្ញុំចង់បានចម្លើយបែបណា ហើយខ្ញុំគិតថា អ្នកក៏ដឹងដែរ។ នេះ ពុំមែនជា ពេលត្រូវដេករអ៊ូទេ។
ដូច្នេះហើយ ទើបខ្ញុំសម្រេចចិត្តឈរឈ្មោះជាថ្មីម្តងទៀត» (…)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ