មន្ទីរបញ្ចកោនចាប់បានសញ្ញាបាឡុងចារកម្មរបស់ចិន នៅក្នុងដែនអាកាសអាមេរិក
ក្រសួងការពារជាតិ អាមេរិក និងកាណាដា បានអះអាងបន្តបន្ទាប់គ្នា ថា បានចាប់សញ្ញាបាឡុងចារកម្មរបស់ចិន នៅក្នុងដែនអាកាសអាមេរិក និងកាណាដា។ តាមមន្ទីរបញ្ចកោន ប្រធានាធិបតីអាមេរិក លោកចូ បៃដិនបានបញ្ជាឲ្យបាញ់ទម្លាក់ ប៉ុន្តែ ក្រសួងការពារជាតិអាមេរិក ផ្តល់យោបល់ផ្ទុយទៅវិញ ដើម្បីហេតុផលសុវត្ថិភាពរបស់មនុស្សនៅលើដីអាមេរិក។ ប្រតិកម្មនឹងវត្តមានរបស់ប៉ាឡុងចារកម្មចិន នៅដែនអាកាសអាមេរិក ប៉េកាំងបានអំពាវនាវឲ្យមានការស្ងប់ស្ងាត់ និងរង់ចាំលទ្ធផលស៊ើបអង្កេតពីខាងភាគីចិន។
ចុះផ្សាយនៅថ្ងៃ៖
ស្តាប់ - ០២:៣១
តាមការប្រកាសរបស់មន្ទីរបញ្ចកោន កាលពីថ្ងៃព្រហស្បតិ៍ម្សិលមិញ បាឡុងចារកម្មរបស់ចិន បានហោះ ២ថ្ងៃមកហើយ ក្នុងកំពស់ដ៏ខ្ពស់ ដោយហោះពីលើទីតាំងយុទ្ធសាស្រ្ត ភាគខាងជើងអាមេរិក។ នៅថ្ងៃសុក្រនេះ ក្រសួងការពារជាតិកាណាដាបានអះអាងថា កាណាដា បានកំណត់សញ្ញាបាឡុងចារកម្មមួយទៀត ក្នុងដែនអាកាសរបស់កាណាដា។ ដោយមិនបានបញ្ជាក់ថា ជាបាឡុងចារកម្មរបស់ចិន ក្រសួងការពារជាតិកាណាដា និយាយថា ភ្នាក់ងារចារកម្មកាណាដាទាក់ទងជាប់ជានិច្ចជាមួយភាគីអាមេរិក និងបន្តចាត់វិធានការ ដើម្បីការពារកាណាដា ពីភ្នាក់ងារចារកិច្ចបរទេស។
តាមមន្រ្តីជាន់ខ្ពស់អាមេរិក យន្តហោះចម្បាំងF22 របស់អាមេរិក ប្រចាំនៅមូលដ្ឋានទ័ពក្នុងរដ្ឋMontana បានត្រៀមខ្លួនចេញធ្វើប្រតិការ នៅថ្ងៃព្រហស្បតិ៍ ក្នុងករណីមានបញ្ជាពីប្រធានាធិបតី។ តាមអ្នកទទួលខុសត្រូវកងទ័ពអាមេរិក លោកចូ បៃដិនបានបញ្ជាឲ្យគេបាញ់ទម្លាក់បាឡុងស៊ើបការណ៍សម្ងាត់របស់ចិន ប៉ុន្តែ ក្រសួងការពារជាតិ បានផ្តល់យោបល់កុំបាញ់ទម្លាក់ទៅវិញ ក្នុងហេតុផលថា បំណែកកម្ទេចរបស់បាឡុងស៊ើបការណ៍អាចបង្កគ្រោះថ្នាក់ដល់ជីវិតមនុស្សនៅលើដី។ ម្យ៉ាង ដោយហោះក្នុងកំពស់ដ៏ខ្ពស់ បាឡុងចារកម្មមិនគ្រោះថ្នាក់សម្រាប់យន្តហោះដឹកអ្នកដំណើរ ដែលហោះនៅកំពស់ទាបជាងវា។
ដោយបដិសេធ មិនបាញ់ទម្លាក់ យន្តហោះចម្បាំងអាមេរិកកំពុងហោះអម តាមដាន គន្លងហោះរបស់បាឡុងចារកម្មចិន ដែលអាចហោះពីលើទីតាំងយុទ្ធសាស្រ្តយោធារបស់អាមេរិក ដូចជាមូលដ្ឋានទ័ពអាកាស និងទីតាំងបាញ់មីស៊ីលនុយក្លេអ៊ែរ នៅរដ្ឋMontana ភាគពាយ័ព្យអាមេរិក។ នៅមូលដ្ឋានទ័ពអាកាសMalmstrom នៅ Montana អាមេរិកមានកន្លែងបាញ់មីស៊ីលអន្តរទ្វីប១៥០កន្លែង។
នៅក្រោយរកឃើញបាឡុងស៊ើបការណ៍សម្ងាត់ចិន ភាគីអាមេរិកបានជូនដំណឹងភ្លាមទៅសមភាគីចិន តាមខ្សែទូរស័ព្ទការទូត ដោយបញ្ជាក់ថា អាមេរិកនឹងចាត់វិធានការគ្រប់បែបយ៉ាងដើម្បីការពារជីវិតប្រជាជន នៅលើទឹកដីអាមេរិក។ អ្នកនាំពាក្យរបស់ក្រសួងការបរទេសចិន បាននិយាយនៅថ្ងៃសុក្រនេះថា ចិនកំពុងបើកការស៊ើបអង្កេត និងអំពាវនាវឲ្យគ្រប់ភាគីប្រកាន់ឥរិយាបទប្រយ័ត្នប្រយែង។ សម្រាប់អ្នកនាំពាក្យខាងលើ ចិនគោរពច្បាប់អន្តរជាតិ និងមិនដែលមានចេតនារំលោភទឹកដី និងដែនអាកាសរបស់រដ្ឋណាមួយឡើយ។
វត្តមានបាឡុងស៊ើបការណ៍សម្ងាត់ចិន នៅក្នុងដែនអាកាសអាមេរិក កើតមានឡើង នៅប៉ុន្មានថ្ងៃមុនទស្សនកិច្ចជាលើកទី១ របស់ប្រមុខការបរទេសអាមេរិក លោកអង់តូនី ប្លីងកិន នៅទីក្រុងប៉េកាំង។
អាមេរិកឧស្សាហ៍ចាប់បានសញ្ញាបាឡុងចារកម្ម នៅក្នុងដែនអាកាសរបស់ខ្លួន ប៉ុន្តែ នេះជាលើកទី១ ដែលបាឡុងស៊ើបការណ៍ហោះក្នុងរយៈពេលយូរថ្ងៃក្នុងទឹកដីអាមេរិក។ សម្រាប់អ្នកជំនាញចិន អាមេរិក និងសូវៀត ចូលចិត្តប្រើបាឡុង ដើម្បីស៊ើបយកការណ៍សម្ងាត់ នៅក្នុងសម័យសង្រ្គាមត្រជាក់ ព្រោះវាជាមធ្យោបាយដែលមានតម្លៃថោកជាងគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ