ក្រុមហ៊ុន Google បញ្ឈប់បុគ្គលិក១ម៉ឺន២ពាន់នាក់ ដើម្បីកាត់បន្ថយចំណាយ
ពីសហរដ្ឋអាមេរិក ក្រុមហ៊ុនបច្ចេកវិទ្យាអ៊ិនធ័រនែត Google បានប្រកាសបញ្ឈប់បុគ្គលិក ចំនួន ១២ ០០០ នាក់ នៅទូទាំងពិភពលោក។ ចំនួននេះ ស្មើនឹង ៦% នៃចំនួនបុគ្គលិកសរុប។ ការបញ្ឈប់បុគ្គលិកពីសំណាក់ក្រុមហ៊ុន Google នេះ គឺស្របពេលដែលក្រុមហ៊ុនបច្ចេកវិទ្យាអ៊ិនធ័រនែត ផ្សេងទៀត ដូចជា Microsoft, Facebook និង Amazon ជាដើម ក៏បានបញ្ឈប់បុគ្គលិករាប់ពាន់នាក់ដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ក្រុមហ៊ុនបច្ចេកវិទ្យាអ៊ិនធ័រនែត Google ជាក្រុមហ៊ុនបុត្រសម្ព័ន្ធ សាខាក្រុមហ៊ុនមួយរបស់ ក្រុមហ៊ុនមេ Alphabet ដែលមានបុគ្គលិកសរុប ១៨ម៉ឺន៧ពាន់នាក់ គិតត្រឹមខែកញ្ញា ឆ្នាំ២០២២។ ពេលនេះ ក្រុមហ៊ុន Google មានគម្រោងផែនការកាត់បន្ថយបុគ្គលិក ដើម្បី បន្ថយការចំណាយរបស់ក្រុមហ៊ុន។ ក្រុមហ៊ុននេះ ដែលត្រូវដឹងថា បានបាត់បង់ប្រាក់កម្រៃពីការធ្លាក់ចុះចំនួនផ្សាយពាណិជ្ជកម្ម។ នេះក៏ព្រោះតែចំណែកមួយនៃផលប៉ះពាល់របស់ជំងឺរាតត្បាតកូវីដ១៩ដែរ ហើយនិងប្រឈមមុខនឹងការប្រកួតប្រជែងពីក្រុមហ៊ុនស្រដៀងគ្នា។
លោក Sundar Pichai អគ្គនាយកក្រុមហ៊ុន Google បានឲ្យដឹងក្នុងសេចក្តីថ្លែងការណ៍ថា ការបញ្ឈប់បុគ្គលិកពីការងារ នៅពេលនេះ គឺធ្វើឡើងជាទូទៅ ចំពោះគ្រប់តំណែង គ្រប់ផ្នែក និងគ្រប់តំបន់ ដែល Google ប្រតិបត្តិការ។ ទោះជាយ៉ាងណា លោកអគ្គនាយករូបនេះ ពុំបានបញ្ជាក់ពីផលប្រយោជន៍ដែលបុគ្គលិកត្រូវទទួលបានទេ។ បើតាមអ្នកជំនាញច្បាប់ការងារ ចំពោះបុគ្គលិកដែលធ្វើការនៅលើទឹកដីអាមេរិក គឺនឹងទទួលបានប្រាក់សំណង ប្រាក់អត្ថប្រយោជន៍ប្រចាំឆ្នាំ និងប្រាក់ជួយគាំទ្រខាងសុខភាពផង ដែលផលប្រយោជន៍សម្រាប់បុគ្គលិកត្រូវគេបញ្ឈប់នោះ មានសរុបជាច្រើនខែដែរ។
ជាការគួរឲ្យកត់សម្គាល់ គឺ ការបញ្ឈប់បុគ្គលិកពីសំណាក់ក្រុមហ៊ុនបច្ចេកវិទ្យាអ៊ិនធ័រនែត គឺមានចរន្តប្រហាក់ប្រហែលគ្នា។ ក្រុមហ៊ុនបច្ចេកវិទ្យាព័ត៌មានវិទ្យា Microsoft បានប្រកាសពីថ្ងៃពុធកន្លងទៅនេះ ថាបញ្ឈប់បុគ្គលិកចំនួន ១ ម៉ឺននាក់ ពីពេលនេះដល់ខែមីនា។ ក្រុមហ៊ុនផ្សេងទៀត តួយ៉ាង ក្រុមហ៊ុន Amazon, Twitter, ក្រុមហ៊ុនមេតា ដែលគ្រប់គ្រង Facebook និង Instagram ជាដើម ក៏បានសម្រេចចិត្តបញ្ឈប់បុគ្គលិករបស់ខ្លួន ចំនួន រាប់ពាន់នាក់ដែរ។
នៅសហរដ្ឋអាមេរិក បើតាមអ្នកជំនាញ ការបញ្ឈប់បុគ្គលិកនៅក្នុងវិស័យបច្ចេកវិទ្យាអ៊ិនធ័រនែត មានចំនួន ជិត ២០ ម៉ឺននាក់ ក្នុងឆ្នាំ២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ