ឯកសារសម្ងាត់ជំនាន់លោកបៃដិនធ្វើជាអនុប្រធានាធិបតី ត្រូវបានគេប្រទះឃើញនៅក្រៅបណ្ណសារជាតិ
ឯកសារសំងាត់អាមេរិកជាច្រើនដុំ ត្រូវបានគេប្រទះឃើញ នៅក្នុងទីតាំងមជ្ឈមណ្ឌលស្រាវជ្រាវមួយកន្លែង ដែលលោកចូ បៃដិន ក៏ធ្លាប់បានប្រើប្រាស់ជាទីតាំងធ្វើការ។ យោងតាមសេតវិមានអាមេរិក ឯកសារសម្ងាត់ទាំងនោះ មានកាលបរិច្ឆេទ តាំងតែពីជំនាន់លោកចូ បៃដិន ធ្វើជាអនុប្រធានាធិបតីរបស់លោកអូបាម៉ា។ ការប្រទះឃើញឯកសារសម្ងាត់ នៅខាងក្រៅបណ្ណសារជាតិបែបនេះ បានធ្វើឲ្យមានប្រតិកម្មសើចចំអក និងរិះគន់លោកចូ បៃដិន ពីសំណាក់ លោកដូណាល់ ត្រាំ ដែលលោកត្រាំខ្លួនឯង ក៏ធ្លាប់ត្រូវបានគេចោទ ថាបានរក្សាទុកឯកសារសម្ងាត់ជាតិដោយខុសច្បាប់។
ចុះផ្សាយនៅថ្ងៃ៖
ក្នុងពេលរៀបចំប្រមូលឯកសារ និងសម្ភារៈចេញពីមជ្ឈមណ្ឌល Penn Biden Center ដែលជាផ្នែកមួយនៃសកលវិទ្យាល័យ Pennsylvanie ក្រុមមេធាវីរបស់លោកចូ បៃដិន បានប្រទះឃើញសំណុំឯកសារសម្ងាត់ជាច្រើនដុំ កាលពីខែវិច្ឆិកាឆ្នាំមុន។ យោងតាម លោក Richard Sauber ទីប្រឹក្សាគតិយុទ្ធរបស់លោកចូ បៃដិន គឺឯកសារសម្ងាត់ទាំងនោះ ត្រូវបានប្រគល់ទៅឲ្យបណ្ណសារជាតិ រក្សាទុករួចរាល់ហើយ ដោយអនុលោមទៅតាមច្បាប់កំណត់។
លោក Richard Sauber បញ្ជាក់ថា ឯកសារសម្ងាត់ទាំងនោះ ត្រូវបានគេបានប្រទះឃើញដោយចៃដន្យ នៅក្នុងទូរមួយបិទទ្វារចាក់សោរជិត ហើយឯកសារទាំងនេះ ពុំត្រូវធ្លាប់ត្រូវបានគេទាមទារប្រមូលយកទៅទុកទេ។ លោកអះអាងទៀតថា ក្រោយការប្រគល់ទៅដល់ដៃបណ្ណសារជាតិ សេតវិមាននៅតែបន្តសហការយ៉ាងច្បាស់លាស់ ជាមួយអាជ្ញាធរស្ថាប័ននេះ ព្រមទាំងក្រសួងយុត្តិធម៌ ដើម្បីពិនិត្យឲ្យបានច្បាស់លាស់ ថាគ្រប់ឯកសារសម្ងាត់ កាលពីជំនាន់អាណត្តិ អូបាម៉ា-បៃដិន ពិតជាកំពុងស្ថិតនៅក្នុងដៃរបស់បណ្ណសារជាតិ។
ដោយឡែក យោងតាមបណ្តាញទូរទស្សន៍ CBS News គឺលោករដ្ឋមន្ត្រីក្រសួងយុត្តិធម៌ Marrick Garland បានបញ្ជាទៅកាន់លោករដ្ឋអាជ្ញាសហព័ន្ធប្រចាំឈីកាហ្គោ ឲ្យពិនិត្យខ្លឹមសារនៃឯកសារទាំងនោះ ចំណែកសមត្ថកិច្ចFBI ក៏បានបើកការស៊ើបអង្កេតមួយដែរ។ CBS News ផ្សាយទៀតថា ដោយយោងតាមប្រភពសុំមិនបញ្ចេញឈ្មោះ ឯកសារសម្ងាត់ទាំងនោះមានជាង១០ដុំ ហើយមិនមានឯកសារណា ពាក់ព័ន្ធនឹងកិច្ចការសម្ងាត់នុយក្លេអ៊ែរទេ។
សូមរំលឹកថា កាលពីខែសីហា ក្រុមសមត្ថកិច្ចFBI បានចុះទៅរឹបអូស ដល់គេហដ្ឋានលោកដូណាល់ ត្រាំ នៅរដ្ឋផ្លរីដា ដើម្បីប្រមូលយកឯកសារសម្ងាត់ជាតិជាច្រើនកេស រាប់ពាន់ដុំ។ ឯកសារទាំងនោះត្រូវបានលោកដូណាល់ ត្រាំប្រមូលយកទៅ ពេលចប់អាណត្តិ ដោយបំពាននឹងច្បាប់ ដែលកំណត់ថា ឯកសារសម្ងាត់ជាតិត្រូវតែប្រគល់ទៅឲ្យអាជ្ញាធរបណ្ណសារជាតិជាអ្នករក្សាទុក។ ប្រភពព័ត៌មានជាច្រើនអះអាងថា ឯកសារសម្ងាត់ទាំងនោះ មានពាក់ព័ន្ធនឹងចិន អ៊ីរ៉ង់ ព្រមងទាំងអាវុធនុយក្លេអ៊ែរផង។
បន្ទាប់ពីមានដំណឹងរកឃើញឯកសារសម្ងាត់ នៅទីតាំងដែលលោកចូ បៃដិនធ្លាប់ធ្វើការ លោកដូណាល់ ត្រាំ បានសរសេរសើចចំអកថា “តើពេលណា FBI នឹងចុះទៅឆែកឆេរ នៅតាមផ្ទះរបស់លោក ចូ បៃដិន ឬក៏អាចទៅឆែកនៅសេតវិមានផ្ទាល់តែម្តង ដើម្បីប្រមូលយកឯកសារសម្ងាត់ជាតិទៅទុក!“
ជាមួយ AFP
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ