សមាជិកសភាបក្សសាធារណរដ្ឋ គ្មានឯកភាពក្នុងការបោះឆ្នោតតែងតាំងប្រធានសភាថ្មី
នៅសហរដ្ឋអាមេរិក គណបក្សសាធារណរដ្ឋ ដែលមានសំឡេងភាគច្រើននៅក្នុងសភាតំណាង នៅក្រោយការបោះឆ្នោតពាក់កណ្តាលអាណត្តិកន្លងមកថ្មីៗនោះ នៅតែមិនទាន់មានការឯកភាពគ្នា ដើម្បីបោះឆ្នោតជ្រើសរើសប្រធានសភាថ្មីនោះទេ។ នេះជាលើកទៅមួយហើយ ក្នុងរយៈពេល១០០ឆ្នាំចុងក្រោយនេះ ដែលការបោះឆ្នោតតែងតាំងប្រធានសភាតំណាង បានជួបបញ្ហារកាំរកូសខ្លាំងបែបនេះ។ បើបញ្ហានេះអូសបន្លាយ គឺវានឹងប៉ះពាល់ ដល់ដំណើរការនីតិវិធីធ្វើច្បាប់ផ្សេងៗ ព្រមទាំងប៉ះពាល់ដល់មហិច្ឆតារបស់បក្សសាធារណរដ្ឋខ្លួនឯង ដែលចង់បើកការស៊ើបអង្កេតលើរូបលោកចូ បៃដិន ថែម។
ចុះផ្សាយនៅថ្ងៃ៖
ស្តាប់ - ០២:៤១
តើអ្នកណានឹងមកឡើងមកជំនួស លោកស្រី Nancy Pelosi ក្នុងមុខតំណែងប្រធានសភាតំណាង ដែលជាមុខងារធំលំដាប់ទី៣នៃអំណាចនយោបាយសហរដ្ឋអាមេរិកនោះ? សភាតំណាងបានធ្លាក់ទៅក្នុងដៃរបស់បក្សសាធារណរដ្ឋ តែសមាជិកសភាបក្សនេះ នៅតែមិនទាន់មានការឯកភាពគ្នា ក្នុងការជ្រើសតាំងប្រធានសភា។
បេក្ខភាពលោក Kevin McCarthy ត្រូវបានគណបក្សសាធារណរដ្ឋប្រកាសគាំទ្រជាទូទៅ។ ក៏ប៉ុន្តែការបោះឆ្នោតបានប្រព្រឹត្តិធ្វើទៅ៣លើកហើយ នៅថ្ងៃទី៣មករា តែលោក Kevin McCarthy នៅតែមិនអាចទទួលបានសំឡេងឆ្នោត ឲ្យបានគ្រប់ចំនួន២១៨សំឡេង។ គឺក្រុមសមាជិកសភាបក្សសាធារណរដ្ឋ ដែលស្និទ្ធនឹងលោកដូណាល់ ត្រាំ ចំនួនជាង២០នាក់ ដែលបាននាំគ្នារ៉ាវឆាន មិនគាំទ្របេក្ខភាពលោក Kevin McCarthy។ បេក្ខជនម្នាក់ទៀត ដែលមកប្រជែងនឹងលោក McCarthy គឹលោក Jim Jordan តំណាងរាស្ត្រ រដ្ឋOhio។
ទោះយ៉ាងណាក៏ដោយ គិតមកត្រឹមពេលនេះ គឺគ្មានបេក្ខជនណា ដែលគេអាចសង្ឃឹមបានការគាំទ្រ លើសលោក Kevin McCarthy នោះទេ។ ការបោះឆ្នោត នឹងត្រូវរៀបចំធ្វើម្តងទៀតនៅថ្ងៃទី៤មករា។ បរិយាកាសនៅក្នុងសភា ប្រកបដោយការឈ្លោះប្រកែក បោះសំដីចំអកឡកលើយឲ្យគ្នា។ ក្រុមសមាជិកសភាមកពីបក្សប្រជាធិបតេយ្យ បាននាំគ្នាសើចចំអក ចំពោះមុខភាពរកាំរកូសបាក់បែកផ្ទៃក្នុងរបស់ក្រុមសមាជិកសភាបក្សសាធារណរដ្ឋ។ បក្សប្រជាធិបតេយ្យបានស្នើបេក្ខជនម្នាក់របស់ខ្លួនដែរ គឺលោក Hakeem Jeffries តំណាងរាស្ត្រមកពីរដ្ឋញូយ៉ក បើទោះបីជាគ្មានសង្ឃឹមថាបានសំឡេងឆ្នោតគ្រប់គ្រាន់។
សូមបញ្ជាក់ថា ការរាំងស្ទះមិនទាន់មានប្រធានសភាតំណាងនេះ អាចនឹងជះផលអាក្រក់ជាច្រើន ទៅលើដំណើរការនីតិធ្វើច្បាប់ផ្សេង តួយ៉ាងដូចជាច្បាប់ថវិកាជាតិ និងជាពិសេសនោះ គឺអាចប៉ះពាល់ទៅលើគណបក្សសាធារណៈរដ្ឋតែម្តង។ បក្សនេះបានប្តេជ្ញាថានឹងប្រើប្រាស់សភាតំណាង ដើម្បីបើកការស៊ើបអង្កេតជាច្រើនសំណុំរឿង វាយប្រហារលោកចូ បៃដិន។ ដរាបណាគ្មានប្រធានសភា គឺគ្មានអ្វីអាចសម្រេចចេញបានឡើយ។ សមាជិកសភាបក្សសាធារណរដ្ឋឈ្លោះប្រកែកគ្នា ក៏អាចជាការហុចដងកាំបិតទៅឲ្យលោកចូ បៃដិន ក៏ដូចជាបក្សប្រជាធិបតេយ្យដែរ សម្រាប់ការបោះឆ្នោតអាណត្តិថ្មី។
គួររំលឹកថា ក្នុងប្រវត្តិសាស្ត្រសហរដ្ឋអាមេរិក នេះជាលើកទីមួយគិតចាប់ពីឆ្នាំ១៩២៣មក ដែលការបោះឆ្នោតជ្រើសរើសប្រធានសភាតំណាង ជួបនូវបញ្ហារកាំរកូស បោះឆ្នោតច្រើនដងបែបនេះ។ កាលពីឆ្នាំ១៨៥៦ សមាជិកសភាអាមេរិក បានចំណាយពេលដល់ទៅ២ខែ និងបោះឆ្នោតចំនួន១៣៣ដង ទំរាំអាចសម្រេចរើសបានប្រធានសភាតំណាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ