បេសកកម្មអារតេមីស បានជោគជ័យ យានOrionត្រលប់មកដល់ផែនដីដោយសុវត្ថិភាព
បន្ទាប់ពី ស្ថិតនៅក្នុងអវកាស និងធ្វើដំណើរហោះជុំវិញព្រះចន្ទ អស់រយៈពេលជាង២៥ថ្ងៃ មក យាន Orion បានធ្វើដំណើរត្រឡប់មកផែនដីវិញ នៅថ្ងៃអាទិត្យទី ១១ធ្នូ ដោយបានទម្លាក់ខ្លួនទៅក្នុងមហាសមុទ្រប៉ាស៊ីហ្វិក ដោយសុវត្ថិភាព។ ដំណើរវិលត្រលប់មកផែនដីវិញ ជាដំណាក់កាលចុងក្រោយនៃបេសកកម្ម។ ជោគជ័យដូចការរំពឹងទុកនេះ ជាសារបញ្ជាក់ថា នឹងមានមនុស្សត្រលប់ទៅជាន់ដីព្រះចន្ទ ជាថ្មី នៅឆ្នាំខាងមុខ។
ចុះផ្សាយនៅថ្ងៃ៖
យានOrion ដែលគ្មានផ្ទុកអវកាសយានិក សម្រាប់បេសកកម្មហោះហើរសាកល្បងនេះ បានត្រលប់មកចូលក្នុងបរិយាកាសផែនដី ក្នុងល្បឿន៤០០០០គីឡូម៉ែត្រ ហើយដោយស៊ូបាននឹងកម្តៅសីតុណ្ហភាព ២៨០០អង្សា។ ដោយប្រើឆ័ត្រយោងបន្តបន្ទាប់គ្នា យ៉ាងហោច១១ ជាហ្វាំងទប់កុំឱ្យយានធ្លាក់តាមទំហឹងនៃទំនាញផែនដី Orion បានមកប៉ះផ្ទៃទឹកសមុទ្ទក្នុងល្បឿន៣០គីឡូម៉ែត្រក្នុងមួយម៉ោង ពោលគឺយានទម្លាក់ខ្លួនបានយ៉ាងល្អឥតខ្ចោះ និងគ្មានការខូចខាតអ្វីធំដុំគួរឱ្យកត់សម្គាល់ទេ។ នេះបើតាមប្រសាសន៍អបអររបស់លោកស្រី Melissa Jones អ្នកទទួលបន្ទុកគ្រប់គ្រងដំណើរវិលត្រលប់របស់យាន។
ក្រោយពីទុកយានក្នុងទឹកអស់ជាច្រើនម៉ោង ដែលវែងជាងពេលមានមនុស្សជិះក្នុងយាន ដើម្បីតាមដានមើលសីតុណ្ហភាពខាងក្នុងយានមក ក្រុមអ្នកមុជទឹកបានចូលទៅចងអូសយានឡើងលើនាវាទ័ពអាមេរិក USS Portland។ ប្រតិបត្តិការបានប្រព្រឹត្តទៅរយៈពេលប្រមាណពី៤ទៅ៦ម៉ោង។
នេះជាជោគជ័យដ៏សំខាន់សម្រាប់ណាសា ដែលបានចំណាយវិនិយោគរបស់រាប់ពាន់លានដុល្លាររៀបចំបេសកកម្មអារតេមីស ដើម្បីសម្រេចកម្មវត្ថុនាំមនុស្សឡើងឋានព្រះចន្ទ រួចភពអង្គារ នៅថ្ងៃអនាគត។
កម្មវត្ថុចម្បងនៃបេសកកម្មអារតេមីស១ គឺធ្វើតេស្តមើលភាពធន់នឹងកម្តៅសីតុណ្ហភាពនៃសំបកយានដែលសង់ជាលើកទីមួយក្នុងកម្រាសដល់ទៅ៥ម៉ែត្រ។ ក្នុងបេសកកម្មនេះ យានបានធ្វើដំណើរសរុបចម្ងាយជាង២២០០លានគីឡូម៉ែត្រ ហើយOrion បានហោះព័ទ្ធជុំវិញព្រះចន្ទតែ១៣០គីឡូម៉ែត្រពីផ្ទៃព្រះចន្ទប៉ុណ្ណោះ។ មានន័យថា យានបានហោះហើរទៅឆ្ងាយពី ផែនដី ដល់ទៅជាង៤៣០០០០គីឡូម៉ែត្រ ពោលគឺពុំធ្លាប់មានយានដឹកមនុស្សអាចធ្វើដំណើរបានឆ្ងាយជាងនេះទេ ពីមុនមក។
យានOrion ត្រលប់មកវិញ ដោយពាំនាំមកនូវជាទិន្នន័យព័ត៌មានជាអនេកសម្រាប់បេសកកម្មក្រោយៗ ខ្លះសម្រាប់បេសកកម្មអារតេមីស២ ដែលត្រៀមបានច្រើនខ្លាំងហើយ។ តាមគម្រោង អារតេមីស២ ដែលមានផ្ទុកអវកាសយានិកផង នឹងប្រព្រឹត្តទៅនៅឆ្នាំ២០២៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ