អាមេរិកហាមឃាត់ការនាំចូលនិងលក់គ្រឿងបរិក្ខារទូរគមនាគមន៍របស់ក្រុមហ៊ុនចិន
ថ្ងៃសុក្រ មន្ទីរទទួលបន្ទុកខាងទូរគមនាគមន៍សហរដ្ឋអាមេរិក បានចេញសេចក្តីប្រកាសជាផ្លូវការ ហាមឃាត់ការនាំចូល និង លក់គ្រឿងបរិក្ខារ ហើយនិងទទួលសេវាកម្មទូរគមនាគមន៍របស់ក្រុមហ៊ុនចិន។ បំរាមនេះ គឺឋិតក្នុងហេតុផលនៃការគំរាមកំហែងដល់សន្តិជាតិ។ សេចក្តីសម្រេចរបស់សហរដ្ឋអាមេរិកនេះ គឺស្រដៀងគ្នា និង ចេញមកក្នុងពេលដំណាលគ្នានឹងការសម្រេចរបស់រដ្ឋបាភិបាលអង់គ្លេស ជាសម្ព័ន្ធមិត្តដែរ។
ចុះផ្សាយនៅថ្ងៃ៖
ស្តាប់ - ០២:២៤
ក្រឹត្យហាមឃាត់របស់ និយតកទទួលបន្ទុកខាងទូរគមនាគមន៍សហរដ្ឋអាមេរិក គឺប៉ះពាល់ទៅក្រុមហ៊ុនទូរសព្ទ និងក្រុមហ៊ុនខាងបំពាក់កាមេរ៉ាសុវត្ថិភាព ប្រមាណជាបួនដប់ ក្រុមហ៊ុននិងសហគ្រាសធំៗរបស់ចិន ដែលកំពុងចរាចររកស៊ីនៅសហរដ្ឋអាមេរិក។ ក្រុមហ៊ុនចិនទាំងនោះ មានបែបយ៉ាង Huawei , ZTE , Hytera communications, Dahua Technology និង Hangzhou Hikvision Digital Technology ជាដើម។
ប្រធានផ្នែកទូរគមនាគមន៍សហរដ្ឋអាមេរិក អ្នកស្រី Jessica Rosenworcel បានបញ្ជាក់នៅក្នុងសេចក្តីថ្លែងការណ៍មួយថា កំហិតកំណត់របស់បំរាមរដ្ឋអាមេរិកនេះ គឺជាសកម្មភាពដ៏សំខាន់ចាំបាច់ខ្លាំងណាស់ ដើម្បីការពារពលរដ្ឋអាមេរិក ទប់ទល់នឹងការគំរាមកំហែងផ្នែកសន្តិសុខជាតិ បង្កពីឧបករណ៍ទូរគមនាគមន៍បរទេស។
ការរិះគិតគន់គូរពិចារណា ថាត្រូវហាមឃាត់គ្រឿងបច្ចេកវិជ្ជាទូរគមនាគមន៍របស់ចិន គឺជាគោលការណ៍យ៉ាងដាច់ណាត់របស់រដ្ឋបាលអាមេរិក ក្រោមប្រធានាធិបតីចាស់ លោក ដូណាល់ ត្រាំ។ កាលណោះ ចំណាត់ការប្រឆាំងនឹងការលួចស៊ើបការណ៍តាមប្រព័ន្ធបច្ចេកវិជ្ជាគឺប៉ះធ្ងន់ទៅលើក្រុមហ៊ុនទូរសព្ទ Huawei ដែលស្ទើរតែត្រូវបាត់មុខពីទីផ្សារអាមេរិក ចាប់ពីខែមេសា ឆ្នាំ២០២០។ នៅខែមីនា ២០២១ និយតកទូរគមនាគមន៍អាមេរិក កត់ឈ្មោះក្រុមហ៊ុនទូរគមនាគមន៍ចិន មួយចំនួនទៀត ដាក់ចូលបញ្ជីខ្មៅ ដែលអាមេរិកយល់ថា អាចមានហានិភ័យខ្ពស់ចំពោះសន្តិសុខជាតិអាមេរិក។
ស្រដៀងគ្នានឹងចំណាត់ការរបស់រដ្ឋបាលក្រុងវ៉ាស៊ីនតោន នៅពេលនេះ គឺ រដ្ឋបាលទីក្រុងឡុងដ្រ៍ របស់អង់គ្លេស ក៏បានចេញបញ្ជាក្នុងសប្តាហ៍នេះ ប្រាប់ទៅក្រសួង-មន្ទីរទាំងអស់ក្រោមឱវាទរបស់ខ្លួន ថាត្រូវឈប់ដាក់កាមេរ៉ាសុវត្ថិភាព ផលិតដោយក្រុមហ៊ុនចិន នៅតាមទីតាំងសំខាន់ៗ ពីព្រោះបារម្ភខ្លាចមានពាក់ព័ន្ធនឹងប្រព័ន្ធស៊ើបការណ៍សម្ងាត់ បម្រើប្រយោជន៍ដល់រដ្ឋាភិបាលកុម្មុយនិស្តចិន និងគំរាមកំហែងប៉ះពាល់ដល់សន្តិសុខជាតិអង់គ្លេស។
ក្នុងបរិបទប្រកួតប្រជែងឥទ្ធិពលគ្នានៃពិភពលោកពហុប៉ុល, បញ្ហាគ្រឿងបច្ចេកវិជ្ជាស៊ើបការណ៍សម្ងាត់ ដែលប្រទេសបច្ចិមលោក ចោទប្រកាន់ចិន គឺ ពុំមែនជារឿងថ្មីទេ ដែលចេះតែបន្តវិលមកបង្កភាពតានតឹង រវាង ចិន និង លោកខាងលិច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ