អ៊ុយក្រែន៖លោកហ្សេឡេនស្គីបរិហារពីឧក្រិដ្ឋកម្មប្រឆាំងមនុស្សជាតិរបស់រុស្ស៊ីនៅក្រុមប្រឹក្សាសន្តិសុខ
សង្រ្គាមរុស្ស៊ីឈ្លានពានអ៊ុយក្រែនបានឈានចូលដល់ ៩ខែគត់នៅថ្ងៃព្រហស្បតិ៍ ទី២៤ វិច្ឆិកានេះ។ កងទ័ពរុស្ស៊ីបានបន្តបាញ់មីស៊ីល និងដ្រូនសំដៅលើហេដ្ឋារចនាសម្ព័ន្ធថាមពលនៅក្នុងទីក្រុងធំៗជាច្រើនរបស់អ៊ុយក្រែននៅទូទាំងប្រទេស។ ទង្វើមួយនេះរបស់រស្ស៊ីត្រូវបានប្រធានាធិបតីអ៊ុយក្រែនលោកហ្សេឡេនស្គីបរិហារជាឧក្រិដ្ឋកម្មប្រឆាំងមនុស្សជាតិនៅពេលថ្លែងតាមវីដេអូទៅកាន់ក្រុមប្រឹក្សាសន្តិសុខនាថ្ងៃពុធ ទី២៣ វិច្ឆិកា។ បន្ទាប់មក លោកហ្សេឡេនស្គីបានទាមទារឲ្យក្រុមប្រឹក្សាសន្តិសុខចាត់វិធានការដើម្បីបិទបញ្ចប់ការវាយប្រហាររបៀបនេះរបស់រុស្ស៊ី។
ចុះផ្សាយនៅថ្ងៃ៖
ស្តាប់ - ០២:១៥
នៅក្នុងបទអន្តរាគមន៍តាមវីដេអូរយៈពេលខ្លីនៅមុខក្រុមប្រឹក្សាសន្តិសុខអង្គការសហប្រជាជាតិ ប្រធានាធិបតីអ៊ុយក្រែនលោកហ្សេឡេនស្គីបានលើកឡើងពីសីតុណ្ហភាពក្រោមសូន្យ និងមានប្រជាជនអ៊ុយក្រែនជាច្រើនលាននាក់គ្មានភ្លើងអគ្គិសនី មិនអាចប្រើម៉ាស៊ីនកម្តៅបាន និងគ្មានទឹកស្អាតប្រើប្រាស់។ នេះក៏ដោយសារតែរុស្ស៊ីបានបាញ់មីស៊ីលសំដៅកម្ទេចហេដ្ឋារចនាសម្ព័ន្ធថាមពលនៅតាមទីក្រុងធំៗជាច្រើនរបស់អ៊ុយក្រែន ក្នុងនោះក៏មានទីក្រុងកៀវមួយដែរ។ តាមលោកហ្សេឡេនស្គី រុស្ស៊ីបានបាញ់មីស៊ីលចំនួន ៧០គ្រាប់ស្រោចលើអ៊ុយក្រែនក្នុងថ្ងៃពុធ ទី២៣ វិច្ឆិកា។
ទង្វើរបៀបនេះរបស់រុស្ស៊ីត្រូវបានលោកហ្សេឡេនស្គីបរិហារជាឧក្រិដ្ឋកម្មប្រឆាំងមនុស្សជាតិ និងបានទាមទារឲ្យក្រុមប្រឹក្សាសន្តិសុខចាត់វិធានការជាបន្ទាន់។ តាមប្រធានាធិបតីអ៊ុយក្រែនរូបនេះដដែល សហគមន៍អន្តរជាតិមិនអាចក្លាយជាចំណាប់ខ្មាំងរបស់រដ្ឋភេរវនិយមអន្តរជាតិបានឡើយ។ នៅត្រង់ចំណុចនេះ លោកហ្សេឡេនស្គីចង់និយាយសំដៅលើសិទ្ធិវេតូដែលរុស្ស៊ីប្រើដើម្បីខ្ទប់លើសេចក្តីសម្រេចថ្កោលទោសការឈ្លានពានរបស់រុស្ស៊ីនៅអ៊ុយក្រែន។ ឯកអគ្គរដ្ឋទូតអាមេរិកប្រចាំអង្គការសហប្រជាជាតិលោកស្រីលីនដា ថូម៉ាស់គ្រីនហ្វៀលដ៍បានយល់ឃើញថា ប្រធានាធិបតីរុស្ស៊ីពូទីនកំពុងប្រើរដូវរងារជាអាវុធដើម្បីធ្វើបាបប្រជាជនអ៊ុយក្រែន។
ចំណែកឯកអគ្គរដ្ឋទូតបារាំងប្រចាំអង្គការសហប្រជាជាតិលោកនីកូឡា រីវីយែរបានចាត់ទុកការវាយប្រហាររបស់រុស្ស៊ីលើហេដ្ឋរចនាសម្ព័ន្ធថាមពលអ៊ុយក្រែនថាជាការបំពានច្បាប់មនុស្សធម៌អន្តរជាតិ។ ចំណែកឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិលោកវ៉ាស៊ីលី ណេបេនហ្សាបានឆ្លើយតបវិញថា ការអនុញ្ញាតឲ្យលោកហ្សេឡេនស្គីថ្លែងនៅមុខក្រុមប្រឹក្សាសន្តិសុខជារឿងផ្ទុយនឹងច្បាប់ និងថា ការខូចខាតហេដ្ឋារចនាសម្ព័ន្ធថាមពលអ៊ុយក្រែនបានបង្កឡើងដោយការបាញ់មីស៊ីលចេញពីប្រព័ន្ធការពារដែនអាកាសអ៊ុយក្រែន។ នៅក្នុងន័យនេះ លោកណេបេនហ្សាបានស្នើឲ្យបស្ចិមលោកឈប់ផ្តល់ប្រព័ន្ធការពារដែនអាកាសរបៀបនេះឲ្យអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ