អាមេរិកបង្កើនវត្តមាននិងបង្ហាញយុទ្ធសាស្ត្រថ្មី សម្រាប់តំបន់កោះប៉ាស៊ីហ្វីក
សហរដ្ឋអាមេរិកបានប្រកាសនៅល្ងាចថ្ងៃព្រហស្បតិ៍ទី ២៩កញ្ញា ផ្តល់មូលនិធិចំនួន ៨១០លានដុល្លារ សម្រាប់ជួយក្រុមប្រទេសកូនកោះនៅក្នុងមហាសមុទ្ទប៉ាស៊ីហ្វិកខាងត្បូង។ ជាងនេះទៅទៀត ក្នុងបរិបទប្រជែងនឹងចិន អាមេរិកប្រកាសបង្កើនវត្តមានការទូត បង្កើនទំនាក់ទំនងជាមួយតំបន់កូនកោះប្រកបដោយយុទ្ធសាស្ត្រក្នុងមហាសមុទ្ទប៉ាស៊ីហ្វិក។
ចុះផ្សាយនៅថ្ងៃ៖
ស្តាប់ - ០១:៥៩
៦០០លាន មានទម្រង់ជាជំនួយរយៈពេល១០ឆ្នាំ សម្រាប់សម្អាតទឹកសមុទ្ទពុល ដើម្បីទ្រទ្រង់វិស័យនេសាទត្រីតុង។ នេះបើតាមសេតវិមាន។ ជាមួយនឹងការប្រកាសចាត់ទុកជំនួបកំពូល នៃក្រុមប្រទេសកូនកោះ ក្នុងមហាសមុទ្ទប៉ាស៊ីហ្វិកនៅទីក្រុងវ៉ាស៊ីនតោន ជាលើកដំបូង ថា “ជាប្រវត្តិសាស្ត្រ” លោកប្រធានាធិបតីអាមេរិកចូបៃដិន បានបញ្ជាក់នៅចំពោះមេដឹកនាំប្រទេសកូនកោះចំនួន១២ អំពីយុទ្ធសាស្ត្រថ្មីអាមេរិក។
អាមេរិកនឹងប្រកាសទទួលស្គាល់កោះCook និង Niue ដែនដីស្វ័យតដែលមាននយោបាយការទូត ការពារជាតិ និងនយោបាយរូបិយវត្ថុជាប់នឹងប្រទេសនូវែលហ្សេឡង់។ ជាងនេះទៅទៀត អាមេរិកនឹងបង្កើនវត្តមានការទូត លើកោះទាំងពីរ ដែលមានប្រជាជនសរុបប្រមាណ២ម៉ឺននាក់មែន តែជាតំបន់សេដ្ឋកិច្ចដ៏សំខាន់ប្រចាំតំបន់ប៉ាស៊ីហ្វិកខាងត្បូង។ ជាលើកទីមួយ សហរដ្ឋអាមេរិកសម្រេចតែងតាំងឱ្យមានឯកអគ្គរដ្ឋទូតអាមេរិកប្រចាំវេទិកាកោះប៉ាស៊ីហ្វិក ព្រមទាំងបើកទូតនៅប្រទេសកោះតុងហ្កា និងកោះគីរីបាទីទៀត។ កាលពីពេលថ្មីៗនេះ អាមេរិកបានប្រកាសរួចហើយ អំពីការបើកស្ថានទូតអាមេរិកឡើងវិញនៅលើកោះសាឡូម៉ុង ដែលចិនមានវត្តមានយ៉ាងសកម្មខ្លាំង។
ថ្វីបើនៅក្នុងជំនួបកំពូល គ្រប់ភាគីប្រយ័ត្នមាត់ប្រយ័ត្នកមិននិយាយចេញឈ្មោះចិនដោយចំហមែន ប៉ុន្តែកម្មវត្ថុចម្បងនៃជំនួបនេះ គឺរឹតចំណងទំនាក់ទំនងជាមួយតំបន់កូនកោះប៉ាស៊ីហ្វិក ដែលធ្លាប់មានប្រវត្តិស្និទ្ធស្នាលនឹងអាមេរិកតាំងពីសង្គ្រាមលោកលើកទីពីរមក តែទើបត្រូវបានចិនច្រិបយកចំណែកកាន់តែធំឡើងៗ ជាពិសេសនៅកោះសាឡូម៉ុង តាមរយៈការបោះទុនវិនិយោគនិងការជួយបំពាក់បំប៉នកងកម្លាំងសន្តិសុខ។ នាឱកាសនេះ អាមេរិកបានប្រកាសផ្តល់ជំនួយឧបត្ថម្ភ២០លានដុល្លារដល់កោះសូឡូម៉ុង សម្រាប់ទ្រង់ទ្រង់វិស័យទេសចរណ៍និងព្រៃឈើ។
ក្រៅអំពីបង្កើនវត្តមានការទូតនិងពង្រឹងទំនាក់ទំនង អាមេរិកប្តេជ្ញាជួយគាំទ្រវិស័យអាកាសធាតុ ព្រោះប្រទេសកូនកោះខ្លះកំពុងប្រឈមនឹងគ្រោះលិចបាត់ដោយហេតុតែការប្រែប្រួលអាកាសធាតុបានធ្វើឱ្យទឹកសមុទ្ទឡើងកម្ពស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ