ការវាយប្រហារនៅកាណាដា ៖ ជនសង្ស័យទី១ស្លាប់ ជនទីពីរកំពុងរត់គេចខ្លួន
ជាការវាយប្រហារមរណៈដ៏ធ្ងន់ធ្ងរបំផុតមួយរបស់កាណាដា។ ហេតុការណ៍បានកើតឡើងនៅថ្ងៃអាទិត្យទី ៤កញ្ញា នៅក្នុងក្រុងដាច់ស្រយាលពីរ នៃខេត្តសាស្កាឆេវ៉ាន់ Saskatchewan ដែលស្ថិតនៅភាគកណ្តាលឆៀងខាងលិចប្រទេសកាណាដា។ មានស្លាប់១០នាក់ និងរបួស១៨នាក់ ក្នុងនោះបួននាក់ជារបួសធ្ងន់ខ្លាំង។ នេះបើតាមតួលេខផ្តល់ដោយប៉ូលិសកាណាដាដែលបានប្រកាសនៅល្ងាចថ្ងៃចន្ទទី ៥កញ្ញា ថារកឃើញសាកសពជនសង្ស័យទីមួយ ហើយកំពុងបន្តតាមរកជនសង្ស័យទីពីរ។
ចុះផ្សាយនៅថ្ងៃ៖
ស្តាប់ - ០២:០៩
ប៉ូលិសបានរកឃើញសាកសពជនសង្ស័យទីមួយ តែនៅមានសំណួរនិងចម្ងល់ជាច្រើន បន្តចោទឡើង។ ក្រោយហេតុការណ៍វាយប្រហារនៅថ្ងៃអាទិត្យទី ៤កញ្ញា ជនសង្ស័យទីមួយអាយុ៣១ឆ្នាំ ឈ្មោះ Damien Sanderson ទំនងត្រូវជាបងប្រុសរបស់ជនសង្ស័យទីពីរ បានស្លាប់ ដោយមានស្នាមរបួសជាច្រើន និងចោលសាកសពនៅម្តុំវាលស្មៅក្បែរផ្ទះអ្នកភូមិ។ ស្នងការរងនៃកងនគរបាលកាណាដា លោក Rhonda Blackmore សង្ស័យថាជនសង្ស័យទីមួយនេះទំនងស្លាប់ដោយស្នាដៃរបស់ប្អូនប្រុស ដែលកំពុងរត់គេចខ្លួននៅឡើយ។
តាំងពីថ្ងៃអាទិត្យមក ប៉ូលិសកាណាដារាប់រយនាក់ ប្រញឹកតាមស្វែងរកចាប់ខ្លួនជនសង្ស័យទីពីរ Myles Sanderson នៅតំបន់វាលរាបដ៏ធំទូលាយរបស់ខេត្ត។ ចាត់ទុកជាជនដ៏គ្រោះថ្នាក់ ប្រដាប់ដោយអាវុធផង ជនសង្ស័យទីពីរ អាយុ៣០ឆ្នាំ ក៏ទំនងជាត្រូវរបួស និងត្រូវការព្យាបាលដែរ។ នេះបើតាមការអះអាងរបស់ប៉ូលិសកាណាដាដដែល ដែលបានលម្អិតថា បានតាមស្វែងរកចាប់ខ្លួនជនសង្ស័យរូបនេះតាំងពីខែឧសភាមក ពីបទមិនគោរពសាលក្រមតុលាការដែលដាក់ទោសឱ្យជាប់ពន្ធនាគារជិត៥ឆ្នាំក្នុងបទធ្វើចោរលួច។
គេនៅមិនទាន់អាចពន្យល់អំពីមូលហេតុដែលនាំឱ្យបងប្អូនត្រកូលSanderson ប្រព្រឹត្តទង្វើសម្លាប់មនុស្សទេ ប៉ុន្តែបើតាមប៉ូលិស ជនសង្ស័យទាំងពីរ ដៅវាយប្រហារលើរងគ្រោះខ្លះ និងខ្លះទៀតជាការវាយប្រហារដោយចៃដន្យ។ ជនរងគ្រោះភាគច្រើនជាជនជាតិដើមភាគតិច។ តំណាងឱ្យប្រមាណ៥%នៃប្រជាពលរដ្ឋកាណាដាសរុបទាំង ៣៨លាននាក់ ជនជាតិដើមភាគតិច ច្រើនរស់នៅ ផ្តុំគ្នាជាសហគមន៍ និងក្រីក្រខ្លាំង ហើយគ្មានការងារធ្វើទេ។
នាយករដ្ឋមន្ត្រីកាណាដា លោក ទ្រូដូ បានសម្តែងការសោកស្តាយដែលមិនគួរណាប្រទេសត្រូវរងការវាយប្រហារហិង្សា ញឹកញយបែបនេះសោះ។ កាលពីខែមេសា២០២០ ខ្មាន់កាំភ្លើងម្នាក់ បន្លំធ្វើជាប៉ូលិសបាញ់លើហ្វូងមហាជនសម្លាប់មនុស្សអស់២២នាក់។ ៧នាក់ កាលពីឆ្នាំ២០១៧ ក្នុងការវាយប្រហារនៅវិហារអ៊ីស្លាមនៅកេប៉ិច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ