លោកដូណាល់ ត្រាំវាយបក និងចោទលោកចូ បៃដិនថា ជាសត្រូវរបស់រដ្ឋ
នៅអាមេរិក សង្រ្គាមពាក្យសំដីកំពុងបន្តមានយ៉ាងផុសផុលរវាងអតីតប្រធានាធិបតី លោកដូណាល់ ត្រាំ និងប្រធានាធិបតីកាន់អំណាច លោកចូ បៃដិន។ ថ្លែងទៅកាន់អ្នកគាំទ្រ នៅក្នុងយុទ្ធនាការឃោសនាបោះឆ្នោត ព្រឹទ្ធសភាពាក់កណ្តាលអាណត្តិ កាលពីថ្ងៃសៅរ៍ម្សិលមិញ លោកដូណាល់ ត្រាំបានចោទលោកចូ បៃដិន ថា ជាសត្រូវរបស់រដ្ឋ នៅបន្ទាប់ពី លោកចូ បៃដិនបានពណ៌នាលោកដូណាល់ ត្រាំ និងបក្សពួកថា ជាក្រុមជ្រុលនិយម ដែលគំរាមកំហែងមូលដ្ឋានគ្រឹះរបស់សាធារណរដ្ឋ។ លោកដូណាល់ ត្រាំ ចេញមុខវាយប្រហារលោកប្រធានាធិបតី ចូ បៃដិន នៅ២សប្តាហ៍ក្រោយ ដែលក្រុមប៉ូលិសFBI ចូលទៅឆែកឆេរ និងរឹបអូសយកបានកេសឯកសារសម្ងាត់ជាតិ ជាច្រើនកេស នៅផ្ទះឯកជនរបស់លោកដូណាល់ ត្រាំ។
ចុះផ្សាយនៅថ្ងៃ៖
ស្តាប់ - ០២:១៧
លេចមុខជាលើកទី១ នៅក្រោយប៉ូលិស FBI ចុះឆែកឆេរ និងរឹបអូសយកកេសឯកសារសម្ងាត់ជាតិ នៅគេហដ្ឋានរបស់លោកក្នុងរដ្ឋFlorida អតីតប្រធានាធិបតីអាមេរិក លោកដូណាល់ ត្រាំ បានរិះគន់ឥតសំចៃ លោកប្រធានាធិបតី ចូ បៃដិន ថា បានរំលោភអំណាច ប្រើប៉ូលិសFBI ជាឧបករណ៍ ប្រឆាំងរូបលោក។
ថ្លែងនៅចំពោះមុខអ្នកគាំទ្រ របស់លោក រាប់ពាន់នាក់ នៅក្នុងយុទ្ធនាការឃោសនារបស់បេក្ខជនបក្សសាធារណរដ្ឋ សម្រាប់ការបោះឆ្នោត សភា ពាក់កណ្តាលអាណត្តិ នៅរដ្ឋPennsylvanie(ផេនស៊ីលវ៉ានី) លោកដូណាល់ ត្រាំស្រែកក្តែងៗថា គឺលោកចូ បៃដិនដែលជាសត្រូវរបស់រដ្ឋ។ លោកដូណាល់ត្រាំ ចង់វាយបកទៅលោកចូ បៃដិន ដែលកាលពីប៉ុន្មានថ្ងៃមុនបាន ចោទប្រកាន់រូបលោក និងបក្ខពួក ជាក្រុមជ្រុលនិយមដែលគំរាមកំហែងមូលដ្ឋានគ្រឹះអាមេរិក។ នៅក្នុងមិទ្ទិញដើម្បី ជួយគាំទ្រ បេក្ខជនបក្សប្រជាធិបតេយ្យសម្រាប់ការបោះឆ្នោតសភា ពាក់កណ្តាលអាណត្តិដែលរៀបចំឡើងនៅរដ្ឋPhiladelphie លោកចូ បៃដិនបានអំពាវនាវឲ្យប្រជាជនស្រោចស្រង់ព្រលឹងអាមេរិក និងសំដែងក្តីខឹងសម្បារសម្រាប់អ្នកដែលមិនគោរពរដ្ឋធម្មនុញ្ញ និតិរដ្ឋ និងអ្នកមិនទទួលស្គាល់ឆន្ទៈ ការចង់បានរបស់ប្រជាជន។
សាររបស់លោកចូ បៃដិនចង់សំដៅលោកដូណាល់ ត្រាំ ដែលបានទាត់ចោលមិនទទួលស្គាល់លទ្ធផលចាញ់ឆ្នោតរបស់លោកកាលពី២ឆ្នាំមុន។ នៅថ្ងៃម្សិលមិញ លោកដូណាល់ ត្រាំ បានអះអាងសាជាថ្មីម្តងទៀត ថា គេបានលួចយកសន្លឹកឆ្នោត របស់លោក នៅក្នុងការបោះឆ្នោតប្រធានាធិបតី ឆ្នាំ ២០២០។
ក្រៅពីរិះគន់កម្មវិធីនយោបាយរបស់លោកចូ បៃដិន លោកដូណាល់ ត្រាំ ដែលមានគម្រោងចង់ឈរឈ្មោះជាបេក្ខជនប្រធានាធិបតី ឆ្នាំ ២០២៤ បានត្រលប់មកវាយបក ប្រតិបត្តិការចុះឆែកឆេររបស់ក្រុមFBIនៅគេហដ្ឋានរបស់លោក។ សម្រាប់លោកដូណាល់ ត្រាំ នោះជាទង្វើគួរឲ្យខ្មាស់អៀន និងរំលោភសិទ្ធិឯកជនយ៉ាងច្បាស់ក្រឡែត។
ប៉ូលិសFBI បានចូលឆែកឆេរ និងរឹបអូសយកបានកេសឯកសារសម្ងាត់ជាតិ ជាច្រើនកេស នៅគេហដ្ឋានរបស់លោក នៅរដ្ឋFlorida បន្ទាប់ពីមានការសង្ស័យថា លោកដូណាល់ត្រាំ រក្សាទុកដោយខុសច្បាប់ នូវឯកសារសម្ងាត់ជាតិ។ តាមក្រសួងយុត្តិធម៌អាមេរិក លោកដូណាល់ ត្រាំ ទំនងលាក់ទុក ឬបំផ្លាញ ឯកសារសម្ងាត់ជាតិមួយចំនួន ក្នុងគោលដៅ បំផ្លាញការស៊ើបអង្កេតរបស់អាជ្ញាធរអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ