WHO និង Unicef ទាញសញ្ញាអាសន្នពីការធ្លាក់ចុះនៃការចាក់វ៉ាក់សាំងលើកុមារដើម្បីបង្ការជំងឺផ្សេងៗ
នៅថ្ងៃព្រហស្បតិ៍ ទី១៤ កក្កដា អង្គការសុខភាពពិភពលោក WHO និងមូលនិធិសហប្រជាជាតិដើម្បីកុមារ Unicef បានចេញផ្សាយរបាយការណ៍មួយស្តីពីស្ថានភាពនៃការចាក់វ៉ាក់សាំងបង្ការជំងឺផ្សេងៗលើកុមារ។ WHO និង Unicef បានទាញសញ្ញាអាសន្ននៅក្នុងរបាយការណ៍ថា ការចាក់វ៉ាក់សាំងលើកុមារដើម្បីបង្ការជំងឺផ្សេងៗបានធ្លាក់យ៉ាងខ្លាំង និងកំពុងបន្តធ្លាក់ចុះក្នុងរយៈពេល ៣ទសវត្សរ៍កន្លងទៅនេះ។ មូលហេតុត្រូវបាន WHO និង Unicef ទម្លាក់កំហុសលើវិបត្តិកូវីដ១៩ ឬកំណើនព័ត៌មានក្លែងក្លាយ។
ចុះផ្សាយនៅថ្ងៃ៖
ស្តាប់ - ០២:៣៤
មានជំងឺចំនួន ៣ប្រភេទដែល WHO និង Unicef បានលើកឡើង គឺជំងឺតេតាណុស ជំងឺគ្រុនស្វិតដៃជើង និងជំងឺខាន់ស្លាក់។ ដើម្បីអាចបង្ការជំងឺទាំង ៣ប្រភេទនេះបាន កុមារម្នាក់ៗត្រូវចាក់វ៉ាក់សាំងបង្ការសរុបឲ្យបានចំនួន ៣ដូស។ តែ WHO និង Unicef បានបញ្ជាក់នៅក្នុងរបាយការណ៍ថា សមាមាត្រនៃកុមារដែលបានទទួលវ៉ាក់សាំងបង្ការជំងឺទាំង ៣ប្រភេទបានធ្លាក់ចុះពី ៨៦% ក្នុងឆ្នាំ ២០១៩ មកនៅត្រឹមតែ ៨១% ក្នុងឆ្នាំ ២០២១។ តាមរបាយការណ៍ មានកុមារប្រមាណជា ២៥លាននាក់ក្នុងលោកខកខានមិនបានចាក់វ៉ាក់សាំងដូសទី១ ឬច្រើនដូសដើម្បីបង្ការជំងឺតេតាណុស ជំងឺគ្រុនស្វិតដៃជើង និងជំងឺខាន់ស្លាក់។
ក្នុងចំណោមកុមារទាំងប្រមាណជា ២៥លាននាក់ មាន ១៨លាននាក់មិនបានចាក់សោះ សូម្បីតែមួយដូស ក្នុងនោះ មានកុមារភាគច្រើនរស់នៅក្នុងប្រទេសដែលមានចំណូលមធ្យម ឬតិច ដូចជានៅឥណ្ឌា នីហ្សេរីយ៉ា ឥណ្ឌូណេស៊ី អេត្យូពី និងនៅហ្វីលីពីន។ របាយការណ៍ដដែលបានមើលឃើញថា ការធ្លាក់ចុះនៃការចាក់វ៉ាក់សាំងបង្ការបានបណ្តាលឲ្យផ្ទុះឡើងនូវជំងឺស្វិតដៃជើង និងជំងឺកញ្រ្ជិលនារយៈពេល ១២ខែចុងក្រោយនេះ។ ក្នុងឆ្នាំ ២០២១ មានកូនក្មេងជិត ២៥លាននាក់ខកខានមិនបានចាក់ដូសទី១ បង្ការជំងឺកញ្ជ្រិល ពោលមានជាង ៥លាននាក់បន្ថែមទៀតបើធៀបនឹងឆ្នាំ ២០១៩។
បន្ទាប់ក្នុងឆ្នាំ ២០២១ ដដែល មានកូនក្មេងជិត ១៥លាននាក់ខកខានមិនបានចាក់ដូសទី២ បង្ការជំងឺកញ្ជ្រិល។ តាម WHO និង Unicef ជម្លោះប្រដាប់អាវុធ កំណើនព័ត៌មានក្លែងក្លាយ បញ្ហាផ្គត់ផ្គង់ ឬមួយក៏ការផ្តោតលើការព្យាបាលជំងឺកូវីដ១៩ ជាមូលហេតុដែលបញ្ជាក់ពីការធ្លាក់ចុះនៃការចាក់វ៉ាក់សាំងបង្ការជំងឺផ្សេងៗលើកុមារ។ តាមអគ្គនាយិកា Unicef លោកស្រី Catherine Russell គេត្រូវរួសរាន់ចាក់វ៉ាក់សាំងលើកុមារដែលមិនទាន់បានចាក់ ឬចាក់មិនទាន់គ្រប់ដូស។ បើពុំនោះសោតទេ គេនឹងឃើញជំងឺឆ្លងរាតត្បាតកាន់តែច្រើន កូនក្មេងឈឺកាន់តែច្រើន ហើយប្រព័ន្ធសុខាភិបាលដែលកំពុងមមាញឹកស្រាប់នឹងទទួលសម្ពាធកាន់តែខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ