សាក្សីអះអាងថា ក្នុងព្រឹត្តិការណ៍៦មករា លោកត្រាំមានះចង់ទៅកាពីតូល និងបានបញ្ជាឲ្យគេដករនាំងត្រួតពិនិត្យអាវុធ
ការស៊ើបអង្កេតរបស់សភាអាមេរិក ទាក់ទិននឹងសំណុំរឿងព្រឹត្តិការណ៍វាយលុកវិមានកាពីតូល ថ្ងៃទី៦មករា២០២១ នៅមិនទាន់ចប់ទេ។ កាលពីថ្ងៃ២៨មិថុនា សាក្សីម្នាក់ដែលជាអតីតទីប្រឹក្សានាយកខុទ្ទកាល័យសេវិមានរបស់លោកដូណាល់ ត្រាំ បានរៀបរាប់ថា នៅថ្ងៃទី៦មករា លោកប្រធានាធិបតីដូណាល់ ត្រាំ បានបញ្ជាឲ្យគេដករនាំងត្រួតពិនិត្យអាវុធ ចេញពីកន្លែងជួបជុំនៅមុខសេតវិមាន ហើយព្រមទាំងបានចចេសមានះ ចង់បើករថយន្តទៅវិមានកាពីតូល ដោយខ្លួនឯងថែមទៀតផង។
ចុះផ្សាយនៅថ្ងៃ៖
ស្តាប់ - ០២:៤៦
សក្ខីកម្មរបស់លោកស្រី Cassidy Hutchinson អតីតទីប្រឹក្សាម្នាក់នៅសេតវិមាន ក្នុងអាណត្តិលោកដូណាល់ ត្រាំ ដែលបានឆ្លើយនៅមុខគណៈកម្មការសភាអាមេរិក បានធ្វើឲ្យគ្រប់គ្នា បញ្ឈរភ្នែក។ ការរៀបរាប់ ដែលបង្ហាញអំពីអាកប្បកិរិយាហិង្សា ពុះកញ្ជ្រោល គ្មានហេតុផល របស់លោកដូណាល់ ត្រាំ នៅក្នុងថ្ងៃទី៦មករា២០២១ ជាថ្ងៃដែលលោក បានហៅឲ្យក្រុមអ្នកគាំទ្រលោក សំរុកចូលទៅវិមានកាពីតូល។
លោកស្រី Cassidy Hutchinson បានអះអាងថា ព្រឹត្តិការណ៍ថ្ងៃទី៦មករា វិះតែនឹងក្លាយជាសោកនាដកម្មដ៏ធ្ងន់ធ្ងរណាស់ ប្រសិនបើមានការផ្ទុះអាវុធ។ សាក្សីរូបនេះ អះអាងថា នៅប៉ុន្មានម៉ោងមុនលោកដូណាល់ ត្រាំ ឡើងថ្លែងប្រកាសនៅទីលានមុខសេតវិមាន ចំពោះមុខហ្វូងមនុស្សដែលមកគាំទ្រលោក គឺលោកដូណាល់ ត្រាំ បានបញ្ជាទៅក្រុមមន្ត្រីសន្តិសុខ ថាត្រូវតែដកចោលនូវរនាំងត្រួតពិនិត្យអាវុធ ឈប់ត្រួតពិនិត្យអ្នកដែលមកចូលរួមតទៅទៀត។ លោកត្រាំបានស្រែកថា លោកមិនខ្វល់ទេ ថាមនុស្សទាំងនោះមានអាវុធមានកាំភ្លើងជាប់ខ្លួន ព្រោះពួកគេនឹងមិនធ្វើអីលោកទេ។
ជាងនេះទៀតសាក្សីដដែលបន្ថែមថា លោកដូណាល់ត្រាំ បានមានះ ស្រែកសំឡុតទៅកាន់អ្នកបើកឡានរបស់គាត់ ថាត្រូវតែជូនគាត់ទៅ កាន់វិមានកាពីតូលភ្លាម ព្រមពេលដែលក្រុមហ្វូងមនុស្សកំពុងតែសំរុកចូលទៅទីនោះ។ អ្នកបើកបរ និងក្រុមអង្គរក្សបានបដិសេធ លោកត្រាំ បានព្យាយាមទាញដៃចង្កូតឡាន ចង់បើកទៅដោយខ្លួនឯងថែមទៀតផង។
លោកស្រី Cassidy Hutchinson បានរំលឹកថា ប៉ុន្មានថ្ងៃក្រោយចេញលទ្ធផលឆ្នោត លោកដូណាល់ ត្រាំ មានអាកប្បកិរិយាកាន់តែហិង្សា ហើយព្យាយាមធ្វើគ្រប់យ៉ាង ដើម្បីអះអាងថាគាត់គឺជាអ្នកឈ្នះឆ្នោត។ នៅថ្ងៃទី១ធ្នូ២០២០ បន្ទាប់ពីបានឮលោក Bill Barr រដ្ឋមន្ត្រីក្រសួងយុត្តិធម៌ ក្នុងពេលនោះ បានឆ្លើយនៅក្នុងបទសម្ភាសន៍តាមទូរទស្សន៍ ថាគ្មានភស្តុតាងបញ្ជាក់ថាមានការក្លែងបន្លំសន្លឹកឆ្នោត ស្រាប់តែលោកដូណាល់ ត្រាំ ខឹងត្រឡោត បោកចានបែក ហើយជះទឹកប៉េងប៉ោះទៅលើជញ្ជាំងសេតវិមាន។
បន្ទាប់ពីបានដឹងនូវសំដីសក្ខីកម្មទាំងនេះ លោកដូណាល់ ត្រាំ បានឆ្លើយបដិសេធ នៅលើទំព័របណ្តាញសង្គម Truth Social របស់លោក ថាលោកស្រី Cassidy Hutchinson និយាយកុហក។ បណ្តាញព័ត៌មានអាមេរិក បានលើកឡើងថា គណៈកម្មការសភា អាចនឹងកោះហៅមន្ត្រីសន្តិសុខពិសេស ព្រមទាំងលោក Mark Meadows មកឆ្លើយបំភ្លឺ ទាក់ទិននឹងសំដីលើកឡើងរបស់លោកស្រី Cassidy Hutchinson។ គិតមកត្រឹមពេលនេះ គណៈកម្មការពិសេសសភាអាមេរិក បានហៅសាក្សីមកឆ្លើយចំនួន ប្រមាណ១០០០នាក់ហើយ ទាក់ទិននឹងព្រឹត្តិការវាយលុកចូលវិមានកាពីតូលថ្ងៃ៦មករា២០២១។ ព្រឹត្តិការណ៍ដែលមតិខ្លះនៅអាមេរិក ចាត់ទុកថាជាការប៉ុនប៉ងធ្វើរដ្ឋប្រហារ ពីសំណាក់លោកដូណាល់ ត្រាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ