លោកបៃដិននឹងជជែកតាមទូរស័ព្ទជាមួយលោកស៊ី ជីនពីង អំពីអ៊ុយក្រែន
ក្រោយពីបានចាត់ទុកលោកពូទីនជាឧក្រិដ្ឋជនសង្គ្រាម លោកប្រធានាធិបតីអាមេរិក ចូ បៃដិន នឹងជួបជជែកតាមទូរស័ព្ទជាមួយលោក ស៊ី ជីនពីង ប្រធានាធិបតីចិន នៅថ្ងៃ សុក្រទី ១៨ មីនា ដើម្បីពិភាក្សាអំពីសង្គ្រាមនៅអ៊ុយក្រែន។ នេះបើតាមសេចក្តី ជូនដំណឹងរបស់សេតវិមាន នៅថ្ងៃព្រហស្បតិ៍ទី១៧មីនា២០២២។
ចុះផ្សាយនៅថ្ងៃ៖
ស្តាប់ - ០២:១១
នៅក្នុងសេចក្តីថ្លែងការណ៍ អ្នកនាំពាក្យសេតវិមានបានអះអាង ជំនួបតាមទូរស័ព្ទរវាងប្រមុខរដ្ឋទាំងពីរ ជាការរក្សាចំណងទំនាក់ទំនងរវាងសហរដ្ឋអាមេរិកនិងសាធារណរដ្ឋប្រជាមានិតចិន។ នាឱកាសនោះ ប្រធានាធិបតីទាំងពីរ នឹងជជែកអំពីការប្រកួតប្រជែងគ្នាផង ព្រមទាំងផលប្រយោជន៍រួមរវាងអាមេរិកនិងចិនផង និងជាពិសេស អំពីសង្គ្រាមនៅអ៊ុយក្រែនតែម្តង។
តាំងពីរុស្ស៊ីផ្តើមប្រតិបត្តិការយោធាក្នុងប្រទេសអ៊ុយក្រែន នៅថ្ងៃទី ២៤កុម្ភៈមក របបកុម្មុយនិស្តចិន ជ្រើសរើសផ្តល់អាទិភាពដល់ទំនាក់ទំនងជាមួយមូស្គូ និងបង្ហាញគំនិតប្រឆាំងនឹងសហរដ្ឋអាមេរិក ដោយមិនជំរុញឱ្យលោកពូទីនដកកងទ័ពចេញពីអ៊ុយក្រែនទេ។ ចិនធ្លាប់ទាំងបានបន្ទោសអាមេរិកថាឃោសនាបំប៉ោងព័ត៌មានក្លែងក្លាយផង។ ប៉ុន្តែមិត្តភាពគ្មានព្រំដែនរបស់ចិនចំពោះរុស្ស៊ី កំពុងត្រូវប្រកួតប្រជែងនឹងសង្គ្រាមនៅអ៊ុយក្រែន។ រដ្ឋាភិបាលកុម្មុយនិស្តរបស់លោកស៊ីជីនពីង ហាក់ដូចភ្ញាក់ផ្អើលនឹងភាពក្រាញតស៊ូរបស់ពលរដ្ឋអ៊ុយក្រែន ប្រឈមនឹងកម្លាំងយោធារុស្ស៊ី និងទំហំនៃទណ្ឌកម្មរបស់ក្រុមលោកខាងលិចដាក់លើរុស្ស៊ី។
ជំនួបចូបៃដិន-ស៊ីជីនពីង ប្រព្រឹត្តទៅជួនចំពេលដែលស្ថានភាពឡើងតានតឹងខ្លាំង មានព័ត៌មានរសាត់តាមសារព័ត៌មានអាមេរិក ថារុស្ស៊ីទំនងជាបានស្នើសុំប៉េកាំង នូវជំនួយសេដ្ឋកិច្ច យោធា ដើម្បីបន្តសង្គ្រាមឈ្លានពានលើអ៊ុយក្រែន។ ក្រសួងការបរទេសអាមេរិក កំពុងតាមដានយ៉ាងល្អិតល្អន់បំផុត ថាតើចិនឬប្រទេសផ្សេងទៀត នឹងផ្គត់ផ្គង់ជំនួយ ជាសម្ភារៈបរិក្ខា ជំនួយសេដ្ឋកិច្ចឬហិរញ្ញវត្ថុ ដល់រុស្ស៊ីតាមវិធីណា។ សម្រាប់អាមេរិក ប៉េកាំងជាគន្លឹះដ៏សំខាន់អាចធ្វើឱ្យរុស្ស៊ីបិទបញ្ចប់អំពើហិង្សានៅអ៊ុយក្រែនបាន។ នេះបើតាមការយល់ឃើញរបស់អ្នកនាំពាក្យក្រសួងការបរទេសអាមេរិក លោក នេដ ប្រាយស៍ Ned Price។ សហរដ្ឋអាមេរិក ធ្លាប់បានសម្តែងការខ្វល់ខ្វាយ នឹងជំហររបស់ចិនដែលគាំទ្ររុស្ស៊ី ក្នុងសង្គ្រាមអ៊ុយក្រែនដែរ កាលពីជំនួបរយៈពេល៧ម៉ោង នៅទីក្រុងរ៉ូមប្រទេសអ៊ីតាលី រវាងលោក ជេក ស៊ូលីវ៉ាន់ Jake Sullivan ទីប្រឹក្សាសន្តិសុខជាតិអាមេរិក និងលោក យ៉ាង ចៀជី Yang Jiechi កាលពីថ្ងៃទី ១៤មីនា២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ