អាមេរិកលម្អិតការចោទប្រកាន់ថាការទាមទាររបស់ចិននៅសមុទ្រចិនខាងត្បូង ខុសច្បាប់
អាមេរិកបានច្រានចោទទាំងស្រុងហេតុផលប្រវត្តិសាស្ត្រ និងភូមិសាស្ត្រ នៃការទាមទាររបស់ចិន ចង់យកសមុទ្ទចិនខាងត្បូងតែម្នាក់ឯង។ សម្រាប់អាមេរិក ការទាមទាររបស់ចិន ជាការខុសច្បាប់។ នៅក្នុងរបាយការណ៍ចេញផ្សាយ នៅថ្ងៃពុធទី ១២មករា ២០២២សហរដ្ឋអាមេរិក បានផ្តល់ការវិភាគលម្អិត អំពីចំណុចដែលវ៉ាស៊ីនតោនយល់ថាខុសច្បាប់ផង។
ចុះផ្សាយនៅថ្ងៃ៖
ស្តាប់ - ០១:៥៩
នៅក្នុងឯកសារសិក្សាលេខថ្មី ក្រោមចំណងជើងថា "Limits in the Seas" ក្រសួងការបរទេសអាមេរិកបានធ្វើបច្ចុប្បន្នភាព បទវិភាគឆ្នាំ២០១៤ស្តីអំពីការទាមទារយកសមុទ្ទចិនខាងត្បូងរបស់ចិន។ កាលណោះ សហរដ្ឋអាមេរិកធ្លាប់បានបង្ហាញភាពសង្ស័យរួចទៅហើយ ថា គំនូសព័ទ្ធយកសមុទ្ទចិនខាងត្បូងជាដែនដីរបស់ខ្លួន ចំនួន ៩ ចំណុចនៅលើផែនទី(ចិន) មិនស្របច្បាប់ទេ។ តុលាការក្រុងឡាអេ ក៏បានចេញសាលក្រមកាលពីឆ្នាំ ២០១៦ ឆ្លើយតបនឹងបណ្តឹងរបស់ហ្វីលីពីន កាត់ក្តីឱ្យហ្វីលីពីនឈ្នះ ដោយពន្យល់ថាចិនគ្មានសិទ្ធិប្រវត្តិសាស្ត្រណាមួយលើតំបន់សមុទ្ទចិនខាងត្បូង ដែលប៉េកាំងបានគូសព័ទ្ធចុចៗ៩ចំណុចនោះឡើយ។
ដោយផ្អែកលើសេចក្តីសម្រេចរបស់តុលាការឡាអេ ក្រសួងការបរទេសអាមេរិកបានអះអាងនៅពេលនេះថា ការទាមទារអធិបតេយ្យជាតិ និងការគ្រប់គ្រងតំបន់សមុទ្ទចិនខាងត្បូងស្ទើរទាំងស្រុងរបស់ចិន ជាការខុសច្បាប់។ ការទាមទារនេះ ធ្វើឱ្យប៉ះពាល់ច្បាប់មហាសមុទ្ទនិងដល់វិធានសកលជាច្រើនផ្សេងទៀត នៃច្បាប់អន្តរជាតិ ដែលមានចែងក្នុងសន្ធិសញ្ញាអង្គការសហប្រជាជាតិ ស្តីពីច្បាប់សមុទ្ទ ឆ្នាំ១៩៨២។
ក្រសួងការបរទេសអាមេរិកបានផ្តល់ការវិភាគលម្អិតថា យកប្រវត្តិសាស្ត្រមកជាសំអាងដើម្បីបានគ្រប់គ្រងតំបន់ណាមួយក្នុងសមុទ្ទ ជាទង្វើខុសច្បាប់។ ការចាប់យកកោះណាមួយ ដែលលិចបាត់ពេលទឹកជោរ មកធ្វើជារបស់ផ្ទាល់ខ្លួន ដោយគ្មានមូលដ្ឋានភូមិសាស្ត្របញ្ជាក់ ក៏ជាការខុសច្បាប់ដែរ។ ដូច្នេះចិន គួរតែទាមទារអ្វីឱ្យស្របតាមច្បាប់អន្តរជាតិ ហើយគោរពសេចក្តីសម្រេចរបស់តុលាការ និងបញ្ឈប់រាល់គ្រប់សកម្មភាពខុសច្បាប់នៅក្នុងសមុទ្ទខាងត្បូង។ នេះជាសេចក្តីថ្លែងការណ៍របស់ក្រសួងការបរទេសអាមេរិក។
ក្រៅអំពីសំណុំរឿងតៃវ៉ាន់ ហុងកុង សិទ្ធិមនុស្ស និងពាណិជ្ជកម្ម សមុទ្ទចិនខាងត្បូង ក៏ជាប្រធានបទចំបងមួយដែលនាំឱ្យទំនាក់ទំនងវ៉ាស៊ីនតោននិងប៉េកាំងល្អក់កករដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ