សោកនាដកម្មបុករះសម្លាប់មនុស្សក្នុងក្បួនដង្ហែរណូអែលនៅសហរដ្ឋអាមេរិក
នៅសហរដ្ឋអាមេរិក ប៉ូលិសកំពុងស៊ើបអង្កេត ស្វែងរកមូលហេតុ នៅក្រោយ ហេតុការណ៍បើកឡានបុកសម្លាប់មនុស្ស នៅរដ្ឋWisconsin ភាគខាងជើងអាមេរិក។ នៅរសៀលថ្ងៃអាទិត្យទី ២១វិច្ឆិកា រថយន្ត ពណ៌ក្រហម ប្រភេទ SUV បានបើកសំដៅក្បួនដង្ហែរណូអែល ដោយបានបុកសម្លាប់មនុស្ស យ៉ាងតិច ៥នាក់ និងធ្វើឲ្យរបួស៤០នាក់ផ្សេងទៀត ដែលនៅក្នុងនោះភាគច្រើនជាកុមារ។ នេះបើតាមតួលេខចុងក្រោយរបស់ប៉ូលិសក្រុង Waukesha។
ចុះផ្សាយនៅថ្ងៃ៖
ស្តាប់ - ០២:០៤
នៅរដ្ឋWisconcin ភាគខាងជើងអាមេរិក រថយន្តមួយគ្រឿង បានបើកបុកទម្លាយរនាំង ចូលទៅក្នុងផ្លូវ ដែលកំពុងមានដង្ហែរក្បួនណូអែល កាលពីរសៀលថ្ងៃអាទិត្យ ក្នុងទីក្រុងWaukesha។ សាក្សីនៅកន្លែងកើតហេតុ បាននិយាយប្រាប់កាសែតក្នុងស្រុក ពីសំឡេងស្រែក របស់មនុស្ស នៅពេលរថយន្តពណ៌ក្រហមបើកក្នុងល្បឿនដ៏លឿន បុកអ្នកដើរក្នុងក្បួនដង្ហែរណូអែល ដែលមួយចំនួនជាសិស្សសាលា។ ភ្លាមៗ នៅក្រោយអន្តរាគមរបស់ឡានប៉ូលិស ឡានពេទ្យបានចូលទៅដឹកអ្នករបួសសំដៅមន្ទីរពេទ្យ។
នៅក្នុងសន្និសីទកាសែត នៅព្រឹកថ្ងៃចន្ទ ប្រធានប៉ូលិសក្រុងWaukesha លោកDan Thompson បាននិយាយថា មនុស្សយ៉ាងហោច ៥នាក់ស្លាប់ និងជាង៤០នាក់រងរបួស នៅក្នុងហេតុការណ៍ បើករថយន្តបុកមនុស្សកាលពីថ្ងៃអាទិត្យម្សិលមិញ។ នាយកដ្ឋានប៉ូលិសក្រុងបានបន្ថែមថា តួលេខជនរងគ្រោះនឹងអាចកើនឡើង ព្រោះប៉ូលិសកំពុងបន្តស្វែងរកព័ត៌មាននៅតាមមន្ទីរពេទ្យ។
តាមសេចក្តីថ្លែងការណ៍របស់នាយកដ្ឋានប៉ូលិសក្រុង Waukesha ប៉ូលិសបានបាញ់កាំភ្លើងជាច្រើនគ្រាប់ដើម្បីបញ្ឈប់រថយន្តរបស់ជនល្មើស ប៉ុន្តែ មិនបានបណ្តាលឲ្យមានអ្នករបួសម្នាក់ទេ។
រថយន្ត និងជនសង្ស័យម្នាក់ត្រូវបានប៉ូលិសចាប់ឃាត់ខ្លួនភ្លាមៗ នៅកន្លែងកើតហេតុ។ ប៉ូលិសមិនបានបង្ហាញអត្តសញ្ញាណរបស់ជនសង្ស័យ ហើយក៏មិនបានបញ្ជាក់ថា ហេតុការណ៍ នៅថ្ងៃម្សិលមិញ ជាទង្វើភេរវកម្មដែរ។ ប៉ុន្តែ មន្រ្តីស៊ើបអង្កេតម្នាក់បាននិយាយប្រាប់ទូរទស្សន៍អង់គ្លេស BBCថា ជនសង្ស័យទំនងបើករថយន្ត រត់គេចចេញពីហេតុការណ៍ណាមួយ មុននឹងជ្រុលមកបើកលើផ្លូវដែលកំពុងមានមនុស្សចូលរួមច្រើន ក្នុងក្បួនដង្ហែរណូអែលកាលពីថ្ងៃអាទិត្យ។
តាមប៉ូលិស សាលារៀនត្រូវបិទទ្វារនៅថ្ងៃចន្ទនេះ ចំណែកផ្លូវមួយចំនួនក្នុងតំបន់កើតហេតុ ត្រូវបន្តបិទខ្ទប់ ក្នុងអំឡុងពេលស៊ើបអង្កេត។
សេតវិមានបានអះអាងថា លោកប្រធានាធិបតីអាមេរិក ចូ បៃដិនបានទទួលព័ត៌មានដ៏លម្អិតស្តីពីហេតុការណ៍បើកឡានបុកសម្លាប់មនុស្សនៅរដ្ឋWisconsin និងកំពុងបន់ព្រះដើម្បីឲ្យជួយថែរក្សាជនរងគ្រោះដោយសារដោយសោកនាដកម្មកាលពីថ្ងៃអាទិត្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ