តុលាការអាមេរិក អនុញ្ញាតបើកចំហរឯកសារសេតវិមាន ដែលពាក់ព័ន្ធនឹងហេតុការណ៍នៅវិមានកាពីតូលថ្ងៃទី៦មករា
ចៅក្រមតុលាការអាមេរិកមួយ បានសម្រេចនៅថ្ងៃ៩វិច្ឆិកា អនុញ្ញាតឲ្យផ្ទេរឯកសារមួយចំនួន របស់សេតវិមាន ក្នុងជំនាន់លោកដូណាល់ ត្រាំ ទៅឲ្យគណកម្មការស៊ើបអង្កេតសភា ដែលកំពុងតែស៊ើបអង្កេត អំពីករណីវាយប្រហារនៅវិមានកាពីតូល កាលពីថ្ងៃទី៦មករា។ ហេតុការណ៍ថ្ងៃទី៦មករា ដែលក្រុមជ្រុលនិយមគាំទ្រលោកដូណាល់ ត្រាំ បានសម្រុកចូលទៅក្នុងវិមានកាពីតូល ដែលជាស្ថាប័នកំពូលនៃលទ្ធិប្រជាធិបតេយ្យអាមេរិក បន្ទាប់ពីលោកដូណាល់ ត្រាំ បានស្រែកប្រកូកប្រកាស ថាគេបានប្លន់ជ័យជំនះរបស់លោក។ លោក ដូណាល់ ត្រាំ បានព្យាយាមបិទខ្ទប់ រារាំង មិនឲ្យឯកសារទាំងនោះ ត្រូវបានបញ្ជូនទៅឲ្យគណកម្មការសភា ពិនិត្យទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
យោងតាមការចុះផ្សាយរបស់បណ្តាញព័ត៌មានអាមេរិក លោកស្រី Tanya Chutkan ចៅក្រម តុលាការរដ្ឋសហព័ន្ធ បានសម្រេចថា ដោយផ្អែកលើផលប្រយោជន៍សាធារណៈ គឺតុលាការសូមឆ្លើយយល់ព្រម ចំពោះសំណើរបស់គណកម្មការសភា ដែលបានស្នើសុំពិនិត្យឯកសារមួយចំនួន របស់រដ្ឋបាលលោកដូណាល់ ត្រាំ ដែលពាក់ព័ន្ធនឹងហេតុការណ៍ថ្ងៃទី៦មករា។
គួររំលឹកថា ឯកសារទាំងអស់នេះ ត្រូវក្រុមភាគីលោកដូណាល់ ត្រាំ ព្យាយាមរារាំង មិនឲ្យគណកម្មការសភា អាចពិនិត្យបានទេ ដោយអះអាងថាវាឯកសារសំងាត់ ផ្ទៃក្នុងរបស់រដ្ឋាភិបាល។ មេធាវី របស់លោកដូណាល់ ត្រាំ បានបញ្ជាក់ថា គេនឹងដាក់ពាក្យប្តឹងឧទ្ធរណ៍ ចំពោះសេចក្តីសម្រេច របស់លោកស្រីចៅក្រម Tanya Chutkan។
សូមបញ្ជាក់ថា ឯកសារដែលមានកម្រាស់សរុប ជិត៨០០ទំព័រ គឺមានដូចជា ឯកសាររបស់លោក Mark Meadows អតីតប្រធានខុទ្ទការល័យលោកដូណាល់ ត្រាំ ឯកសាររបស់លោក Stephen Miller អតីតទីប្រឹក្សាផ្ទាល់ និង លោក Patrick Philbin អតីតទីប្រឹក្សារងរបស់លោកដូណាល់ ត្រាំ។ ក្រៅពីឯកសារទាំងនេះ លោកដូណាល់ ត្រាំ ក៏បានព្យាយាមរារាំង ការបោះពុម្ពផ្សាយ ព្រឹត្តិបត្រប្រចាំថ្ងៃរបស់សេតវិមាន រួមទាំងរបាយការណ៍សង្ខេបនៃការងារ របាយការណ៍ធ្វើដំណើរ និង ការហៅទូរស័ព្ទចេញចូលរបស់លោក។ បន្ថែមពីនេះទៀត លោកដូណាល់ ត្រាំ បានរារាំង មិនឲ្យគេអាចពិនិត្យ លិខិតសរសេដៃមួយ ដែលលោកបានឲ្យទៅ អ្នកទទួលបន្ទុកទំនាក់ទំនងជាមួយបណ្តាញព័ត៌មានរបស់សេតវមាន និងគម្រោងអត្ថបទសន្ទរកថារបស់លោក ដែលថ្លែងនៅថ្ងៃទី៦មករា។
សូមរំលឹកថា ថ្ងៃទី៦មករា ខណៈដែលសមាជិកសភាអាមេរិក កំពុងជួបប្រជុំគ្នានៅវិមានកាពីតូល ក្រោយជ័យជំនះរបស់លោក ចូ បៃដិន លោកដូណាល់ ត្រាំ បានរៀបចំកម្មវិធីជួបជុំមួយ ជាមួយក្រុមអ្នកគាំទ្ររបស់លោកជាច្រើនពាន់នាក់ នៅមិនឆ្ងាយប៉ុន្មានពីនោះ។ នៅក្នុងកម្មវិធីជួបជុំដែលមានឈ្មោះថា "Save America » នេះ លោកដូណាល់ ត្រាំ បានប្រកាសថា លោកគឺជាអ្នកឈ្នះឆ្នោត។ ក្រោយចប់សន្ទរកថានេះ ក្រុមជ្រុលនិយមដែលគាំទ្រលោកដូណាល់ ត្រាំ បាននាំគ្នាសំរុកចូលទៅក្នុងវិមានកាពីតូល ដែលបានបង្កឲ្យមានចលាចល អាណាធិបតេយ្យមិនធ្លាប់មានទេ នៅក្នុងទីតាំងស្ថាប័នកំពូលនេះ។ សភាខុនហ្ក្រេស បានបង្កើតគណកម្មការពិសេសមួយ ដើម្បីស៊ើបអង្កេតថា តើលោកដូណាល់ ត្រាំ ពិតជាបានញុះញង់ ជំរុញឲ្យក្រុមអ្នកគាំទ្រខ្លួន សម្រុកចូលទៅក្នុងវិមានកាពីតូល ដែរឬទេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ