តូម៉ា ប៉េស្កេនិងអវកាសយានិក៣រូបផ្សេងទៀតវិលត្រឡប់មកដល់ដីវិញដោយសុវត្ថិភាព
អវកាសយានិក ៤រូប ក្នុងនោះរួមមានអវកាសយានិកបារាំង តូម៉ា ប៉េស្កេ ផងដែរបានវិលត្រឡប់មកដល់ដីវិញហើយ បន្ទាប់ពីបំពេញបេសកកម្ម ៦ខែ នៅស្ថានីយអវកាសអន្តរជាតិ។ ការចុះចតដោយសុវត្ថិភាពនៃយាន Crew Dragon របស់ក្រុមហ៊ុន SpaceX នេះ បង្ហាញថាបេសកកម្មដ៏មមាញឹករបស់អវកាសយានិកទាំង៤រូបបិទបញ្ចប់ហើយ។
ចុះផ្សាយនៅថ្ងៃ៖
ស្តាប់ - ០២:០៣
យោងតាមទីភ្នាក់ងារ NASA យាន Crew Dragon បានធ្លាក់ចុះដោយសុវត្ថិភាពក្នុងឈូងសមុទ្រម៉ិចស៊ិកក្បែរឆ្នេររដ្ឋផ្លរីដានៅវេលាម៉ោង ១០ និង ៣៣ យប់ ត្រូវនឹងម៉ោង ៣ និង ៣៣ នាទីម៉ោងសកលចំថ្ងៃអង្គារ ទី ៩ វិច្ឆិកានេះ។
លោក តូម៉ា ប៉េស្កេ (Thomas Pesquet) អវកាសយានិកបារាំង និងអវកាសយានិកអាមេរិកពីររូបរបស់NASA (Shane Kimbrough និង Katherine Megan McArthur) ព្រមទាំងអវកាសយានិកជប៉ុនមួយរូបទៀត (Akihiko Hoshide) ត្រូវបានគេយកចេញពីយានដោយប្រុងប្រយ័ត្នជាទីបំផុត បន្ទាប់បំពេញបេសកកម្មរយៈពេល ៦ខែ នៅស្ថានីយអវកាសអន្តរជាតិ។
គួរបញ្ជាក់ថា សម្រាប់បេសកកម្ម Crew-២ ដ៏មមាញឹករយៈពេលកន្លះឆ្នាំនេះ អវកាសយានិកអន្តរជាតិទាំង៤ រូបបានធ្វើការពិសោធន៍រាប់ពាន់នៅក្នុងគន្លង និងជួយធ្វើឲ្យប្រសើរឡើងនូវបន្ទះស្រូបពន្លឺព្រះអាទិត្យនៅលើស្ថានីយអវកាសអន្តរជាតិ។
សកម្មភាពសំខាន់ៗរបស់ពួកគេរួមមានដូចជា ការចងក្រងឯកសារលើផ្ទៃផែនដីដើម្បីកត់ត្រាការផ្លាស់ប្តូរនានាដែលបង្កឡើងដោយមនុស្ស និងកត់ត្រាព្រឹត្តិការណ៍ធម្មជាតិផ្សេងៗមានតាំងពីការដាំម្ទេស (Hatch chile peppers) និងការសិក្សាអំពីដង្កូវដើម្បីយល់កាន់តែច្បាស់ពីការផ្លាស់ប្តូរសុខភាពមនុស្សពេលនៅក្នុងលំហ។
នៅមុនការធ្វើដំណើរត្រលប់ទៅផ្ទះវិញ លោកតូម៉ា ប៉េស្កេ អវកាសយានិកបារាំងដែលជាមេបញ្ជាការនៃស្ថានីយអវកាសអន្តរជាតិ (ISS) នៅក្នុងអំឡុងបេសកកម្ម Crew-២ បានបង្ហោះសារធ្វីតថាលោកមោទនភាពដែលបានតំណាងឲ្យប្រទេសបារាំងនៅក្នុងបេសកកម្មលំហអាកាស។
គួររំឭកថា តាមរយៈបេសកម្ម Crew-២ អវកាសយានិក៤រូបបានដំណើរតាមយាន Crew Dragon របស់ក្រុមហ៊ុន SpaceX ទៅកាន់ស្ថានីយអវកាសអន្តរជាតិកាលពីថ្ងៃទី២៣ ខែមេសា ឆ្នាំ២០២១។
Crew-២ គឺបេសកកម្មទី៣ហើយរបស់ក្រុមហ៊ុន SpaceX ដែលបានដឹកអវកាសយានិកទៅកាន់ស្ថានីយអវកាសអន្តរជាតិ បន្ទាប់ពីបេសកកម្មសាកល្បង Demo-២ និង បេសកកម្មផ្លូវការ Crew-១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ