បោះឆ្នោតសភាកាណាដា ៖ បក្សប្រឆាំង និង បក្សកាន់អំណាច ប្រដេញសំឡេងគ្នាយ៉ាងកៀកកិត
តើនាយករដ្ឋមន្ត្រីផុតអាណត្តិ លោក ហ្សូសស្តាំង ទ្រុយដូ Justin Trudeau នឹងក្លាយជាប្រមុខរដ្ឋាភិបាលជាលើកទីបី ឬក៏មានការប្តូរផ្លាស់ ? លទ្ធផលអាស្រ័យទាំងស្រុងទៅលើសេចក្តីសម្រេចរបស់ប្រជាពលរដ្ឋកាណាដាជាង២៧លាននាក់ នៅថ្ងៃចន្ទទី ២០កញ្ញានេះ តាមរយៈការរៀបចំការបោះឆ្នោតសភាមុនកាលកំណត់ ដែលប្រកបដោយភាពស្រពិចស្រពិលបំផុត។
ចុះផ្សាយនៅថ្ងៃ៖
ស្តាប់ - ០១:៣៨
ដើម្បីស្តារប្រជាប្រិយភាពនិងប្រមូលសំឡេងភាគច្រើនក្នុងសភាឡើងវិញ លោកនាយករដ្ឋមន្ត្រី ហ្សូសស្តាំង ទ្រុយដូ បានសម្រេចកាលពីពាក់កណ្តាលខែសីហា រៀបចំការបោះឆ្នោតសភាមុនកាលកំណត់នៅថ្ងៃចន្ទ២០កញ្ញានេះ។ នៅក្នុងសុន្ទរកថា ឃោសនាបោះឆ្នោត រយៈពេល ៣៦ថ្ងៃ លោកនាយករដ្ឋមន្ត្រីផុតអាណត្តិទ្រុយដូ បានស្នើសុំឱ្យប្រជាពលរដ្ឋកាណាដាបន្តផ្តល់ទំនុកចិត្តលើកលោក ក្នុងការដឹកនាំប្រទេស និងចាត់ចែងដោះស្រាយវិបត្តិកូវីដ១៩។ បណ្តោយឱ្យគណបក្សអភិរក្សនិយមត្រលប់មកគ្រប់គ្រងប្រទេសវិញ ហាក់ដូចជានាំកាណាដាឱ្យដើរថយក្រោយ ជាពិសេសនៅក្នុងវិស័យអាកាសធាតុ។ នេះជាការគូសបញ្ជាក់របស់លោកទ្រុយដូក្នុងថ្ងៃឃោសនាចុងក្រោយ។
ប៉ុន្តែខុសឆ្ងាយពីព្រឹត្តិការណ៍បោះឆ្នោតឆ្នាំ២០១៥ឆ្ងាយណាស់។ បើតាមការស្ទង់មតិ លោក ទ្រុយដូ កំពុងតែចាញ់ល្បែងភ្នាល់ខ្លួនឯងហើយ ដោយមានប្រជាពលរដ្ឋប្រមាណ៣១%ចង់បោះឆ្នោតឱ្យ ពោលគឺប្រហាក់ប្រហែលនឹងគូប្រជែងដ៏ចំបងរបស់លោក គឺបេក្ខជនបក្សអភិរក្សនិយម លោក អេរីន អូទូល Erin O'Toole ដែលមុននេះបន្តិច ពុំមាននរណាស្គាល់សោះ។ ម្សិលមិញ នៅក្រុង តូរ៉ន់តូ លោក អេរីន អូទូល បានសន្យាប្តូរផ្លាស់មុខមាត់ថ្មីឱ្យកាណាដា និងធ្វើការឃោសនាដោយផ្តោតនយោបាយបែបកណ្តាលនិយម។
សម្រាប់អ្នកវិភាគ គណបក្សសេរីនិយមរបស់លោក ហ្សូសស្តាំង ទ្រុយដូ ក៏ដូចជាគណបក្សអភិរក្សកណ្តាលនិយមរបស់លោក អេរីន អូទូល ទំនងជាពិបាកដណ្តើមបានជោគជ័យ មានសំឡេងភាគច្រើនដាច់ខាតក្នុងសភាណាស់។
តាំងពីឆ្នាំ១៨៦៧មក គណបក្សសេរីនិយម និងអភិរក្សនិយម តែងតែឆ្លាស់គ្នាដឹកនាំប្រទេសជារហូតមក ប៉ុន្តែគ្មានគណបក្សណាមួយអាចមានសំឡេងភាគច្រើនដាច់ខាតក្នុងសភាទេ។ គណបក្សឈ្នះឆ្នោតតែងបង្កើតរដ្ឋាភិបាលចម្រុះជាមួយគណបក្សតូចៗផ្សេងៗទៀត ដូចជាគណបក្សប្រជាធិបតេយ្យថ្មី (អ្នកឆ្វេងនិយម) ដែលទទួលបានសំឡេងគាំទ្រប្រមាណ២០% ឬគណបក្សឯករាជ្យកេប៊ិច ឬគណបក្សបរិស្ថាន ជាដើម។ល។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ