អាមេរិកព្យាយាមបន្ថយកំហឹងរបស់បារាំងក្នុងរឿងអូស្រា្តលីសម្រេចលុបកិច្ចសន្យាទិញនាវាមុជទឹកបារាំង
ប្រទេសបារាំងតាមរយៈប្រតិកម្មរបស់រដ្ឋមន្រ្តីការបរទេសលោកហ្សង់អ៊ីវ ឡឺឌ្រីយ៉ង់មិនទាន់បាត់ខឹងនឹងអាមេរិកដែលបានប្រកាសបង្កើតសម្ព័ន្ធមិត្តថ្មីមួយជាមួយអង់គ្លេស និងអូស្រា្តលីសម្រាប់តំបន់ឥណ្ឌូប៉ាស៊ីហ្វិក។ កិច្ចព្រមព្រៀងថ្មីរវាងអូស្រា្តលី អង់គ្លេស និងអាមេរិកដែលហៅ « AUKUS » មួយនេះបានធ្វើឲ្យអូស្រា្តលីសម្រេចលុបកិច្ចសន្យាទិញនាវាមុជទឹកបារាំងចំនួន ១២គ្រឿង និងងាកទៅទិញនាវាមុជទឹកអាមេរិកវិញ។ លោកឡឺឌ្រីយ៉ង់បានចាត់ទុកទង្វើរបស់អាមេរិកថាជាការយកកាំបិតចាក់ពីក្រោយខ្នងបារាំង និងបានប្រដូចវិធីសាស្រ្តរបស់ប្រធានាធិបតីអាមេរិកលោកបៃដិនទៅនឹងវិធីសាស្រ្តដែលអតីតប្រធានាធិបតីអាមេរិកលោកត្រាំបានអនុវត្ត។ តែខណៈនេះ អាមេរិកតាមរយៈរដ្ឋមន្រ្តីការបរទេសលោកអង់តូនី ប៊្លីនកិនបានព្យាយាមកាត់បន្ថយកំហឹងរបស់ក្រុងប៉ារីសដោយបញ្ជាក់ពីតួនាទីសំខាន់របស់អឺរ៉ុប និងបារាំងនៅក្នុងតំបន់ឥណ្ឌូប៉ាស៊ីហ្វិក។
ចុះផ្សាយនៅថ្ងៃ៖
ស្តាប់ - ០១:៥០
« បារាំងជាពិសេសស្ថិតជាដៃគូមួយដ៏សំខាន់នៅលើសំណុំរឿងនេះ និងនៅលើសំណុំរឿងជាច្រើនផ្សេងទៀត។ ភាពជាដៃគូនេះមានតាំងពីយូរមកហើយ និងនៅតែមានជាបន្តទៀតនាពេលអនាគត។ យើងធ្លាប់បានពិភាក្សាគ្នាយ៉ាងស៊ីជម្រៅនៅក្នុងអំឡុងពេលនៃកិច្ចសន្ទនាជាច្រើនជាមួយសមភាគីរបស់ខ្ញុំ និងរវាងប្រធានាធិបតីអាមេរិកលោកបៃដិន និងប្រធានាធិបតីបារាំងលោកម៉ាក្រុងនៅឯកិច្ចប្រជុំកំពូលអង្គការអូតង់ កិច្ចប្រជុំកំពូលនៃក្រុមប្រទេស G៧ និងនៅកន្លែងផ្សេងទៀត។
ឥឡូវនេះ យើងចង់ចាប់យកនូវគ្រប់ឱកាសទាំងអស់ដើម្បីពង្រឹងលើកិច្ចសហប្រតិបត្តិអន្តរអាត់ត្លង់ទិកនៅក្នុងតំបន់ប៉ាស៊ីហ្វិក និងនៅកន្លែងផ្សេងទៀតលើលោកឲ្យកាន់តែស៊ីជម្រៅថែមទៀត។ ក្នុងរយៈពេល ២៤ម៉ោង ឬ ៤៨ម៉ោងចុងក្រោយនេះ យើងបានមានទំនាក់ទំនងជាមួយសមភាគីបារាំងរបស់យើងដើម្បីនិយាយពីកិច្ចព្រមព្រៀងមួយនេះមុននឹងប្រកាសវា។ ដូចដែលប្រធានាធិបតីអាមេរិកលោកបៃដិនបានមានប្រសាសន៍រួចហើយ ហើយខ្ញុំចង់បញ្ជាក់ម្តងទៀតនៅលើចំណុចនេះ។
យើងកំពុងសហការគ្នាយ៉ាងជិតស្និទ្ធមិនគួរឱ្យជឿជាមួយប្រទេសបារាំងនៅលើសំណុំរឿងអាទិភាពរួមជាច្រើនដែលមិនមែនមានតែនៅក្នុងតំបន់ឥណ្ឌូប៉ាស៊ីហ្វិកប៉ុណ្ណោះទេ។ ប៉ុន្តែក៏មាននៅកន្លែងផ្សេងទៀតលើលោក ហើយយើងនឹងនៅបន្តធ្វើយ៉ាងដូច្នេះ។ យើងឲ្យតម្លៃជាសារវន្តទៅលើភាពជាដៃគូ និងទំនាក់ទំនងនេះ ហើយយើងនឹងបន្តធ្វើដូចនេះនៅថ្ងៃខាងមុខ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ