លោក ចូ បៃដិន ប្រកាសបើក “ជំនួបកំពូលដើម្បីប្រជាធិបតេយ្យ” នៅខែធ្នូចុងឆ្នាំ
លោកប្រធានាធិបតីអាមេរិក នឹងអញ្ជើញ ប្រមុខរដ្ឋ-រដ្ឋាភិបាល នៃបណ្តាប្រទេសក្នុងក្រុមផ្សេងៗ ដែលប្រកាន់លទ្ធិប្រជាធិបតេយ្យ ឱ្យមកជួបជុំគ្នា តាមអនឡាញ នៅថ្ងៃទី ៩ និង១០ ធ្នូ ២០២១ ក្នុង “ជំនួបកំពូលដើម្បីប្រជាធិបតេយ្យ”។ ជាជំនួបកំពូលថ្មីមួយបែបទៀត ផ្សេងពីជំនួបជាប្រពៃណីរបស់ក្រុមប្រទេសមានសេដ្ឋកិច្ចលូតលាស់២០ដំបូងគេនៅលើពិភពលោក ឬហៅកាត់ថា ហ្សេ២០។ តើនេះជាសេចក្តីប្រកាស បញ្ឈឺចិនឬ ?!
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៦
នៅថ្ងៃទី ៩ និង១០ធ្នូខាងមុខ ប្រមុខរដ្ឋ ប្រមុខរដ្ឋាភិបាល នៃបណ្តាប្រទេសប្រកាន់លទ្ធិប្រជាធិបតេយ្យ និងអ្នកដឹកនាំសង្គមស៊ីវិល ព្រមទាំងអ្នកទទួលខុសត្រូវសេដ្ឋកិច្ចពិភពលោក នឹងត្រូវអញ្ជើញឱ្យមកចូលរួមក្នុងជំនួបកំពូលដើម្បីប្រជាធិបតេយ្យ តាមអនឡាញ។ ហើយមួយឆ្នាំបន្ទាប់មកទៀត ភ្ញៀវដដែលនេះនឹងជួបជុំគ្នាជាថ្មី ជាលើកទីពីរ និងដោយបង្ហាញវត្តមានផ្ទាល់ទាំងអស់ ដើម្បីវាយតម្លៃអំពីវឌ្ឍនភាពរបស់ខ្លួន ជុំវិញកម្មវត្ថុបី គឺ ប្រយុទ្ធប្រឆាំងនឹងការប្រើអំណាចផ្តាច់ការ ប្រយុទ្ធប្រឆាំងនឹងអំពើពុករលួយ និងផ្តល់សន្ទុះដល់ការគោរពសិទ្ធិមនុស្ស។ នេះបើតាមសេចក្តីថ្លែងការណ៍របស់សេតវិមាន នៅថ្ងៃពុធទី ១១សីហា ២០២១។
ប្រធានាធិបតីអាមេរិកមិនទាន់លម្អិតបញ្ជីឈ្មោះប្រមុខរដ្ឋ-រដ្ឋាភិបាលដែលត្រូវអញ្ជើញឱ្យមកចូលរួមក្នុងជំនួបកំពូលដើម្បីប្រជាធិបតេយ្យនេះទេ ប៉ុន្តែទោះមិននិយាយដោយចំៗក៏ដោយ ក៏គេអាចកាត់យល់បានថា នេះ ជាការឆ្លាស់ជំនួបហ្សេ២០ និងអាចចាត់ទុកបានថាជាជំនួបផ្គើនចិន។
ហ្សេ២០ ដែលជាបណ្តុំក្រុមប្រទេសមានសេដ្ឋកិច្ចលូតលាស់ខ្លាំង២០ដំបូងគេនៅពិភពលោក មាន ចិន រុស្ស៊ី ឬអារ៉ាប៊ីសាអូឌីតផង ត្រូវបើកជំនួបកំពូលប្រចាំឆ្នាំរបស់ខ្លួននៅប្រទេសអ៊ីតាលី ក្នុងខែតុលា។
បើតាមសេចក្តីថ្លែងការណ៍របស់សេតវិមានដដែល ដល់វេលាដែលត្រូវបង្ហាញឱ្យឃើញថាប្រជាធិបតេយ្យអាចធ្វើឱ្យប្រជាពលរដ្ឋក្នុងប្រទេសនោះផ្ទាល់បានប្រសើរឡើងផង និងដោះស្រាយបញ្ហាធំៗនៅលើពិភពលោកបានទៀត។ ហេតុដូច្នេះហើយបានជាអាមេរិកចង់រៀបចំជំនួបកំពូលដើម្បីប្រជាធិបតេយ្យ ឱ្យបានធំទូលាយ មានតំណាងក្រុមប្រទេសកំពូលលូតលាស់ផង មិនកំរិតត្រឹមក្រុមហ្សេ៧ដែលប្រមូលផ្តុំតែប្រទេសបស្ចិមលោក ឬប្រទេសប្រជាធិបតេយ្យធំៗទេ។
ខុសពីប្រធានាធិបតីអាមេរិកអាណត្តិមុន ដែលមិនខ្វល់នឹងទំនាក់ទំនងពហុជាតិ ហើយផ្តល់តម្លៃដល់តែពាណិជ្ជកម្មទ្វេភាគី លោកប្រធានាធិបតីអាមេរិកចូ បៃដិន មានចេតនានាំសហរដ្ឋអាមេរិកឱ្យត្រលប់មកដើរតួនាទីជាមេដឹកនាំពិភពលោក និង ចង់ឱ្យជំនួបកំពូលដើម្បីប្រជាធិបតេយ្យទាំងពីរលើក ក្លាយជាឱកាសសម្រាប់មេដឹកនាំគ្រប់ប្រទេសបានស្តាប់ដៃគូនិងប្រជាពលរដ្ឋ បានផ្តោះប្តូរភាពជោគជ័យ បានលើកទឹកចិត្តឱ្យមានកិច្ចសហប្រតិបត្តិការអន្តរជាតិ និងបាននិយាយដោយត្រង់ៗអំពីភាពប្រឈមនៃលទ្ធិប្រជាធិបតេយ្យរបស់ប្រទេសនីមួយៗ។
ចក្ខុវិស័យប្រជាធិបតេយ្យ បានបើកផ្លូវឱ្យលោកបៃដិនបានទទួលជោគជ័យក្នុងដឹកនាំប្រទេសរួចទៅហើយ។ ផែនការផ្តល់សន្ទុះសេដ្ឋកិច្ច គម្រោងច្បាប់វិនិយោគហេដ្ឋារចនាសម្ព័ន្ធដ៏មហាសាល ត្រូវបានសមាជិកសភានិងព្រឹទ្ធសភាទាំងពីរគណបក្សគាំទ្រអនុម័ត ព្រមទាំងបានស្ថាបនាសម្ព័ន្ធភាពជាមួយដៃគូប្រជាធិបតេយ្យឡើងវិញទៀត និងផ្តល់ថ្នាំបង្ការកូវីដ១៩ ដល់ប្រជាពលរដ្ឋបាន៧០% នេះជាស្នាដៃរយៈពេល៦ខែដំបូង របស់លោកប្រធានាធិបតីដែលសេតវិមានបានរៀបរាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ