លោក ចូ បៃដិន សន្យាថានឹងនិយាយឲ្យច្បាស់ៗ អំពីចំណុចមិនត្រូវគ្នា ជាមួយនឹងលោកពូទីន
តាមការគ្រោងទុក លោកប្រធានាធិបតីអាមេរិក ចូ បៃដិន និងជួបទល់មុខគ្នាមួយទៅនឹងមួយ នៅទីក្រុងហ្សឺណែវ ប្រទេសស្វ៊ីស នៅថ្ងៃពុធ សប្តាហ៍នេះ។ លោក ចូ បៃដិន បានបញ្ជាក់ប្រាប់បណ្តាញព័ត៌មាន កាលពីថ្ងៃអាទិត្យថា នៅក្នុងជំនួបជាមួយលោកពូទីន ជាលើកទីមួយនេះ លោកនឹងនិយាយឲ្យច្បាស់ៗ ត្រង់ៗតែម្តង អំពីចំណុចមិនត្រូវគ្នាទាំងលាយ រវាងអាមេរិក និងរុស្ស៊ី។
ចុះផ្សាយនៅថ្ងៃ៖
ស្តាប់ - ០២:១៨
ឆ្លើយទៅកាន់បណ្តាញសារព័ត៌មានអង់គ្លេស Newquay បន្ទាប់ពីចប់កិច្ចប្រជុំG7 លោក ចូ បៃដិន បានបញ្ជាក់ថា នៅក្រោយជំនួបរវាងលោក និងលោកពូទីន នៅក្រុងហ្សឺណែវ ថ្ងៃពុធ គឺលោកនឹងធ្វើសន្និសីទកាសែតតែម្នាក់ឯងដាច់ដោយឡែក មិនធ្វើរួមគ្នាទាំង២នាក់ ជាមួយលោកពូទីនទេ។ លោកចូ បៃដិន បានបន្ថែមថា សន្និសីទកាសែត វាមិនមែនជាការប្រកួតប្រជែង ថាអ្នកណាពូកែនិយាយជាងអ្នកណា ធ្វើឲ្យម្នាក់ទៀតទ័លច្រកនោះទេ។
លោកចូ បៃដិន អះអាងទៀតថា រដ្ឋាភិបាលលោកគ្មានបំណងណាមួយ ទៅបង្កជម្លោះ បង្កវិវាទជាមួយរុស្ស៊ីទេ។ លោកនឹងបង្ហាញយ៉ាងច្បាស់លាស់ ក្នុងការកំណត់លក្ខខណ្ឌដែលត្រូវបំពេញ ដើម្បីឈានទៅទទួលបាននូវទំនាក់ទំនងល្អប្រសើរមួយ ជាមួយនឹងរុស្ស៊ី។ លោកបញ្ជាក់ប្រាប់ទៅអ្នកកាសែតថា សូមទុកចិត្តចុះ ថាលោកប្រាកដជានិយាយដោយច្បាស់ៗ ត្រង់ៗ ជាមួយលោកពូទីន អំពីចំណុចមិនស្របគ្នាទាំងអស់ ដែលអាមេរិក មានជាមួយរុស្ស៊ី។
ដោយឡែក លោក Dmitri Peskov អ្នកនាំពាក្យវិមានក្រឹមឡាំង បានបញ្ជាក់ថា បន្ទាប់ពីជួបជាមួយលោកចូ បៃដិនហើយ លោកពូទីន ក៏នឹងធ្វើសន្និសីទកាសែត ដាច់ដោយឡែកមួយដែរ។ មន្ត្រីរុស្ស៊ីរូបនេះ អះអាងថា នេះគឺជាអ្វីដែលភាគីអាមេរិកចង់បាន និងបានស្នើសុំមក។
គួរបញ្ជាក់ថា មហាអំណាចទាំង២ អាេមរិក និងរុស្ស៊ី មានចំណុចមិនចុះសម្រុងគ្នាជាច្រើនរឿង ដូចជាបញ្ហាវត្តមានកងទ័ពអូតង់នៅតំបន់អឺរ៉ុបខាងកើត បញ្ហាអ៊ុយក្រែន បេឡារុស្ស៊ី និងបញ្ហាអាយុជីវិត លោក អាឡិចសី ណាវ៉ាល់នីជាដើម។ ក្រោយពេលចូល កាន់តំណែងភ្លាម លោកចូ បៃដិន ធ្លាប់បាននិយាយចាត់ទុក ថា លោកពូទីន គឺជាឃាតករ ព្រោះបានសម្លាប់បំបិទមាត់អ្នកនយោបាយប្រឆាំង លោក បូរីស ញែមសូវ។ យ៉ាងណាក៏ដោយ សេតវិមានអាមេរិក បានបញ្ជាក់ឲ្យដឹងជាច្រើនសប្តាហ៍មកហើយ ថារដ្ឋាភិបាលលោកចូ បៃដិន បានកំណត់កម្មវត្ថុ ធ្វើយ៉ាងណា ឲ្យទំនាក់ទំនងជាមួយរុស្ស៊ី មានលំនឹងល្អ និងមិនក្រឡាប់ផ្ញារងាយងាយ។
នៅក្នុងបទសម្ភាសន៍មួយ តាមទូរទស្សន៍អាមេរិក NBC News កាលពីថ្ងៃសុក្រ លោកពូទីន បានទទួលស្គាល់ថា ប៉ុន្មានឆ្នាំចុងក្រោយនេះ ទំនាក់ទំនងរវាងអាមេរិក និងរុស្ស៊ី ពិតជាល្អក់កករខ្លាំងពិតមែន។ ក៏ប៉ុន្តែលោកពូទីន បានលើកឡើងថាលោកសង្ឃឹមថា លោកនឹងអាចធ្វើការតាមសម្រួល ជាមួយលោក ចូ បៃដិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ