ព្រឹទ្ធសភាអាមេរិក អនុម័តផែនការផ្តល់សន្ទុះសេដ្ឋកិច្ចទាំងប្រផុតប្រផើយ
នៅទីបំផុត ផែនការផ្តល់សន្ទុះសេដ្ឋកិច្ចរបស់លោកប្រធានាធិបតី ចូ បៃដិន តម្លៃ១៩០០ពាន់លានដុល្លារ (១,៩ទ្រីលាន) ត្រូវបានព្រឹទ្ធសភាអាមេរិកយល់ព្រមអនុម័តនៅយប់មិញ។ នេះជាលទ្ធផលនៃការតស៊ូមតិ និងចរចាគ្នាយ៉ាងស្វិតស្វាញ អស់រយៈពេលជាច្រើនម៉ោង។
ចុះផ្សាយនៅថ្ងៃ៖
ស្តាប់ - ០២:១៦
បន្ទាប់ពីបានចរចាអស់ជាច្រើនម៉ោង និងបានធ្វើវិសោនធកម្មជាច្រើនលើកច្រើនសា នៅទីបំផុត ព្រឹទ្ធសភាអាមេរិកបានបោះឆ្នោតអនុម័តផែនការសង្គ្រោះក្នុងសំឡេង ៥០គាំទ្រ (ដែលជាសំឡេងរបស់អ្នកប្រជាធិបតេយ្យសុទ្ធ) ទល់នឹង៤៩ប្រឆាំង។
ការប្តូរផ្លាស់គួរឱ្យកត់សម្គាល់ជាងគេបំផុត គឺវិធានការចង់បង្កើតឱ្យមានប្រាក់បៀរវត្សរ៍អប្បបរិមាដោយកំណត់តម្លៃការងារ ទាបបំផុតត្រឹម១៥ដុល្លារក្នុងម៉ោង ត្រូវបោះបង់ចោលទៅវិញ។ ប៉ុន្តែអ្នកតាក់តែងច្បាប់បានដឹងជាមុនថាចំណុចនេះពិតជាមិនអាចចេញរួចទេ។
វិធានការចង់ដំឡើងប្រាក់ឧបត្ថម្ភពេលអត់ការងារធ្វើ ដែលមានចែងនៅក្នុងច្បាប់ដើម ជាចំណុចខ្ទាស់គ្នាខ្លាំង សូម្បីតែសមាជិកព្រឹទ្ធសភាក្នុងបក្សប្រជាធិបតេយ្យផ្ទាល់ខ្លួនឯងក៏ប្រឆាំងដែរ។ ហើយគឺវិធានការនេះតែម្តងដែលបានស៊ីពេលចរចាអស់ដល់ទៅ៩ម៉ោង អូសបន្លាយពេលវេលារហូតដល់ពាក់កណ្តាលអាធ្រាត្រយប់ថ្ងៃសៅរ៍ឆ្លងចូលថ្ងៃអាទិត្យ ដោយព្រមព្រៀងគ្នាត្រឹម រក្សាប្រាក់ឧបត្ថម្ភអ្នកអត់ការងារធ្វើ ត្រឹមប្រមាណ៣០០ដុល្លារដដែល។ ប៉ុន្តែគ្រួសារអាមេរិកអាចទទួលបានទឹកប្រាក់ ក្នុងទម្រង់ជាមូលប្បទានប័ត្រ ១៤០០ដុល្លារ ដូចដែលលោកចូបៃដិន បានសន្យា។ ផែនការសង្គ្រោះ ក៏មានរក្សាកញ្ចប់ថវិកាសម្រាប់ជួយសាលារៀន ហាងទំនិញតូចៗ រដ្ឋ និងការប្រយុទ្ធប្រឆាំងកូវីដ១៩ (៤៩ពាន់លានដុល្លារសម្រាប់ការស្រាវជ្រាវ និង១៤ពាន់លានសម្រាប់ការចែកចាយចាក់ថ្នាំបង្ការកូវីដ)។
លោកប្រធានាធិបតីអាមេរិកចូ បៃដិន បានសម្តែងការអបអរ នៅពេលឃើញព្រឹទ្ធសភាអនុម័តផែនការសង្គ្រោះ ដែលអាមេរិករង់ចាំបំផុត។ បើតាមលោកប្រធានាធិបតី ដើម្បីអាចដើរចេញពីវិបត្តិបង្កឡើងដោយកូរ៉ូណាវីរុសថ្មី ដោយគ្មានហានិភ័យលាប់ធ្លាក់ក្នុងគ្រោះសេដ្ឋកិច្ចវិញ អាមេរិកត្រូវតែមានផែនការធំមហិមាយ៉ាងដូច្នេះឯង។
ផែនការសង្គ្រោះនេះ ត្រូវឆ្លងកាត់ការបោះឆ្នោតនៅសភាអាមេរិកនៅថ្ងៃអង្គារទី៩មីនាទៀត មុននឹងប្រធានាធិបតីចូបៃដិន ចុះហត្ថលេខាផ្តល់សុពលភាពនៅថ្ងៃទី ១៤មីនា។ ការអនុម័តផែនការតម្លៃ១៩០០ពាន់លានដុល្លារនេះ ជាជោគជ័យដំបូងមួយសម្រាប់លោកប្រធានាធិបតីថ្មី ដែលបានសន្យាផ្តល់ជំនួយនេះដល់ពលរដ្ឋអាមេរិកផងនិងចង់ឃើញផែនការនេះអាចចេញរួចមុនផែនការសង្គ្រោះបច្ចុប្បន្នផុតឱសានវាទនៅចុងសប្តាហ៍ក្រោយផង។ នេះជាផែនការសង្គ្រោះពិសេសទីបីហើយដែលព្រឹទ្ធសភាអាមេរិកបានអនុម័តក្នុងសម័យកាលមានរោគរាតត្បាតកូវីដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ