សហរដ្ឋអាមេរិក៖លោកចូ បៃដិនអំពាវនាវឲ្យពលរដ្ឋរួបរួមគ្នា និងបើកទំព័រសករាជថ្មី
នៅសហរដ្ឋអាមេរិក អង្គបោះឆ្នោតបានបញ្ជាក់ជាផ្លូវការនាថ្ងៃចន្ទ ទី១៤ ធ្នូពីជ័យជម្នះរបស់លោកចូ បៃដិននាការបោះឆ្នោតប្រធានាធិបតីថ្ងៃទី៣ វិច្ឆិកា។ លោកបៃដិនទទួលបាន ៣០៦អង្គបោះឆ្នោត ហើយលោកដូណាល់ ត្រាំទទួលបានតែ ២៣២អង្គបោះឆ្នោត។ លទ្ធផលផ្លូវការនឹងត្រូវសភាទាំងពីរប្រកាសនៅថ្ងៃទី៦ មករា ឆ្នាំ ២០២១។ តែលោកត្រាំបន្តបដិសេធមិនទទួលស្គាល់លទ្ធផលបោះឆ្នោត និងបន្តចាត់ទុកជាការលួចបន្លំសន្លឹកឆ្នោត។ យ៉ាងណាក៏ដោយ លោកបៃដិនបានថ្លែងសារទៅកាន់ប្រជាជាតិនាយប់ថ្ងៃចន្ទ ទី១៤ ធ្នូដោយបានអំពាវនាវឲ្យពលរដ្ឋអាមេរិករួបរួម និងបើកទំព័រសករាជថ្មី។ ទន្ទឹមគ្នានេះ លោកបៃដិនមិនភ្លេចបរិហារលោកត្រាំដែលបានប្រឆាំងនឹងប្រព័ន្ធបោះឆ្នោត។
ចុះផ្សាយនៅថ្ងៃ៖
ស្តាប់ - ០១:៣៣
« ជាថ្មីម្តងទៀតនៅសហរដ្ឋអាមេរិក រដ្ឋធម្មនុញ្ញ និងឆន្ទៈពលរដ្ឋជាអ្នកឈ្នះ។ លទ្ធិប្រជាធិបតេយ្យរបស់យើងដែលបានរងភាពក្រឡាប់ចាក់ ការគំរាមកំហែង និងការសាកល្បងបានបង្ហាញពីភាពធន់របស់វា ភាពសច្ចៈរបស់វា និងកម្លាំងពិតរបស់វា។ ការបោះឆ្នោតរបស់អង្គបោះឆ្នោតថ្ងៃនេះឆ្លុះបញ្ចាំងការពិតដែលថា សូម្បីតែនៅក្នុងបរិបទនៃវិបត្តិសុខភាពមិនធ្លាប់មានក៏ដោយ ក៏មានប្រជាពលរដ្ឋយ៉ាងច្រើនសម្បើមបានចូលរួមបោះឆ្នោតដែរ។
ចំនួនអ្នកចូលរួមបោះឆ្នោតដ៏ច្រើនសម្បើមជាសក្ខីកម្មមួយដែលបញ្ជាក់ថា ការបោះឆ្នោតនេះជាការបង្ហាញយ៉ាងច្បាស់ក្រឡែតពីឆន្ទៈពិតរបស់ពលរដ្ឋអាមេរិក។ ឆន្ទៈពិតរបស់ពលរដ្ឋអាមេរិកនេះទៀតសោតជាផ្នែកមួយដែលបង្ហាញចេញនូវកាតព្វកិច្ចពលរដ្ឋនៅក្នុងប្រទេសរបស់យើង។ នេះជាអ្វីដែលយើងត្រូវសាទរ ពោលមិនមែនវាយប្រហារទេ។ អ្វីដែលកំពុងមានសង្វាក់ខ្លាំងនៅក្នុងបេះដូងពលរដ្ឋអាមេរិកគឺ លទ្ធិប្រជាធិបតេយ្យ សិទ្ធិមានសំឡេង រាប់សន្លឹកឆ្នោតទាំងអស់ និងសិទ្ធិក្នុងការជ្រើសរើសថ្នាក់ដឹកនាំដើម្បីគ្រប់គ្រងប្រទេស។
នៅសហរដ្ឋអាមេរិក អំណាចស្ថិតក្នុងដៃរបស់ពលរដ្ឋ ពោលមិនមែនស្ថិតក្នុងកណ្តាប់ដៃរបស់ក្រុមអ្នកនយោបាយទេ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ