លោកចូ បៃដិនជ្រើសរើសឧត្តមសេនីយ៍ស្បែកខ្មៅជារដ្ឋមន្រ្តីការពារជាតិ
លោកចូ បៃដិន បានជ្រើសរើសអតីតឧត្តមសេនីយ៍ស្បែកខ្មៅមួយរូប ឲ្យកាន់តំណែងជារដ្ឋមន្រ្តីក្រសួងការពារជាតិ នៅក្នុងរដ្ឋាភិបាលថ្មីរបស់លោក។ នេះបើយោងតាមការផ្សាយរបស់បណ្តាញសារព័ត៌មានសំខាន់ៗជាច្រើននៅអាមេរិក កាលពីយប់ថ្ងៃចន្ទម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
អតីតឧត្តមសេនីយ៍រូបនេះមានឈ្មោះថា ឡយដ៍ អូស្ទីន (Lloyd Austin) ធ្លាប់ជាមេបញ្ជាការកងទ័ពអាមេរិកប្រចាំតំបន់មជ្ឈិមបូព៌ា មុននឹងចូលនិវត្តន៍ កាលពីឆ្នាំ២០១៦កន្លងទៅ។
រហូតមកទល់នឹងពេលនេះ លោកចូ បៃដិន នៅមិនទាន់ប្រកាសជាផ្លូវការនៅឡើយទេ អំពីការតែងតាំងនេះ ក៏ប៉ុន្តែ ប្រសិនបើលោក អូស្ទីន ពិតជាត្រូវបានតែងតាំង ហើយទទួលបានការបោះឆ្នោតផ្តល់ទំនុកចិត្តពីសំណាក់សភាអាមេរិក លោកនឹងក្លាយទៅជាជនជាតិស្បែកខ្មៅទី១ ក្នុងប្រវត្តិសាស្រ្តអាមេរិក ដែលបានកាន់តំណែងជារដ្ឋមន្រ្តីក្រសួងការពារជាតិ។
ក៏ប៉ុន្តែ ការឆ្លងកាត់ការបោះឆ្នោតនៅសភាទំនងជានឹងត្រូវជួបបញ្ហាស្មុគស្មាញ ពីព្រោះថា ឧត្តមសេនីយ៍ ឡយដ៍ អូស្ទីន ទើបនឹងចូលនិវត្តន៍បាន ៤ឆ្នាំ ចំណែកច្បាប់អាមេរិកតម្រូវថា អ្នកដែលអាចកាន់តំណែងជារដ្ឋមន្រ្តីក្រសួងការពារជាតិបាន ចាំបាច់ត្រូវតែជាជនស៊ីវិល ឬជាអតីតមន្រ្តីកងទ័ព ដែលចូលនិវត្តន៍យ៉ាងតិច ៧ឆ្នាំ មុនចូលកាន់តំណែង។ មន្រ្តីកងទ័ពដែលចូលនិវត្តន៍តិចជាង ៧ឆ្នាំ អាចកាន់តំណែងជារដ្ឋមន្រ្តីក្រសួងការពារជាតិបាន ចាំបាច់ត្រូវតែមានការអនុញ្ញាតពីសភាទាំងពីរ គឺរដ្ឋសភា និងព្រឹទ្ធសភា។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ