New York Times៖លោកដូណាល់ ត្រាំពិចារណាចង់វាយប្រហារលើមជ្ឈមណ្ឌលនុយក្លេអ៊ែរអ៊ីរ៉ង់
នៅសហរដ្ឋអាមេរិក ២ខែមុនការផ្ទេរអំណាចរវាងប្រធានាធិបតីផុតអាណត្តិលោកដូណាល់ ត្រាំ និងប្រធានាធិបតីជាប់ឆ្នោតលោកចូ បៃដិន លោកត្រាំបានពិចារណាចង់បើកការវាយប្រហារលើមជ្ឈមណ្ឌលនុយក្លេអ៊ែរអ៊ីរ៉ង់ នេះជាព័ត៌មានចុះផ្សាយដោយកាសែត New York Times ចេញផ្សាយក្នុងថ្ងៃចន្ទ ទី១៦ វិច្ឆិកា។ តាមកាសែតអាមេរិកនេះដដែល លោកត្រាំបានដាក់សំណើនេះទៅកាន់ក្រុមទីប្រឹក្សារបស់លោក ក្នុងនោះមានរូបប្រមុខការទូតលោកម៉ៃ ប៉ុមប៉េអូ និងមេបញ្ជាការកងទ័ពលោក Mark Milley។ តែនៅក្រោមគំនាបជំទាស់របស់ក្រុមទីប្រឹក្សា លោកត្រាំបានដកថយវិញ នេះបើតាមការបញ្ជាក់របស់អ្នកតំណាងអាមរិកម្នាក់មិនបញ្ចេញឈ្មោះ។
ចុះផ្សាយនៅថ្ងៃ៖
ស្តាប់ - ០២:១៣
បើគេជឿលើព័ត៌មានចុះផ្សាយដោយកាសែត New York Times លេខចេញផ្សាយក្នុងថ្ងៃចន្ទ ទី១៦ វិច្ឆិកា លោកដូណាល់ ត្រាំបានរួមប្រជុំក្រុមទីប្រឹក្សាសំខាន់ៗក្នុងការិយាល័យរបស់លោកកាលពីថ្ងៃព្រហស្បតិ៍ ទី១២ វិច្ឆិកាកន្លងទៅ។ ទីប្រឹក្សាសំខាន់ៗមានដូចជាប្រមុខការទូតលោកម៉ៃ ប៉ុមប៉េអូ រដ្ឋមន្រ្តីការពារជាតិថ្មីលោក Christopher Miller និងមេបញ្ជាការកងទ័ពលោក Mark Milley ហើយនៅក្នុងកិច្ចប្រជុំនោះ លោកត្រាំបានសួរទៅកាន់ក្រុមទីប្រឹក្សាអំពីជម្រើសរបស់ពួកគេដើម្បីប្រឆាំងនឹងទីតាំងនុយក្លេអ៊ែរសំខាន់ៗរបស់អ៊ីរ៉ង់។ ជម្រើសដែលលោកត្រាំបានពិចារណា គឺបើកការវាយប្រហារលើទីតាំងនុយក្លេអ៊ែរសំខាន់ៗរបស់អ៊ីរ៉ង់នៅប៉ុន្មានសប្តាហ៍ខាងមុខ។
បើតាម New York Times ដដែល ក្រុមទីប្រឹក្សាបានរារាំងលោកត្រាំមិនឲ្យបើកការវាយប្រហារដោយបារម្ភពីហានិភ័យដែលអាចបង្កចេញនូវជម្លោះរីករាលទ្រង់ទ្រាយធំនៅក្នុងតំបន់មិនអាចគ្រប់គ្រងបាន។ នៅទីបំផុត លោកត្រាំបានស្តាប់យោបល់របស់ក្រុមទីប្រឹក្សា និងបានដកខ្លួនថយវិញ។ គួររម្លឹកថា ការដែលលោកត្រាំបានរួមប្រជុំក្រុមទីប្រឹក្សា និងពិចារណាចង់វាយប្រហារលើទីតាំងនុយក្លេអ៊ែរសំខាន់ៗរបស់អ៊ីរ៉ង់ធ្វើឡើង ក្រោយពីទីភ្នាក់ងារថាមពលបរមាណូអន្តរជាតិចេញផ្សាយរបាយការណ៍មួយដែលបញ្ជាក់ថា អ៊ីរ៉ង់កំពុងបន្តបង្កើនការចម្រើនធាតុអ៊ុយរ៉ាញ៉ូមនៅក្នុងបរិមាណមួយលើសពីការកំណត់នៅក្នុងកិច្ចព្រមព្រៀងនុយក្លេអ៊ែរអ៊ីរ៉ង់ចុះហត្ថលេខាឆ្នាំ ២០១៥។
កាសែត New York Times បានឲ្យដឹងទៀតថា មជ្ឈមណ្ឌលនុយក្លេអ៊ែរអ៊ីរ៉ង់ដែលលោកត្រាំចង់វាយប្រហារ គឺមជ្ឈមណ្ឌល Natanz។ គួរបញ្ជាក់ថាក្នុងរយៈពេល ៤ឆ្នាំនៃការកាន់អំណាច លោកត្រាំបានប្រើនយោបាយដាក់សម្ពាធអតិបរមាលើអ៊ីរ៉ង់។ ក្នុងឆ្នាំ ២០១៨ លោកត្រាំបានដកសហរដ្ឋអាមេរិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់ដែលសហគមន៍អន្តរជាតិបានចុះហត្ថលេខាក្នុងឆ្នាំ ២០១៥ និងបានដាក់ទណ្ឌកម្មសេដ្ឋកិច្ចជាថ្មីលើអ៊ីរ៉ង់។ ក្នុងខែមករាកន្លងទៅ លោកត្រាំបានបញ្ជាឲ្យសម្លាប់មេទ័ពអ៊ីរ៉ង់ឧត្តមសេនីយកាសឹម សូឡីម៉ានីក្នុងទឹកដីអ៊ីរ៉ាក់ដែលបានបង្កឲ្យមានកំហឹងពុះកញ្ជ្រោលពីអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ