មន្ត្រីក្រសួងយុត្តិធម៌អាេមរិកលាលែងចេញពីតំណែង ក្រោយរដ្ឋមន្ត្រីបញ្ជាឲ្យស៊ើបអង្កេតរឿងក្លែងបន្លំសន្លឹកឆ្នោត
លោក Bill Barr រដ្ឋមន្ត្រីមន្ត្រីក្រសួងយុត្តិធម៌អាេមរិក ដែលជាមនុស្សជំនិតបំផុត របស់លោកដូណាល់ ត្រាំ បានអនុញ្ញាឲ្យបើកការស៊ើបអង្កេត ទាក់ទិននឹងនឹងភាពមិនប្រក្រតី ក្នុងការបោះឆ្នោតថ្ងៃទី ៣វិច្ឆិកា។ លោកដូណាល់ ត្រាំបានចោទប្រកាន់ ថាការបោះឆ្នោតនេះ មានការក្លែងបន្លំសន្លឹកឆ្នោត។ នៅក្រោយការចេញបញ្ជាឲ្យបើកការស៊ើបអង្កេតនេះ មន្ត្រីទទួលបន្ទុកម្នាក់ នៃក្រសួងយុត្តិធម៌អាមេរិក បានសម្រេចចិត្ត លាលែងចេញពីតំណែង។
ចុះផ្សាយនៅថ្ងៃ៖
ស្តាប់ - ០២:២៩
លោក Bill Barr រដ្ឋមន្ត្រីក្រសួងយុត្តិធម៌ បានសរសេរលិខិតមួយ ផ្ញើទៅកាន់រដ្ឋអាជ្ញាសហព័ន្ធទាំងអស់ ដោយបានបញ្ជាក់ថា លោកអនុញ្ញាតឲ្យបើកការស៊ើបអង្កេត ស្តីពីការលើកឡើង ទាក់ទិននឹងភាពមិនប្រក្រតីនៅក្នុងការបោះ និងការរាប់សន្លឹកឆ្នោត នៅតាមដែនដីយុត្តាធិការរៀងៗខ្លួន បើទោះបីជាមិនទាន់មានការកំណត់លទ្ធផលជាផ្លូវការក្តី។
នៅក្នុងលិខិតនេះដែរ លោក រដ្ឋមន្ត្រីក្រសួងយុត្តិធម៌ ដែលជាមនុស្សស្មោះស្ម័គ្រនឹងលោកដូណាល់ ត្រាំបំផុតនោះ បានបន្ថែមថា ការអនុញ្ញាតឲ្យបើកការស៊ើបអង្កេតនេះ មិនមែនមានន័យថា ក្រសួងយុត្តិធម៌ មានភស្តុតាងបញ្ជាក់ថាមានការក្លែងបន្លំសន្លឹកឆ្នោតនោះទេ។ លោកបញ្ជាក់ថា រាល់ការស៊ើបអង្កេត គឺត្រូវតែធ្វើឡើង ដោយឈរលើការសង្ស័យដែលច្បាស់លាស់ និងគួរជឿទុកចិត្ត ហើយក្នុងករណីដែលមានភាពមិនប្រក្រតីពិតមែន គឺវាអាចធ្វើឲ្យប្រែប្រួល ដល់លទ្ធផលឆ្នោតនៅតាមរដ្ឋនីមួយៗ។
បន្ទាប់ពីរដ្ឋមន្ត្រីក្រសួងយុត្តិធម៌ចេញបញ្ជានេះភ្លាម លោក Richard Pilger មន្ត្រីទទួលបន្ទុកបទល្មើសក្នុងកិច្ចការបោះឆ្នោត នៃក្រសួងយុត្តិធម៌ បានដាក់ពាក្យលាឈប់ពីមុខតំណែងភ្លាម។ យោងតាមការចុះផ្សាយរបស់កាសែត The New York Times បានឲ្យដឹងថា លោក Richard Pilger បានផ្ញើអ៊ីមែលមួយទៅ កាន់ក្រុមការងារលោក ថាបន្ទាប់ពីបានឃើញវិធានការថ្មីចេញដោយរដ្ឋមន្ត្រី គឺលោកមិនអាចបន្តកាន់មុខងារនេះ បានតទៅទៀតទេ។
គួរបញ្ជាក់ថា យោងតាមវិធានច្បាប់បោះឆ្នោតនៅសហរដ្ឋអាេមរិក ការស៊ើបអង្កេតស្តីពីភាពមិនប្រក្រតីណាមួយ នៅក្នុងការបោះឆ្នោត គឺវាជាសិទ្ធិអំណាចសម្រេច នៅក្នុងក្របខណ្ឌរដ្ឋនីមួយៗ ព្រោះអាជ្ញាធររដ្ឋនីមួយៗ ជាអ្នកកំណត់វិធាន និងចាត់ចែងការបោះឆ្នោតក្នុងរដ្ឋគេរៀងៗខ្លួន។ ក្រសួងយុត្តិធម៌ដែលជាអំណាចរដ្ឋសហព័ន្ធ អាចលូកដៃ បើកការស៊ើបអង្កេតបាន ល្គឹកណា ការរាប់សន្លឹកឆ្នោត បានចប់សព្វគ្រប់ និងមានលទ្ធផលឆ្នោតចេញជាផ្លូវការដោយរដ្ឋនីមួយៗ។
គួរកត់សំគាល់ថា ក្រុមលោកដូណាល់ ត្រាំ កំពុងតែប្រឹងប្រែងប្រើយុទ្ធសាស្ត្រ ប្រកូកប្រកាសចោទប្រកាន់ ថាមានការបន្លំសន្លឹកឆ្នោតទ្រង់ទ្រាយធំ។ តែយ៉ាងណា អាជ្ញាធររដ្ឋនីមួយៗ ដែលគ្រប់គ្រងនិងចាត់ចែងការបោះឆ្នោត បានលើកឡើងថា ក្រុមលោកដូណាល់ ត្រាំ ត្រូវតែបង្ហាញភស្តុតាង ឲ្យជាក់ច្បាស់ មិនមែនគ្រាន់តែនិយាយចោទតែមាត់ទទេរ ដើម្បីបំផុសបំផុលឲ្យមនុស្សម្នា ផ្អើលឈូរឆដូច្នេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ