ប្រតិកម្មពិភពលោក ជុំវិញជោគជ័យរបស់លោក ចូ បៃដិន ក្នុងការបោះឆ្នោតប្រធានាធិបតីអាមេរិក
មេដឹកនាំប្រទេសជាច្រើននៅលើពិភពលោក បានសម្តែងការអបអរ ចំពោះជោគជ័យរបស់លោក ចូ បៃដិន ដែលបានជាប់ឆ្នោតជាប្រធានាធិបតីទី ៤៦របស់សហរដ្ឋអាមេរិក។ ជាមួយនឹងសារលើកសរសើរប្រធានាធិបតីជាប់ឆ្នោតថ្មី មេដឹកនាំប្រទេសជាច្រើន បានអំពាវនាវឱ្យអាមេរិកវិលមកបញ្ចេញសកម្មភាពរួម ដើម្បីជម្នះឧបសគ្គពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២៣
គ្រាន់តែប្រព័ន្ធសារព័ត៌មានអាមេរិកបានប្រកាសផ្តល់ជោគជ័យ ដល់ លោក ចូ បៃដិន នៅល្ងាចថ្ងៃសៅរ៍ទី ៧ វិច្ឆិកា ភ្លាម ប្រតិកម្មអន្តរជាតិ តាំងពីទ្វីបអាមេរិក ឆ្លងអឺរ៉ុប ដល់អាស៊ី ដើមបូព៌ា ព្រមទាំងអាហ្វ្រិក បានធ្លាក់មកជាបន្តបន្ទាប់។
នាយករដ្ឋមន្ត្រីកាណាដា បានបង្ហោះសារទ្វីតមុនគេ អបអរជោគជ័យរបស់លោកចូបៃដិន។
សហភាពអឺរ៉ុប នាំមុខដោយប្រធានគណៈកម្មការ ប្រធានក្រុមប្រឹក្សាអឺរ៉ុប ប្រធានាធិបតីបារាំង ប្រមុខរដ្ឋាភិបាលអាល្លឺម៉ង់ ... បានលើកសរសើរប្រធានាធិបតីជាប់ឆ្នោតថ្មី លោកចូបៃដិន ជាមួយសេចក្តីសង្ឃឹមថាអឺរ៉ុបនិងអាមេរិកនឹងពង្រឹងចំណងសម្ព័ន្ធភាពអន្តរអាត្លង់ទិកជាប្រពៃណីនិងមិនអាចជំនួសបាន ឱ្យក្លាយជាដៃគូរឹងមាំឡើងវិញ បន្ទាប់ពីមានទំនាក់ទំនងរអាក់រអួលអស់បួនឆ្នាំក្រោមអាណត្តិរបស់លោក ដូណាល់ ត្រាំ។ អាមេរិកជាសកម្មជនដ៏រឹងមាំរបស់អូតង់ អូតង់អន្ទះសាចង់ធ្វើការជាមួយលោក ចូ បៃដិន ព្រោះបើអូតង់រឹងមាំ គឺល្អទាំងសម្រាប់អឺរ៉ុបនិងអាមេរិក។ អង់គ្លេសត្រៀមជាស្រេចនឹងសហការជាមួយសហរដ្ឋអាមេរិករបស់ចូបៃដិន ជាពិសេសលើបញ្ហាអាកាសធាតុ។ នេះជាសាររបស់នាយករដ្ឋមន្ត្រីអង់គ្លេស។
“ខ្ញុំសូមអបអរជោគជ័យរបស់លោកចូបៃដិន និងលោកស្រី កាម៉ាឡា ហារី ជាប្រធានាធិបតីនិងអនុប្រធានាធិបតីជាប់ឆ្នោតថ្មី ! វ៉េណេស៊ុយអេឡាត្រៀមជានិច្ចនឹងចរចា និងត្រូវរ៉ូវជាមួយប្រជាពលរដ្ឋនិងរដ្ឋាភិបាលអាមេរិក។ នេះជាសាររបស់ប្រធានាធិបតីនីកូឡាម៉ាឌុរ៉ូ។ ឯលោកហ្កៃដូមេបក្សប្រឆាំងវ៉េណេស៊ុយអេឡា ក៏បានអបអរជោគជ័យរបស់លោកបៃដិនដែរ ដោយសង្ឃឹមថានឹងអាចធ្វើការរួមគ្នាជាមួយអាមេរិកដើម្បីស្តារលទ្ធិប្រជាធិបតេយ្យ សេរីភាព និងសិទ្ធិមនុស្សជូនពលរដ្ឋវ៉េណេស៊ុយអេឡា។
“សូមអបអរលោកចូបៃដិន និងលោកស្រី ខាម៉ាឡា ហារី ! យើងស្គាល់គ្នាជាង៤០ឆ្នាំមកហើយ! ខ្ញុំដឹងថាអ្នកជាមិត្តដ៏ប្រពៃរបស់អ៊ីស្រាអែល។ ជាមួយអ្នក ចំណងមិត្តពិសេសសហរដ្ឋអាមេរិកនិងអ៊ីស្រាអែលនឹងកាន់តែរឹងបន្តឹង”។ នេះជាសាររបស់នាយករដ្ឋមន្ត្រីអ៊ីស្រាអែលនេតាន់យ៉ាហ៊ូ។ អាជ្ញាធរប៉ាឡេស្ទីនដែលបានផ្តាច់ទំនាក់ទំនងជាមួយរដ្ឋាភិបាលលោកដូណាល់ ត្រាំ បានសម្តែងអំណរនិងប្រកាសរង់ចាំសហការជាមួយប្រធានាធិបតីជាប់ឆ្នោតថ្មីបៃដិនដើម្បីធានាស្វែងរកយុត្តិធម៌ជូនពលរដ្ឋប៉ាឡេស្ទីន។
នាយករដ្ឋមន្ត្រីជប៉ុន រីករាយនឹងធ្វើការជាមួយលោកចូ បៃដិន ដើម្បីពង្រឹងសន្តិភាព សេរីភាព និងភាពរុងរឿងក្នុងតំបន់អាស៊ីប៉ាស៊ីហ្វិក និងតំបន់ផ្សេងទៀត។ ចំណែកឥណ្ឌាវិញ ជាមួយនឹងសារអបអរប្រធានាធិបតីជាប់ឆ្នោតថ្មី លោក ណារិនដ្រា ម៉ូឌី បានគូសបញ្ជាក់អំពីមោទនភាពដ៏ធំធេងពិសេសរបស់ឥណ្ឌា ចំពោះលោកស្រី ខាម៉ាឡា ហារី ព្រោះលោកស្រី មានម្តាយដើមកំណើតឥណ្ឌា។
ក្រៅអំពីសារអបអររីករាយរបស់ថ្នាក់ដឹកនាំប្រទេសជាច្រើន ប្រធានាធិបតីម៉ិចស៊ិក បានបង្ហោះសាររំលឹកថាដូចជាឆាប់ពេកនិងខ្វះការប្រុងប្រយ័ត្នដែលត្រូវសរសើរអបអរលោកបៃដិន ខណៈដែលចំណោទតាមផ្លូវច្បាប់មិនទាន់ដោះស្រាយចប់សព្វគ្រប់។ ស្លូវ៉ានី ដែលសមាជិកសហភាពអឺរ៉ុបមួយដែរ បានបញ្ចេញប្រតិកម្មថាតុលាការអាមេរិកមិនទាន់ចាប់ផ្តើមសម្រេចផង សារព័ត៌មាននាំគ្នាប្រកាសជោគជ័យទៅហើយ។ ហើយការអបអរធ្លាក់មកពីគ្រប់ទិសទី !
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ