អ្នកជំនាញព្រមានពីការកើតមាន អំពើហិង្សា នៅក្រោយការបោះឆ្នោតប្រធានាធិបតីអាមេរិក
នៅថ្ងៃទី៣វិច្ឆិកា ប្រជាជនអាមេរិកទៅបោះឆ្នោត ក្នុងចំនួនដ៏ច្រើនមិនធ្លាប់មានក្នុងប៉ុន្មានទសវត្សរ៍មកនេះ។ នៅក្នុងកាលៈទេសៈ ជំងឺរាតត្បាតកូវីដ ១៩ ដែលបានសម្លាប់មនុស្សជាង ២សែននាក់ នៅអាមេរិក ការបោះឆ្នោតជ្រើសរើសប្រធានាធិបតី ថ្មី ត្រូវកត់សំគាល់ដោយការបោះឆ្នោត ជាមុន ជាពិសេសតាមរយៈសំបុត្រ។ លទ្ធផលឆ្នោតបឋម ដ៏ប្រកៀកប្រកិតរវាងលោកដូណាល់ ត្រាំ និងលោកចូ បៃដិន រឹតតែធ្វើឲ្យគេព្រួយបារម្ភថា នឹងអាចកើតមានភាពតានតឹងរវាងអ្នកគាំទ្ររបស់បេក្ខជនទាំងពីរ រហូតដល់មានការប្រឈមមុខដាក់គ្នាដ៏ហិង្សា នៅក្រោយថ្ងៃបោះឆ្នោត។
ចុះផ្សាយនៅថ្ងៃ៖
ជាមួយលទ្ធផលឆ្នោតបឋមដ៏ប្រកៀកប្រកិតគ្នា ការបោះឆ្នោតប្រធានាធិបតីអាមេរិកបានបង្កើតបរិយាកាសដ៏តានតឹងមិនធ្លាប់មានក្នុងប្រវត្តិបោះឆ្នោត នៅអាមេរិក។ ជាលើកទី១ នៅអាមេរិក អ្នកជំនួញ នៅទីក្រុងញូវយ៉ក វ៉ាស៊ីនតោន និងនៅតាមទីក្រុងធំៗ ចាប់ផ្តើមបិទក្តារ ការពារហាងទំនិញ ក្នុងក្តីបារម្ភខ្លាចថា នឹងអាចកើតមានអំពើហិង្សា នៅក្រោយថ្ងៃបោះឆ្នោត។
តាមរបាយការណ៍ របស់អង្គការCrisis Groupe ដែលមានបេសកកម្ម បង្ការ និងជួយដោះស្រាយសម្រាប់ជម្លោះអន្តរជាតិ ការបោះឆ្នោត ប្រធានាធិបតីឆ្នាំ ២០២០មានការប្រឈមខ្លាំង ជាងពេលណាៗទាំងអស់។ នៅក្នុងសង្គមអាមេរិកដែលបែកបាក់ បែងចែក ជាពីរក្រុមប្រឆាំងគ្នា អំពើហិង្សា អាចកើតមាននៅក្នុងបោះឆ្នោត ឬនៅក្នុងពេលរាប់សន្លឹកឆ្នោត ដែលត្រូវពន្យារពេលដោយសារ សន្លឹកឆ្នោត បោះតាមសំបុត្រ។
នៅយប់ថ្ងៃអង្គារ នៅពេលការរាប់សន្លឹកឆ្នោត នៅមិនទាន់ចប់សព្វគ្រប់ លោកដូណាល់ ត្រាំ បានប្រកាសនៅមុខ អ្នកគាំទ្ររបស់លោកនៅសេតវិមានថា លោកបានឈ្នះឆ្នោត ប៉ុន្តែ មានមនុស្សមួយក្រុមតូចបានព្យាយាមលួចឆ្នោតរបស់លោក។ នៅពេលលទ្ធផលឆ្នោត នៅមិនទាន់ចេញជាផ្លូវការ ដោយសារការបន្តរាប់សន្លឹកឆ្នោត ដែលបោះតាមសំបុត្រ លោកដូណាល់ ត្រាំ បានប្រាប់ឲ្យគេឈប់រាប់សន្លឹកឆ្នោត នៅតាមរដ្ឋដែលលោកកំពុងនាំមុខ និងព្រមានប្តឹងទៅតុលាការកំពូល។ នៅក្នុងសារTwitter នៅព្រឹកថ្ងៃពុធ លោកដូណាល់ ត្រាំ នៅបានសរសេរទៀតថា “លោកបានឈ្នះ នាំមុខ ដាច់ឆ្ងាយ ប៉ុន្តែ គេបានព្យាយាមលួចសន្លឹកឆ្នោត។ លោកនឹងមិនបណ្តោយឲ្យកើតមាននោះទេ”។ សារTwitter របស់លោកដូណាល់ ត្រាំ ត្រូវបានក្រុមហ៊ុនTwitter ចាប់ដាក់សញ្ញាឲ្យពិនិត្យពិច័យ ក្នុងន័យថា អាចជាសារបោកប្រាស់។
តាមរបាយការណ៍ ដែលCrisis Group ចេញផ្សាយ កាលពីថ្ងៃទី ៣០តុលា លោក ដូណាល់ ត្រាំ ដែលជាប្រធានាធិបតីតំណាងឲ្យការបែកបាក់ក្នុងសង្គមអាមេរិក គឺ ជាកត្តាចំបង ញុះញង់ឲ្យកើតមានអំពើហិង្សា។ “លោកដូណាល់ ត្រាំ ធ្លាប់បាននិយាយជាច្រើនដង ថា បើលោកចាញ់ឆ្នោត ហេតុផលមានតែម្យ៉ាង គឺ មកតែពីមានការលួចបន្លំសន្លឹកឆ្នោត។ ការអះអាងរបស់លោកដូណាល់ ត្រាំ បានធ្វើឲ្យបដិសេធ មិនសន្យាផ្ទេរអំណាចដោយសន្តិភាព ក្នុងករណីលោកចាញ់ឆ្នោត។
លោកដូណាល់ត្រាំ ធ្លាប់បានចោទក្រុមឆ្វេងនិយមជ្រុល ថាជាអ្នកបង្កអំពើហិង្សា ដុតវាយបំផ្លាញហាងទំនិញ។ លោកដូណាល់ ត្រាំ នៅបានបង្កើតបរិយាកាសភ័យខ្លាចដោយផ្សព្វផ្សាយថា អាមេរិកនឹងក្លាយជាប្រទេសសង្គមនិយម កុម្មុយនិស្តដូចជាវេណេស៊ុយអេឡា ឬថា សាលារៀន ក្រុមហ៊ុនត្រូវបិទទ្វារបើសិនលោកចូ បាយដិនឈ្នះឆ្នោត។
មួយវិញទៀត គេវាយតម្លៃថា ទំនាក់ទំនង ដ៏ស្រពិចស្រពិលរវាងលោកដូណាល់ ត្រាំ ជាមួយក្រុមស្តាំនិយមជ្រុល ដូចជាក្រុមស្បែកស ប្រកាន់រើសអើងពូជសាសន៍ រឹតតែធ្វើឲ្យលទ្ធភាពផ្ទុះកើតមានអំពើហិង្សាមានកាន់តែច្រើន។ នៅក្នុងពេលធ្វើយុទ្ធនាការឃោសនាបោះឆ្នោត លោកដូណាល់ ត្រាំ មិនបាននិយាយថ្កោលទោស ក្រុមស្តាំនិយមជ្រុល ប៉ុន្តែ បែរជាប្រាប់ឲ្យពួកគេ ដកថយ និងរង់ចាំ។ តាមក្រសួងសន្តិសុខផ្ទៃក្នុង ក្រុមស្តាំនិយមជ្រុល ជាក្រុមរើសអើងប្រកាន់ពូជសាសន៍ដ៏គ្រោះថ្នាក់ ដែលអាចគំរាមកំហែង បង្កគ្រោះថ្នាក់ដល់ជីវិត នៅប្រទេសអាមេរិក។
ទីភ្នាក់ងារចារកម្មអាមេរិកធ្លាប់បានព្រមានពីគ្រោះថ្នាក់ និងសង្រ្គាមស៊ីវិលបង្កឡើងដោយក្រុមជ្រុលនិយម នៅទឹកដីអាមេរិក។ តាមសមាគមឧស្សាហកម្មជំនួញអាវុធ ការលក់ជួញដូរអាវុធបានកើនឡើងខ្លាំងចាប់តាំងពីដើមឆ្នាំ។ គិតចាប់តាំងពីខែមករា រហូតដល់ខែកញ្ញាឆ្នាំ ២០២០ គេបានលក់អាវុធ ប្រមាណ ១៦,៧លានដើម ពោលគឺស្មើនឹងរយៈពេល ពេញ១ឆ្នាំ ២០១៩។ អ្វីដែលគួរឲ្យកត់សំគាល់ ៤០ភាគរយនៃអាវុធ ដែលគេលក់នៅក្នុង រយៈពេល៤ខែ ដើមឆ្នាំនេះ ធ្លាក់ទៅក្នុងដៃរបស់អ្នកដែលមិនធ្លាប់មានប្រវត្តិទិញអាវុធ ដាក់ខ្លួនទាល់តែសោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ