លទ្ធផលស្ទង់មតិបោះឆ្នោតប្រធានាធិបតីអាមេរិក៖ លោក បាយដិន នាំមុខលោក ត្រាំ
ថ្ងៃអង្គារ ទី៣វិច្ឆិកា ជាថ្ងៃបោះឆ្នោតប្រធានាធិបតីសហរដ្ឋអាមេរិក។ លទ្ធផលស្ទង់មតិ គិតត្រឹមថ្ងៃអាទិត្យ គឺបង្ហាញថា លោក ចូ បាយដិន បេក្ខជនបក្សប្រជាធិបតេយ្យ មានពិន្ទុល្អជាង នាំមុខលោក ដូណាល់ ត្រាំ បេក្ខជនបក្សសាធារណរដ្ឋ។ ទោះបីយ៉ាងនេះក្តី លោកប្រធានាធិបតីជិតផុតអាណត្តិ ដូណាល់ ត្រាំ បានស្តីបន្ទោសលទ្ធផលនៃការស្ទង់មតិនេះ ថា កុហកបោកប្រាស់ និងថា លោកនឹងឈ្នះឆ្នោតធ្វើជាប្រមុខរដ្ឋអាមេរិក ៤ឆ្នាំទៀត។
ចុះផ្សាយនៅថ្ងៃ៖
ស្តាប់ - ០២:៤០
លទ្ធផលស្ទង់មតិចុងក្រោយ ជាច្រើន បង្ហាញថា បេក្ខជន ចូ បាយដិន នាំមុខ លោក ត្រាំ។ គេមិនត្រូវភ្លេចទេថា កាលពី ៤ ឆ្នាំមុន នៅពេលដែលលោក ដូណាល់ ត្រាំ ផ្តួលលោកស្រី គ្លិនតុន ឆ្នាំ២០១៦ ក៏គ្រានោះ លទ្ធផលស្ទង់មតិ បញ្ជាក់ថា លោកស្រី គ្លិនតុន នាំមុខ លោក ត្រាំ ដែរ។ ដូច្នេះហើយ ទើបមានមនុស្សច្រើននាក់ បញ្ជាក់ការយល់ឃើញថា ការស្ទង់មតិ គឺមិនប្រាកដថាអាចកំណត់បានជាក់ច្បាស់ថា នរណាជាអនាគតប្រធានាធិបតីសហរដ្ឋអាមេរិក នោះឡើយ។
ចំពោះមហាសេដ្ឋកិច្ចអចលនទ្រព្យ ដូណាល់ ត្រាំ គឺលោកបដិសេធទាត់ចោលលទ្ធផលស្ទង់មតិថ្នាក់ជាតិទាំងឡាយណា ដែលថាលោកមានពិន្ទុអន់។ លោកថែមទាំងវាយបកថា នោះជាការស្ទង់មតិបោកប្រាស់ ហើយព្រោះតែដូច្នេះហើយ ទើបធ្វើឱ្យប្រវត្តិសាស្ត្រវិលជាន់ដានចាស់ ពោលគឺនឹងធ្វើឱ្យលោកឈ្នះឆ្នោត ដូច៤ឆ្នាំមុន។
បុរសវ័យ៧៤ឆ្នាំរូបនេះ ប្រឹងធ្វើមេទ្ទីញឃោសនាសម្បើមណាស់រយៈប៉ុន្មានថ្ងៃចុងក្រោយនេះ។ គ្រាន់តែថ្ងៃអាទិត្យ លោក ត្រាំ ធ្វើមេទ្ទីញ ដល់ទៅ៥កន្លែង និងធ្វើដំណើររាប់ពាន់គីឡូម៉ែត្រ ប្រមាណ៣ ៥០០គីឡូម៉ែត្រ ក្នុងរដ្ឋគន្លឹះៗ ៥ ឯណោះ ដូចជា Michigan, Iowa, ការ៉ូលីនខាងជើង, Georgie, ហ្ល័រីដា។ អ្នកកាសែតក្នុងស្រុកសម្គាល់មើលឃើញថា លោក ត្រាំ ហាក់គ្មានហត់នឿយសោះ។ នៅថ្ងៃចន្ទទៀត លោក ត្រាំ នឹងធ្វើមេទ្ទីញឃោសនា ៥ មេទ្ទីញ ថែមទៀត។ ប្រពន្ធ និងកូនៗរបស់លោក ក៏បានជួយប្តីនិងឪពុក ដោយរៀបចំឃោសនាតែរៀងៗខ្លួនដែរ។ លោកជំទាវទី១ Melania Trump ឃោសនាពីថ្ងៃសៅរ៍ នៅរដ្ឋ Wisconsin ហើយ អនុប្រធានធិបតីលោក Mike Pence បានជួយឃោសនាឱ្យលោកត្រាំ នៅរដ្ឋ ការ៉ូលីនខាងជើង។
បេក្ខជនបក្សប្រជាធិបតេយ្យ ចូ បាយដិន អាយុ៧៧ឆ្នាំវិញ គឺបានលោក បារ៉ាក់ អូបាម៉ា អតីតប្រធានាធិបតីស្បែកខ្មៅ ជួយដើរឃោសនា ជាមួយ ជាប់តែម្តង នៅចុងសប្តាហ៍នេះ។
នៅសហរដ្ឋអាមេរិក ប្រជាពលរដ្ឋមានឈ្មោះបោះឆ្នោត មានចំនួន ២៣០ លាននាក់។ ក្នុងនោះ ៩០លាននាក់ បានបោះឆ្នោតទុកជាមុន រួចហើយ គិតត្រឹមថ្ងៃអាទិត្យ។
តាមការស្ទង់មតិប្រមើលមើលរបស់កាសែតបារាំង Le Journal សហការជាមួយ Léger គឺគេអាចបែងចែកក្រុមអ្នកបោះឆ្នោតនោះ បានជាពីរក្រុម។ អ្នកដែលបោះឆ្នោតឱ្យលោក បាយដិន គឺជាទូទៅ ច្រើនជា មនុស្សស្រី ជាអ្នករៀនសូត្រ និងអ្នកនៅតំបន់ឆ្នេរ។ ចំណែកអ្នកបោះឆ្នោតឱ្យលោកត្រាំ គឺច្រើនតែប្រុសៗ មិនសូវបានទទួលការរៀនសូត្រ ហើយនៅទីជនបទ។
មានការប្រទាញប្រទង់គ្នាសម្បើមណាស់ រវាងអ្នកគាំទ្រខាងក្រុមសាធារណរដ្ឋ និងខាងប្រជាធិបតេយ្យ។ ការបោះឆ្នោតលើកនេះ ត្រូវក្រុមអ្នកនយោបាយនិងកាសែតបច្ចិមលោក ពិពណ៌នាយ៉ាងញឹកញយថា ក្នុងអាណត្តិលោកត្រាំ សង្គមអាមេរិក ត្រូវបែកបាក់ ហាក់ដូចត្រូវហែកជាពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ