លោកដូណាល់ ត្រាំ ឆ្លងជំងឺកូវីដ៖ តើនឹងប៉ះពាល់យ៉ាងណាដល់អាមេរិក និងការបោះឆ្នោតប្រធានាធិបតី?
ប្រធានាធិបតីអាមេរិក លោកដូណាល់ ត្រាំ នៅព្រឹកថ្ងៃសុក្រនេះបានសរសេរក្នុងសារទ្វីតធ័រ ថា លោកនិងភរិយា បានឆ្លងជំងឺកូវីដ នៅក្រោយលទ្ធផលតេស្តវិជ្ជមាន កាលពីល្ងាចថ្ងៃព្រហស្បតិ៍។ ភ្លាមៗ គ្រូពេទ្យប្រចាំរបស់ប្រធានាធិបតី បានចេញសេចក្តីថ្លែងការណ៍ ដែលបញ្ជាក់ថា លោកដូណាល់ ត្រាំ និងភរិយា គឺលោកស្រី មេឡានៀ ត្រាំ មានសុខភាពល្អ និងកំពុងធ្វើចត្តាឡីស័ក នៅសេតវិមាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៨:០៨
នៅក្នុងសារទ្វីតធ័រ នៅព្រឹកថ្ងៃសុក្រ លោកដូណាល់ ត្រាំបានប្រកាសថា តេស្តកូវីដរបស់លោក និងភរិយារបស់លោក វិជ្ជមាន និងកំពុងស្ថិតនៅដាច់ដោយឡែក ឆ្ងាយពីគេឯង នៅសេតវិមាន។ លោកដូណាល់ ត្រាំ ឆ្លងជំងឺកូវីដ នៅចំពេលលោកកំពុងធ្វើយុទ្ធនាការឃោសនាបោះឆ្នោត និងក្នុងកាលៈទេសៈដែលជំងឺកូវីដ សម្លាប់មនុស្សប្រមាណ២សែននាក់ និងឆ្លងទៅមនុស្ស ជាង ៧លាននាក់ នៅអាមេរិក។
ចាប់តាំងពីផ្ទុះជំងឺរាតត្បាត កូវីដ សេតវិមានបានបង្កើនការប្រុងប្រយ័ត្ន និងធ្វើតេស្តកូវីដជារៀងរាល់ថ្ងៃ ទៅលើអ្នកដែលចេញចូល ធ្វើការជាប់ស្និទ្ធជាមួយ ប្រធានាធិបតី។ លោកដូណាល់ ត្រាំ និងអនុប្រធានាធិបតី លោកMike Pence ក៏ត្រូវធ្វើតេស្តជាប្រចាំដែរ។
គេមិនដឹងថា តើលោកដូណាល់ ត្រាំ និងភរិយារបស់លោក ឆ្លងជំងឺកូវីដ ពីអ្នកណា និងតាំងពីពេលណានោះទេ។ លោកដូណាល់ ត្រាំ បានធ្វើតេស្តរកជំងឺកូវីដ កាលពីថ្ងៃព្រហស្បតិ៍ ថ្ងៃដែល ទីប្រឹក្សាជំនិតរបស់លោកម្នាក់ គឺអ្នកនាង Hope Hicks បានចាប់ចេញរោគសញ្ញា និងធ្វើតេស្តទៅឃើញ វិជ្ជមានកូវីដ។
លោកដូណាល់ ត្រាំផ្ទាល់មិនបានបញ្ជាក់ថា លោកបានឆ្លងជំងឺកូវីដ ពីទីប្រឹក្សាជំនិតរបស់លោក គឺអ្នកនាង Hope Hicksនោះទេ។ ប៉ុន្តែ នៅមុនពេលចេញលទ្ធផលវិជ្ជមានកូវីដ លោកត្រាំ បញ្ជាក់ នៅក្នុងបទសម្ភាសន៍ជាមួយទូរទស្សន៍ Fox News កាលពីល្ងាចថ្ងៃម្សិលមិញ ថា ទោះជាទីប្រឹក្សាជំនិតរបស់លោក គឺអ្នកនាង Hope Hicks ពាក់ម៉ាសមែន ប៉ុន្តែ លោក និងភរិយារបស់លោកបានចំណាយពេលច្រើនមែនទែន ជាមួយ អ្នកនាងHope។
សូមបញ្ជាក់ថា អ្នកនាង Hope Hicks ដែលធ្លាប់អតីតប្រធានទំនាក់ទំនងរបស់សេតវិមាន បានរួមដំណើរជាប់ជាប្រចាំជាមួយលោកដូណាល់ ត្រាំ នៅក្នុងយុទ្ធនាការឃោសនាបោះឆ្នោត។ នៅថ្ងៃអង្គារដើមសប្ដាហ៍នេះ អ្នកនាង Hope Hicks ធ្វើដំណើរជាមួយលោកប្រធានាធិបតីតាមជើងហោះហើរ Air Force One ទៅកាន់រដ្ឋអូហៃយ៉ូ ដើម្បីចូលរួមការជជែកដេញដោលលើកទី១ រវាងលោកដូណាល់ ត្រាំ និងលោក ចូ បៃដិន។ នៅថ្ងៃពុធ នាងនិងលោកប្រធានាធិបតីបានរួមដំណើរទៅធ្វើយុទ្ធនាការឃោសនាបោះឆ្នោតនៅរដ្ឋមីនីសូតាថែមទៀត។ ទើបតែនៅថ្ងៃព្រហស្បតិ៍ដែលនាងចាប់មានអាការៈ មិនស្រួលខ្លួន និងធ្វើតេស្តទៅឃើញវិជ្ជមានកូវីដ។
លោកដូណាល់ ត្រាំ បានពន្លយឲ្យដឹងថា ទីប្រឹក្សាជំនិតរបស់លោកអាច ឆ្លងកូវីដ នៅអំឡុងពេល ឱបស្វាគមពួកទាហាន នៅពេលចុះធ្វើយុទ្ធនាការបោះឆ្នោត។
មានអាយុ៧៥ឆ្នាំ លោកដូណាល់ ត្រាំ ត្រូវចាត់ចូលក្នុងក្រុមមនុស្សដែលងាយប្រឈម រងគ្រោះដោយសារជំងឺកូវីដ។
អាយុ និងកាយសម្បទារ សុខភាព ដើរតួសំខាន់ នៅក្នុងកាលៈទេសៈ ជំងឺរាតត្បាតកូវីដ។ រហូតមកដល់ថ្ងៃនេះ អាមេរិកមានមនុស្ស ស្លាប់ដោយសារកូវីដ ប្រមាណ ២សែននាក់ និងមានអ្នកឆ្លង ជាង ៧លាននាក់។ អ្នកជំងឺ ៨នាក់ ក្នុងចំណោម១០នាក់ដែលស្លាប់ដោយសារកូវីដ នៅអាមេរិក មានអាយុចាប់ពី៦៥ឆ្នាំឡើងទៅ។
កូវីដ១៩ កាចសាហាវ វាយប្រហារខ្លាំងតែទៅលើអ្នកដែលមានអាយុច្រើន ហើយនិងអ្នកដែលមានជំងឺជាប់ខ្លួន ដូចជាទឹកនោមផ្អែម អ្នកលើសទំងន់ជាដើម។ នៅក្នុងករណីលោកដូណាល់ ត្រាំ លោកមានអាយុ ៧៤ឆ្នាំ និងត្រូវគេចាត់ទុកជាមនុស្សលើសទំងន់ ព្រមទាំងមានបញ្ហាកាឡេស្តេរ៉ូលកើនឡើងផង។ ដូច្នេះ លោកអាចប្រឈមខ្លាំងនឹងការវាយប្រហាររបស់ជំងឺកូវីដ។ សួរថា តើលោកអាចធ្លាក់ខ្លួនឈឺធ្ងន់ដែរឬទេ? រឿងនេះ គេនៅមិនច្បាស់នោះទេ។ គេត្រូវរង់ចាំ មើលការវិវឌ្ឍ នៅប៉ុន្មានថ្ងៃទៅមុខទៀត។
លោកដូណាល់ ត្រាំ ដែលជាមេដឹកនាំរបស់ប្រទេសមហាអំណាចពិភពលោកអាចមានគ្រូពេទ្យ ប្រព័ន្ធព្យាបាល សំបូរបែប ដែលមនុស្សធម្មតាមិនបានទទួល ប៉ុន្តែ ជំងឺកូវីដនេះកាចសាហាវសម្លាប់មនុស្សមិនរើសឋានៈ អ្នកមាន អ្នកក្រនោះទេ។ អតីតបេក្ខជនប្រធានាធិបតី ដែលស្និទ្ធលោកលោកដូណាល់ ត្រាំ បានស្លាប់ម្នាក់ហើយ ដោយសារតែ ជំងឺកូវីដ។
នៅមុនលោកដូណាល់ ត្រាំ មានមេដឹកនាំរបស់ប្រទេស២បានធ្លាក់ខ្លួនឆ្លង និងឈឺចូលមន្ទីពេទ្យដោយសារកូវីដ នោះ គឺប្រធានាធិបតីប្រេស៊ីល លោកបុលសូណារ៉ូ ហើយនិងនាយករដ្ឋមន្រ្តីអង់គ្លេស លោកបូរីស ចនសុន។ នាយករដ្ឋមន្រ្តីអង់គ្លេស ដែលមានបញ្ហាលើសទម្ងន់ធ្លាប់បាននិយាយសារភាព ថា លោកវិះតែនឹងស្លាប់ ខ្លួន ដោយសារជំងឺកូវីដ។
ក្រុមគ្រូពេទ្យរបស់សេតវិមាន វិញ ធ្លាប់បានអះអាងហើយ ការពិនិត្យសុខភាពរបស់លោកដូណាល់ ត្រាំ កាលពី១ឆ្នាំមុន បានបង្ហាញថា លោកដូណាល់ ត្រាំ សុខភាពល្អរឹងមាំ។ ហើយខុសពីអ្នកផ្សេងដែលងាយនឹងធ្លាក់ខ្លួនឈឺស្លាប់ ដោយសារកូវីដ ប្រធានាធិបតីអាមេរិក មានសេវាព្យាបាលដ៏ល្អបំផុត ដោយគេមិនត្រូវព្រួយបារម្ភនោះទេ។
នៅពេលកំពុងធ្វើចត្តាឡីស័ក លោកដូណាល់ ត្រាំ អាចបន្តធ្វើការ នៅសេតវិមាន។ លោកបានលុបចោលបេសកកម្ម និងដំណើរឃោសនាបោះឆ្នោត ជាច្រើន លើកលែងតែការប្រជុំតាមវីដេអូ ដែល ផ្តោតសំខាន់លើការផ្តល់ជំនួយដល់មនុស្សចាស់ នៅក្នុងសម័យកូវីដ។
នៅក្នុងករណី ប្រធានាធិបតី ធ្លាក់ខ្លួនឈឺមិនអាចដឹកនាំប្រទេស ច្បាប់អាមេរិក 25 Amendment បានចែងថា ការគ្រប់គ្រងប្រទេសត្រូវធ្លាក់ទៅលើអនុប្រធានាធិបតី គឺលោកMike Pence ប៉ុន្តែ បើសិន លោកMike Pence ធ្លាក់ខ្លួនឈឺ ដែរនោះ នោះគឺប្រមុខដឹកនាំសភាអ្នកតំណាងរាស្ត្រ លោកស្រីNancy Pelosi ដែលមានសិទ្ធិដឹកនាំអាមេរិក នៅពេលប្រធានាធិបតីនិងអនុប្រធានាធិបតីខកខានមិនអាចបំពេញកាតព្វកិច្ចរបស់ខ្លួន។
លោកដូណាល់ ត្រាំ ធ្វើតេស្តវិជ្ជមាន កូវីដ នៅចំពេលកំពុងមានយុទ្ធនាការឃោសនាបោះឆ្នោត
នៅសល់តែ ១ខែទៀត ប៉ុណ្ណោះ នឹងមានការបោះឆ្នោត ជ្រើសរើសប្រធានាធិបតី។ បើសិនលោកដូណាល់ ត្រាំ ធ្លាក់ខ្លួន ឈឺ ដោយសារកូវីដ នោះ ចំណោទបន្ទាប់ គឺថា តើលោកនឹងអាចចូលរួមក្នុងការបោះឆ្នោតប្រធានាធិបតី ទៀត ដែរឬទេ។ នេះជាលើកទី១ ដែលកើតមាន រឿងបែបនេះ ក្នុងប្រវត្តិបោះឆ្នោតប្រធានាធិបតីអាមេរិក។
ដំណឹងថា លោកដូណាល់ ត្រាំ ឆ្លងកូវីដ គឺបានប៉ះពាល់ខ្លាំង ដល់យុទ្ធនាការឃោសនាបោះឆ្នោតរបស់លោកដូណាល់ ត្រាំ ហើយនិងនយោបាយរបស់លោក នៅក្នុងរឿងគ្រប់គ្រងកូវីដ។ លោកដូណាល់ ត្រាំដែលកំពុងបាត់បង់សំឡេងគាំទ្រ ច្រើនរួចហើយ ប្រៀបធៀបនឹងគូប្រជែង គឺ លោកចូ បៃដិន នឹងត្រូវខាតបង់ប្រយោជន៍ បាត់បង់សំឡេងគាំទ្រ ច្រើន តទៅទៀត ដោយសារតែលោកមិនអាចចុះទៅឃោសនាបានតាមកាលកំណត់។ សូមបញ្ជាក់ថា នៅក្រោយ លោកដូណាល់ ត្រាំធ្វើតេស្ត មានជំងឺកូវីដ ក្រុមឃោសនារបស់លោកបានលុបចោល ពិធីជប់លៀងរៃអង្គាសលុយនៅទីក្រុងវ៉ាស៊ីនតោន ហើយនិងលុបចោលយុទ្ធនាការឃោសនា នៅរដ្ឋFlorida ដែលត្រូវធ្វើ នៅថ្ងៃសុក្រនេះ។ ដោយសារតែឆ្លងកូវីដ លោកត្រូវធ្វើចត្តាឡីស័ក រយៈពេល ១៤ថ្ងៃ ខាតពេល ខកខាន មិនអាចចុះធ្វើយុទ្ធនាការឃោសនាបោះឆ្នោត ជាពិសេសនៅក្នុងរដ្ឋសំខាន់បី ដូចជា អារីហ្សូណា វីស្កូស៊ីន និងជាពិសេស រដ្ឋFlorida ដែលជាអ្នកសម្រេចជោគវាសនាសំឡេងឆ្នោតរបស់បេក្ខជនប្រធានាធិបតី។ ដោយសារតែចតា្តឡីស័ក ដល់ទៅ ១៤ថ្ងៃ លោកដូណាល់ ត្រាំ នឹងអាចខកខាន មិនអាចចូលរួមក្នុងការពិភាក្សាដេញដោលរបស់បេក្ខជនប្រធានាធិបតី ដែលត្រូវរៀបចំធ្វើនៅថ្ងៃទី១៥តុលា។
ដំណឹងលោកដូណាល់ ត្រាំ ឆ្លងជំងឺកូវីដបានធ្វើឲ្យទីផ្សារភាគហ៊ុនអាមេរិក និងនៅអឺរ៉ុបធ្លាក់ចុះ។ អ្នកវិនិយោគមួយចំនួនចាប់ផ្តើមគិតថា ជ័យជំនះក្នុងការបោះឆ្នោតប្រធានាធិបតីអាមេរិកនឹងបានទៅលោកចូ បៃដិន នៅពេលលោកដូណាល់ ត្រាំ ឆ្លងជំងឺកូវីដ។
ឆ្លងជំងឺកូវីដ លើកនេះ នឹងធ្វើឲ្យលោកដូណាល់ ត្រាំ បាក់មុខ ហើយនឹងខូចផែនការនយោបាយ និងការអះអាងទាំងអម្ប៉ាលម៉ានរបស់លោក ដែលថា ជំងឺកូវីដ មិនគ្រោះថ្នាក់ ហើយនិងកំពុងតែជិតសាបរលាបទៅវិញ នៅអាមេរិក។
លោកដូណាល់ ត្រាំ អរិភាព មិនសូវពាក់ម៉ាស មិនឲ្យតម្លៃ ទៅលើការក្សាគម្លាត សង្គម ដោយលើកទឹកចិត្តឲ្យមនុស្សចូលរួមក្នុងយុទ្ធនាការឃោសនារបស់លោក។ អ្នកចូលរួមគាំទ្រលោកភាគច្រើន គ្មានពាក់ម៉ាស នៅកន្លែងជួបជុំឃោសនារបស់លោកនោះទេ។ លោកដូណាល់ ត្រាំ នៅបានរិះគន់អ្នកដែលពាក់ម៉ាស ដូចជាលោកចូ បៃដិន ជាដើម នៅក្នុងវេទិកាដេញដោល កាលពីសប្តាហ៍មុន។ លោកនៅបាន រិះគន់ប្រឆាំង អភិបាលរដ្ឋដែលនៅបន្តបិទសាលារៀន បិទភោជនីយដ្ឋាន ដោយសារតែកូវីដ។
នៅពេលលោកដូណាល់ ត្រាំ ឆ្លងកូវីដ ខ្លួនឯង ហើយនិងអាចប្រឈម ធ្លាក់ខ្លួនឈឺ ដោយសារតែអាយុ យ៉ាងដូច្នេះ សំដីបញ្ចុះបញ្ចូលរបស់លោកដូណាល់ ត្រាំ ទៅកាន់អ្នកគាំទ្រដែលថា ជំងឺកូវីដ កំពុងរលាយបាត់ទៅវិញ បានក្លាយជាសំដី ដែលសាប គ្មានន័យ គ្មានអ្នកស្តាប់ជឿ តទៅទៀត។
នាយករដ្ឋមន្រ្តីអង់គ្លេសធ្លាប់ធូររលុង មិនទាន់បិទអង់គ្លេស និងបានបណ្តោយឲ្យជំងឺកូវីដ ឆ្លងច្រើននៅក្នុងប្រទេស។ ប៉ុន្តែ នៅក្រោយ ធ្លាក់ខ្លួន ឈឺធ្ងន់ នៅមន្ទីរពេទ្យ វិះតែនឹងស្លាប់ខ្លួន លោកបានផ្លាស់ប្តូរជំហរទាំងស្រុង ដោយបានត្រលប់មកឲ្យតម្លៃលើសុខភាព ជាជាង សេដ្ឋកិច្ច តាមរយៈ ការចាត់វិធានការតឹងរ៉ឹងបំផុត ដើម្បីកាត់បន្ថយការចម្លងជំងឺកូវីដ នៅអង់គ្លេស។ តើលោកដូណាល់ ត្រាំ ដែលមិនព្រមជឿការអះអាងរបស់អ្នកវិទ្យាសាស្រ្ត មើលប្រមាថជំងឺកូវីដ នឹងអាចផ្លាស់ប្តូរជំហររបស់ខ្លួនមកវិញ ដូចនាយករដ្ឋមន្រ្តីអង់គ្លេស ដែរឬទេ? រឿងនេះ គេនៅចាំមើលតទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ