បោះឆ្នោតប្រធានាធិបតីអាមេរិក ៖ លោកត្រាំ កំពុងកែសម្តីស្តីពីរឿងអាស្រូវប្រកាន់ពូជសាសន៍
កម្មវិធីជជែកដេញដោលជាលើកទីមួយរវាងបេក្ខជនប្រធានាធិបតីទាំងពីរ សម្រាប់ការបោះឆ្នោតប្រធានាធិបតី ប្រព្រឹត្តទៅយ៉ាងដ៏ច្របូកច្របល់បំផុតមក ពេលនេះលោកដូណាល់ ត្រាំ កំពុងរិះរកវិធីកែប្រែសម្តីរបស់លោកទាក់ទងនឹងក្រុមស្តាំជ្រុលនិយមស្បែកស ដែលលោកមិនបានបដិសេធមិនថ្កោលទោស នៅពេលឆ្លើយនឹងសំណួររបស់អ្នកសម្របសម្រួល។ សម្រាប់លោកចូ បៃដិន បេក្ខជនប្រធានាធិបតីបក្សប្រជាធិបតេយ្យវិញ បានបរិហារថា “ជាភាពអាម៉ាសជាតិ”។ ចំណែកគណៈកម្មការទទួលបន្ទុកការបោះឆ្នោត គ្រោងនឹងធ្វើការប្តូរផ្លាស់វិធាននៃការតស៊ូមតិលើកក្រោយ។
ចុះផ្សាយនៅថ្ងៃ៖
ស្តាប់ - ០១:៤៧
ប្រឈមនឹងប្រតិកម្មដ៏ព្រោងព្រាតក្នុងប្រព័ន្ធសង្គម ពីសំណាក់ពលរដ្ឋអាមេរិកទូទៅផង និងពីសំណាក់សកម្មជនក្នុងជួរបក្សសាធារណរដ្ឋដូចគ្នាផង លោកប្រធានាធិបតីអាមេរិក ដូណាល់ ត្រាំ បានអំពាវនាវនៅឱ្យក្រុមប្រដាប់អាវុធស្តាំជ្រុលនិយម ដែលមានជំនឿថាជនស្បែកសមានប្រៀបជាងគេ ដកខ្លួនចេញ និងកុំមកដណ្តើមការងាររបស់ភ្នាក់ងារប៉ូលិស។ ជាសេចក្តីអំពាវនាវដែលធ្វើឡើង ដើម្បីបញ្ជាក់ជំហរនិងបំភ្លឺនូវឃ្លាដ៏ស្រពិចស្រពិលមួយ ដែលលោក ត្រាំ បានឆ្លើយទៅកាន់អ្នកសម្របសម្រួលកម្មវិធីតស៊ូមតិជាមួយបេក្ខជនចូដៃដិន។ នៅល្ងាចនោះ អ្នកសម្របសម្រួលបានសួរថាតើលោកដូណាល់ ត្រាំ ត្រៀមនឹងធ្វើការថ្កោលទោសក្រុមជ្រុលនិយមស្បែកសដែរឬទេ ? លោកបានឆ្លើយយ៉ាងខ្លីថា “អូខេProud Boys ថយ ហើយត្រៀម”!
ពាក្យដ៏ខ្លីមួយឃ្លានេះ ត្រូវបានធ្វើក្រុមជ្រុលនិយមប្រដាប់អាវុធ ស្បែកស ដែលបង្កើតឡើងនៅឆ្នាំ២០១៦ យកមកប្រើជាពាក្យស្លោករបស់ខ្លួនគេភ្លាម។ សូមបញ្ជាក់ថាក្រុមប្រដាប់អាវុធស្តាំនិយមជ្រុលមួយក្រុមនេះ ធ្លាប់មានរឿងអាស្រូវបង្កអំពើហិង្សាជាច្រើនមកហើយលើក្រុមបាតុករដែលប្រឆាំងនឹងការរើងអើងពូជសាសន៍។
នៅថ្ងៃពុធម្សិលមិញ មុនចេញទៅឃោសនា លោកដូណាល់ ត្រាំ បានអះអាងបន្ថែមទៀតពីសេតវិមាន ថា មិនដឹងថា ក្រុម Proud Boys ជានរណាទេ។ លោកមានជំហរច្បាស់លាស់ណាស់ តាំងពីដើមមក និងតែងតែថ្កោលទោស គ្រប់ទម្រង់នៃឧត្តមភាពនិយម (ជ្រុលនិយមប្រកាន់ពូជសាសន៍)។
ប៉ុន្តែ សម្រាប់លោកចូបៃដិន ការដែលលោកត្រាំប្រកាន់ឥរិយាបថបែបនេះ ជា “ការអាម៉ាសជាតិ”។ នៅមុនការកែប្រែសម្តីរបស់លោកត្រាំ លោក ចូ បៃដិន បានប្រកាសដោយលះៗថា សារដែលផ្តល់ទៅឱ្យក្រុមជ្រុលនិយមស្បែកសមានតែមួយ គឺ ត្រូវក្រុមនេះ “បញ្ឈប់សកម្មភាពទាំងស្រុង”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ