សហរដ្ឋអាមេរិក៖លោកដូណាល់ ត្រាំសម្រេចតែងតាំងលោកស្រីអេម៉ី ខូនី បារ៉េតជាចៅក្រមនៅតុលាការកំពូល
ចុះផ្សាយនៅថ្ងៃ៖
ស្តាប់ - ០៧:២០
នៅសហរដ្ឋអាមេរិក ប្រធានាធិបតីលោកដូណាល់ ត្រាំបានប្រកាសក្នុងថ្ងៃសៅរ៍ ទី២៦ កញ្ញាពីការតែងតាំងលោកស្រីអេម៉ី ខូនី បារ៉េតជាចៅក្រមនៅតុលាការកំពូលជំនួសកន្លែងលោកស្រី Ruth Bader Ginsburg ដែលបានទទួលមរណៈភាពកាលពីសប្តាហ៍មុន។ លោកត្រាំសង្ឃឹមថា ព្រឹទ្ធសភាដែលគណបក្សសាធារណរដ្ឋកំពុងមានសំឡេងភាគច្រើននឹងអនុម័តលើការតែងតាំងលោកស្រីអេម៉ី ខូនី បារ៉េតនាពេលឆាប់ៗខាងមុខ។ តែគណបក្សប្រជាធិបតេយ្យបានបន្តចេញមុខប្រឆាំងដោយចង់ឲ្យមានការតែងតាំងរូបចៅក្រមថ្មីនៅតុលាការកំពូលនៅក្រោយការបោះឆ្នោតប្រធានាធិបតីថ្ងៃទី៣ វិច្ឆិកា។ លោកចូ បៃដិនដែលជាបេក្ខជនប្រធានាធិបតីនៃគណបក្សប្រជាធិបតេយ្យក៏ដូចជាអតីតប្រធានាធិបតីលោកបារ៉ាក់ អូបាម៉ាបានអំពាវនាវឲ្យព្រឹទ្ធសភាកុំឲ្យសម្រេចចិត្តនៅមុនថ្ងៃទី៣ វិច្ឆិកា។
នេះជាលើកទី៣ ដែលលោកដូណាល់ ត្រាំបានតែងតាំងចៅក្រមសម្រាប់តុលាការកំពូល។ មានអាយុ ៤៨ឆ្នាំ លោកស្រីអេម៉ី ខូនី បារ៉េតធ្លាប់ធ្វើជាសាស្រ្តាចារ្យច្បាប់នៅសាកលវិទ្យាល័យកាតូលិកក្នុងរដ្ឋ Indiana និងធ្លាប់ធ្វើជាចៅក្រមនៅសាលាឧទ្ធរណ៍ក្នុងរដ្ឋ Indiana Illinois និងក្នុងរដ្ឋ Winconsin។ លោកស្រីអេម៉ី ខូនី បារ៉េតមានស្វាមីជាអ្នកច្បាប់ដូចគ្នា និងមានកូនចំនួន ៧នាក់ ក្នុងនោះមាន ២នាក់ជាកូនចិញ្ចឹមជាជនជាតិហៃទី។ តែអ្វីដែលបានធ្វើឲ្យគ្រប់គ្នាចាប់អារម្មណ៍ខ្លាំងជាងគេ គឺបុគ្គលិកលក្ខណៈផ្ទាល់ខ្លួនរបស់លោកស្រីជាអ្នកអភិរក្សនិយម និងជាអ្នកកាន់សាសនាកាតូលិក។ លោកស្រីបារ៉េតជាសមាជិកនៃសហគមន៍ឯករាជ្យមួយនៃវិហារកាតូលិក People of Praise។
គឺជំនឿស៊ុបលើសាសនាកាតូលិករបស់លោកស្រីបារ៉េតដែលជាប្រភពនៃការប្រឈមមុខដាក់គ្នារវាងលោកស្រី និងសមាជិកព្រឹទ្ធសភានៃគណបក្សប្រជាធិបតេយ្យលោកស្រី Dianne Feinstein ក្នុងពេលបញ្ជាក់ការតែងតាំងលោកស្រីជាចៅក្រមនៅសាលាឧទ្ធរណ៍។តាំងពីពេលនោះ លោកស្រីបារ៉េតបានក្លាយជានិមិត្តរូបតំណាងឲ្យអ្នកកាន់សាសនាស្តាំនិយម។ តែលោកស្រីបារ៉េតធ្លាប់បានបញ្ជាក់នាពេលថ្មីៗនៅចំពោះមុខក្រុមសមាជិកព្រឹទ្ធសភាថា លោកស្រីនៅតែប្រកាន់ជំហរផ្ទាល់ខ្លួនដោយបន្តជឿស៊ុបលើសាសនា តែជំហរផ្ទាល់ខ្លួនមួយនេះនឹងមិនប៉ះពាល់ដល់តួនាទីជាចៅក្រមនៅតុលាការកំពូលរបស់លោកស្រីទេ។ ក្រៅពីមានបុគ្គលិកលក្ខណៈជាអ្នកអភិរក្សនិយម និងជាអ្នកមានជំនឿស៊ុបលើសាសនាកាតូលិក លោកស្រីអេម៉ី ខូនី បារ៉េតជាសកម្មជនម្នាក់ប្រឆាំងនឹងការរំលូតកូន។
បន្ទាប់មក លោកស្រីអេម៉ី ខូនី បារ៉េតធ្លាប់បានចេញមុខប្រឆាំងនឹងតុលាការកំពូលដែលបានអនុម័តលើច្បាប់កំណែទម្រង់សុខភាពរបស់លោកអូបាម៉ា និងដែលលោកត្រាំចង់លុបចោលវិញ។ បន្ទាប់មកទៀតក្នុងរយៈពេល ៣ឆ្នាំក្នុងនាមជាចៅក្រមនៅសាលាឧទ្ធរណ៍ លោកស្រីអេម៉ី ខូនី បារ៉េតបានចេញមុខការពារជំហររបស់លោកត្រាំពាក់ព័ន្ធនឹងសំណុំរឿងអន្តោប្រវេសន៍ និងអាវុធ។ គេអាចនិយាយបានថា គឺបុគ្គលិកលក្ខណៈជាអ្នកអភិរក្សនិយម និងជំហររបស់លោកស្រីអេម៉ី ខូនី បារ៉េតនេះហើយដែលលោកត្រាំបានតែងតាំងជាចៅក្រមនៅតុលាការកំពូលពេលនេះ។
ការតែងតាំងលោកស្រីអេមី ខូនី បារ៉េតជាជម្រើសនយោបាយរបស់លោកត្រាំ
ការតែងតាំងចៅក្រមនៅតុលាការកំពូលរបស់លោកត្រាំនៅ ២លើកដំបូងហាក់គ្មានរឿងអាស្រូវអ្វីទេ។ តែការតែងតាំងលើកទី៣ ពេលនេះបែរជាមានភាពចម្រូងចម្រាសខ្លាំងទៅវិញ។ គេអាចពន្យល់ចំណុចនេះបានតាមរយៈការពន្យល់ពីអំណាចរបស់តុលាការកំពូល។ នៅសហរដ្ឋអាមេរិក តុលាការកំពូលដែលមានទីស្នាក់ការក្នុងទីក្រុងវ៉ាស៊ីតោនជាស្ថាប័នសំខាន់ខ្លាំងណាស់នៅក្នុងជីវិតនយោបាយរបស់ប្រទេស។ អំណាចរបស់តុលាការកំពូលមានចែងច្បាស់នៅក្នុងច្បាប់រដ្ឋធម្មនុញ្ញ។ ចៅក្រមទាំង ៩នាក់នៅតុលាការកំពូលដែលបានតែងតាំងដោយប្រធានាធិបតីត្រូវកាន់តំណែងមួយនេះមួយជីវិតរហូតដល់ដង្ហើមចុងក្រោយ។ ជាស្ថាប័នសំខាន់ខ្លាំងនៅក្នុងជីវិតនយោបាយរបស់ប្រទេស ព្រោះតុលាការកំពូលជាអ្នកអារកាត់ ឬជាអ្នកសម្រេចចុងក្រោយទៅលើសំណុំរឿងសំខាន់ៗ ដូចជាច្បាប់រំលូតកូន ច្បាប់អាពាហ៍ពិពាហ៍រវាងអ្នកមានភេទដូចគ្នា ច្បាប់អន្តោប្រវេសន៍ ឬមួយសំណុំរឿងបម្រែបម្រួលអាកាសធាតុជាដើម។
តែអ្វីដែលលោកត្រាំប្រញិបប្រញាប់ខ្លាំងក្នុងការតែងតាំងចៅក្រមនៅតុលាការកំពូលឲ្យបានមុនថ្ងៃបោះឆ្នោតប្រធានាធិបតីថ្ងៃទី៣ វិច្ឆិកា គឺមកពីលោកត្រាំបារម្ភពីការចាញ់ឆ្នោត ឬមួយក៏បារម្ភពីការប្តឹងតវ៉ារបស់គណបក្សប្រជាធិបតេយ្យ បើពួកអ្នកប្រជាធិបតេយ្យចាញ់ឆ្នោតក្រោមហេតុផលណាមួយ។ លទ្ធផលស្ទង់មតិបានបង្ហាញថា លោកដូណាល់ ត្រាំចាញ់បេក្ខជនគណបក្សប្រជាធិបតេយ្យលោកចូ បៃដិននៅក្នុងការបោះឆ្នោតខាងមុខ។ ដូច្នេះការដែលលោកត្រាំបានតែងតាំងលោកស្រីអេម៉ី ខូនី បារ៉េតជាចៅក្រមនៅតុលាការកំពូលជាជម្រើសមួយដើម្បីមហិច្ឆតានយោបាយផ្ទាល់ខ្លួន។ កម្មវត្ថុរបស់លោកត្រាំ គឺទាញយកសន្លឹកឆ្នោតពីក្រុមអ្នកអភិរក្សនិយម និងក្រុមអ្នកកាន់សាសនាកាតូលិក។ ចូរកុំភ្លេចថា ក្រុមសកម្មជនរបស់លោកត្រាំដែលធ្លាប់បានបោះឆ្នោតឲ្យលោកត្រាំក្នុងឆ្នាំ ២០១៦ បានសម្តែងការពេញចិត្តយ៉ាងខ្លាំងចំពោះការតែងតាំងលោកស្រីអេម៉ី ខូនី បារ៉េតជាចៅក្រមនៅតុលាការកំពូល។
ជាមួយនឹងការតែងតាំងលោកស្រីអេម៉ី ខូនី បារ៉េតពេលនេះ ចៅក្រមទាំង ៩នាក់នៅតុលាការកំពូលនឹងមាន ៦នាក់ជាអ្នកអភិរក្សនិយម និង ៣នាក់ជាអ្នកចម្រើននិយម។ មានអ្នកអភិរក្សនិយមកាន់តែច្រើន លោកត្រាំកាន់តែសប្បាយចិត្ត បើលោកអាចជាប់ឆ្នោតអាណត្តិថ្មី។
គណបក្សប្រជាធិបតេយ្យបន្តអំពាវនាវឲ្យព្រឹទ្ធសភាលើកពេលតែងតាំងលោកស្រីអេមី ខូនី បារ៉េត
បំណងប្រាថ្នា និងការចង់បានរបស់លោកដូណាល់ ត្រាំ គឺចង់ឲ្យព្រឹទ្ធសភាអនុម័តនៅមុនពេលបោះឆ្នោតប្រធានាធិបតីថ្ងៃទី៣ វិច្ឆិកា។ ជាគោលការណ៍ នីតិវិធីនៅព្រឹទ្ធសភាត្រូវប្រើពេលជាមធ្យមចំនួន ៧០ថ្ងៃ។ តែដោយគណបក្សសាធារណរដ្ឋរបស់លោកត្រាំមានសំឡេងភាគច្រើននៅព្រឹទ្ធសភាស្រាប់ ពោលមាន ៥៣អសនៈក្នុងចំនួន ១០០អសនៈ ក្រុមអ្នកសាធារណរដ្ឋចង់ធ្វើការងារនេះឲ្យបានលឿនដែលអាចធ្វើទៅបាន។ តាមគម្រោង ព្រឹទ្ធសភានឹងចាប់ផ្តើមនីតិវិធីសួរ ដេញដោលលោកស្រីអេម៉ី ខូនី បារ៉េតនៅថ្ងៃទី១២ តុលាខាងមុខ មុននឹងធ្វើការបោះឆ្នោតតែងតាំងជាផ្លូវការនៅមុនថ្ងៃទី៣ វិច្ឆិកា។
ចំណែកបេក្ខជនប្រធានាធិបតីមកពីគណបក្សប្រជាធិបតេយ្យលោកចូ បៃដិនបានត្រឹមអំពាវនាវឲ្យព្រឹទ្ធសភាសម្រេចលើរឿងតែងតាំងលោកស្រីអេម៉ី ខូនី បារ៉េតនៅក្រោយការបោះឆ្នោតថ្ងៃទី៣ វិច្ឆិកា។ « ព្រឹទ្ធសភាមិនត្រូវសម្រេចអ្វីទាំងអស់ ល្គឹកណាពលរដ្ឋអាមេរិកនៅមិនទាន់បានជ្រើសរើសអនាគតប្រធានាធិបតី និងសភារបស់ពួកគេ »នេះជាការបញ្ជាក់របស់អតីតប្រធានាធិបតីលោកបារ៉ាក់ អូបាម៉ានៅក្នុងសេចក្តីប្រកាសព័ត៌មានមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ