លោកអូបាម៉ា ប្រកាសគាំទ្របេក្ខភាពលោកចូ បៃដិន ជាប្រធានាធិបតី
ប៉ុន្មានថ្ងៃ បន្ទាប់ពីលោក ប៊ែរនី ស៊ែនឌើ បានប្រកាសដកខ្លួន ហើយគាំទ្រលោក ចូ បៃដិន ជាបេក្ខជនប្រធានាធិបតីរបស់គណបក្សប្រជាធិបតេយ្យ សម្រាប់ការបោះឆ្នោតនៅខែវិច្ឆិកា កាលពីថ្ងៃអង្គារទី១៤មេសា លោកបារ៉ាក់ អូបាម៉ា អតីតប្រធានាធិបតីអាមេរិកដ៏មានប្រជាប្រិយភាព ក៏បានប្រកាសគាំទ្រ បេក្ខភាពរបស់លោកចូ បៃដិន ដែរ។ លោក អូបាម៉ា លើកឡើងថា ស្ថិតក្នុងកាលៈទេសៈវិបត្តិដ៏ធ្ងន់ ដែលសហរដ្ឋអាេមរិក កំពុងឆ្លងកាត់នាពេលនេះ លោកចូ បៃដិន ជាមនុស្សសក្តិសមបំផុត ក្នុងការដឹកនាំប្រទេស ឲ្យជាសះស្បើយរាំងមាំឡើងវិញ។
ចុះផ្សាយនៅថ្ងៃ៖
ស្តាប់ - ០២:០០
នៅក្នុងសារវីដេអូ រយៈពេល១២នាទី លោកអូបាម៉ា បានថ្លែងទៅកាន់ប្រជាជនអាេមរិក ស្តីពីក្តីសោកសង្រេង ចំពោះការស្លាប់បាត់បង់ជីវិតមនុស្សជាច្រើននាក់ ដោយសារមេរោគកូវីដ១៩។ បន្ទាប់មក លោកអូបាម៉ាបានប្រកាសថាលោក គាំទ្របេក្ខភាពរបស់ចូ បៃដិន ក្នុងការបោះឆ្នោតប្រធានាធិបតីសហរដ្ឋអាមេរិក នៅខែវិច្ឆិកាខាងមុខ។
លោកអូបាម៉ាលើកឡើងថា សហរដ្ឋអាេមរិកកំពុងឆ្លងកាត់កាលៈទេសៈវិបត្តិដ៏ងងឹត។ ប្រឈមនឹងវិបត្តិដ៏ធ្ងន់នេះ គឺមានតែលោកចូ បៃដិន តែម្នាក់គត់ ដែលសក្តិសមធ្វើជាប្រធានាធិបតីថ្មី។ លោកអូបាម៉ា បន្ថែមថា លោកចូ បៃដិន ជាមនុស្សដែលមានចិត្តធ្ងន់ មានការអំណត់ព្យាយាម មានបទពិសោធន៍ការងារច្បាស់លាស់ ដែលគុណសម្បត្តិទាំងនេះ នឹងជួយឲ្យលោក ចូ បៃដិន អាចដឹកនាំប្រទេស ឲ្យជាសះស្បើយ ពីវិបត្តិទាំងឡាយទាំងពួង ឈានទៅរកភាពរឹងមាំឡើងវិញ។
លោកអូបាម៉ាបន្តថា ស្ថិតក្នុងកាលៈទេសៈនេះ ប្រជាជនអាមេរិកទាំងអស់គ្នា ត្រូវតែក្រោកឡើង រួមគ្នាយកឈ្នះក្រុមបក្សនយោបាយ ដែលប្រឡាក់ប្រឡូសជាមួយអំពើពុករលួយ ដែលគិតតែប្រយោជន៍ផ្ទាល់ខ្លួន ដើម្បីតែអំណាច ដែលបំភ័ន្តព័ត៌មាននិងមតិមហាជន ដែលគ្មានការយល់ដឹង ដែលធ្វេសប្រហែស និងដែលគ្មានចិត្តមេត្តាធម៌សោះតែម្តង។
គួរកត់សំគាល់ថា ពាក្យសំដីរិះគន់ទាំងអម្បាលម៉ាននេះ បើទោះជាលោកអូបាម៉ា មិននិយាយឲ្យចំឈ្មោះ តែគេដឹងយ៉ាងច្បាស់ ថាលោកបានសំដៅ ទៅលើការដឹកនាំរបស់លោកដូណាល់ ត្រាំ។ គួរបញ្ជាក់ដែរថា លោកចូ បៃដិន គឺជាអតីតអនុប្រធានាធិបតីក្នុងអាណត្តិរបស់លោកអូបាម៉ា។ តែយ៉ាងណា មតិខ្លះក្នុងជួរគណបក្សប្រជាធិបតេយ្យ មិនសូវជាពេញចិត្តលោកចូ បៃដិនទេ ដោយលើកឡើងថា លោកចូ បៃដិន មិនសូវមានសមត្ថភាព។
គេសង្ឃឹមថា ការចេញមុខប្រកាសគាំទ្ររបស់លោកអូបាម៉ា ចំពោះបេក្ខភាពលោកចូ បៃដិន អាចនឹងជួយជំរុញអ្នកគាំទ្របក្សប្រជាធិបតេយ្យទាំងអស់ ឲ្យនៅពីក្រោយបេក្ខភាព របស់លោកចូ បៃដិន ដើម្បីប្រជែងយកឈ្នះលោកដូណាល់ ត្រាំ នៅខែវិច្ឆិកា។ លោកអូបាម៉ាសង្កត់ធ្ងន់ថា អនាគតរបស់សហរដ្ឋអាមេរិក រំពឹងទាំងស្រុងទៅលើការបោះឆ្នោតលើកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ