ក្រុមហ៊ុនបច្ចេកវិទ្យាអាមេរិករកឃើញការវាយប្រហាររបស់ចោរព័ត៌មានវិទ្យាមានប្រភពពីចិន និងរុស្ស៊ី
នៅ ជាង២ខែមុនការបោះឆ្នោតប្រធានាធិបតីអាមេរិក ក្រុមហ៊ុនបច្ចេកវិទ្យាអាមេរិកធំៗដូចជា Microsoft Google Facebook Twitter បានបង្កើនការតាមដាន និងពង្រឹងយុទ្ធសាស្រ្ត ដើម្បីទប់ស្កាត់ការវាយប្រហាររបស់ចោរអ៊ីនធ័រនែត ឬការលូកដៃពីបរទេស ទៅក្នុងការបោះឆ្នោតអាមេរិក ២០២០។ នៅក្នុងរបាយការណ៍ចេញផ្សាយកាលពីថ្ងៃព្រហស្បតិ៍ ក្រុមហ៊ុនMicrosoft បានលើកឡើងពីការវាយប្រហាររបស់ចោរអ៊ីនធ័រនែត ទៅលើក្រុមឃោសនា របស់គណបក្ស ឬ ស្ថាប័នដែលធ្វើការទាក់ទងការបោះឆ្នោត នៅអាមេរិក។ តាមក្រុមហ៊ុនបច្ចេកវិទ្យាអាមេរិក ការវាយប្រហារតាមអ៊ីនធ័រនែតភាគច្រើនមានប្រភពចេញ ពីរុស្ស៊ី ចិន និងអ៊ីរ៉ង់។
ចុះផ្សាយនៅថ្ងៃ៖
ស្តាប់ - ០២:៣៨
នៅប៉ុន្មានខែមកនេះ ក្រុមហ៊ុនបច្ចេកវិទ្យាអាមេរិក Facebook Google Microsoft Twitterបានប្រកាស ជាបន្តបន្ទាប់ ពីការទប់ស្កាត់បានទាន់ពេលវេលា ការវាយប្រហាររបស់ចោរព័ត៌មានវិទ្យា ឬការលូកដៃពីបរទេស ជាពិសេស រុស្ស៊ី ដែលបានផ្សព្វផ្សាយព័ត៌មានមិនពិត សំដៅ បំពុលមតិបោះឆ្នោតនៅអាមេរិក។
ការបោះឆ្នោតប្រធានាធិបតីអាមេរិក កាន់តែកៀកខិតចូលមកដល់ ការវាយប្រហាររបស់ចោរអ៊ីនធ័រនែត ក៏មានកាន់តែច្រើន ដែលមួយចំនួនធំ សំដៅ វាយប្រហារ ក្រុមឃោសនាបោះឆ្នោត របស់គណបក្សនយោបាយ នៅអាមេរិក។ ជាក់ស្តែង របាយការណ៍ របស់ក្រុមហ៊ុនMicrosoft កាលពីថ្ងៃ ព្រហស្បតិ៍ បានបង្ហាញថា ក្រុមចោរអ៊ីនធ័រនែតរុស្ស៊ី មួយក្រុម ដែលគេស្គាល់ឈ្មោះ ថា Strontiumបានវាយប្រហារទៅលើស្ថាប័នជាង ២០០ដែលធ្វើការពាក់ព័ន្ធនឹងការបោះឆ្នោតប្រធានាធិបតីអាមេរិក ជាពិសេស ក្រុមឃោសនាបោះឆ្នោត របស់លោកចូ បៃដិន ដែលជាគូប្រជែង របស់ប្រធានាធិបតីលោកដូណាល់ ត្រាំ។ Microsoft បានរកឃើញផងដែរ ការវាយប្រហារព័ត៌មានវិទ្យា ដែលមានប្រភពចេញមកពីប្រទេសចិន និងអ៊ីរ៉ង់ ប៉ុន្តែ ក្រុមចោរអ៊ីនធ័រនែតចិន និងអ៊ីរ៉ង់សំដៅវាយប្រហារផលប្រយោជន៍ របស់បេក្ខជនប្រធានាធិបតីអាមេរិក ពោលគឺទាំងលោកចូ បៃដិន និងលោកដូណាល់ ត្រាំ។
សម្រាប់ក្រសួងមហាផ្ទៃអាមេរិក របាយការណ៍របស់ក្រុមហ៊ុនMicrosoft បានបញ្ជាក់ថា ចិន អ៊ីរ៉ង់ រុស្ស៊ី បានព្យាយាម រុកគួន បំផ្លាញ លទ្ធិប្រជាធិបតេយ្យ និងសាបព្រួសឥទ្ធិពលលើការបោះឆ្នោតអាមេរិក។
ទាក់ទងនឹងការលូកដៃរបស់បរទេស ទៅក្នុងការបោះឆ្នោត ក្រសួងសេដ្ឋកិច្ចអាមេរិក កាលពីថ្ងៃ ម្សិលមិញ បានសម្រេចដាក់ទណ្ឌកម្មសេដ្ឋកិច្ច លើសមាជិកសភាអ៊ុយក្រែន ម្នាក់ ដែលអាមេរិកចោទប្រកាន់ថា ជាភ្នាក់ងារ ស៊ើបការណ៍សម្ងាត់របស់រុស្ស៊ី ដែលមានបេសកកម្មវាយប្រហារផលប្រយោជន៍របស់បេក្ខជនអាមេរិក លោកចូ បៃដិន។ ជនជាតិរុស្ស៊ីបីនាក់ ដែលធ្វើការឲ្យទីភ្នាក់ងារស្រាវជ្រាវអ៊ីនធ័រនែត IRA ក៏ត្រូវជាប់ទណ្ឌកម្មរបស់អាមេរិក ដែរ ក្នុងបទចោទប្រកាន់ ធ្វើការឲ្យស្ថាប័ន ដែលស្និទ្ធនឹងវិមានក្រេមឡាំង និងដែលកាលពី៤ឆ្នាំមុន បានលូកដៃចូលក្នុងកិច្ចការបោះឆ្នោតប្រធានាធិបតីអាមេរិក។
ក្រៅតែពីពង្រឹងយុទ្ធសាស្រ្ត ដើម្បី ទប់ស្កាត់ ការវាយប្រហាររបស់ចោរអ៊ីនធ័រនែតពីបរទេស ក្រុមហ៊ុនបច្ចេកវិទ្យាអាមេរិក ត្រូវរឹតបន្តឹង លុបចោលផងដែរ ការផ្សព្វផ្សាយ ព័ត៌មានមិនពិត ព័ត៌មានកុហកបោកប្រាស់ទាក់ទងនឹងការបោះឆ្នោត ដែលធ្វើឡើងដោយអ្នកក្នុងស្រុក និងមានកាន់តែច្រើន នៅលើបណ្តាញសង្គម។ ហ្វេសប៊ុកដែលបានប្រកាសបិទមិនទទួល ការផ្សាយពាណិជ្ជកម្ម របស់គណបក្សនយោបាយ នៅ១សប្តាហ៍មុនការបោះឆ្នោតទើបបានអះអាងថា ក្រុមហ៊ុនបានបង្កើតមជ្ឈមណ្ឌលព័ត៌មាន ដើម្បីជួយអ្នកប្រើប្រាស់ឲ្យអាចទទួលបានព័ត៌មានពិតប្រាកដ ទាក់ទងនឹងការបោះឆ្នោតប្រធានាធិបតី នៅថ្ងៃទី៣វិច្ឆិកាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ