ភ្លើងឆេះព្រៃដ៏ធំនៅរដ្ឋកាលីហ្វ័រញ៉ា ពលរដ្ឋអាមេរិកជាង១សែននាក់រត់ជម្លៀសខ្លួន
នៅរដ្ឋកាលីហ្វ័រញ៉ា សហរដ្ឋអាមេរិក ភ្លើងឆេះព្រៃដ៏ធំ បានបង្ខំឱ្យមនុស្សជាង ១២០ ០០០ រត់ជម្លៀសខ្លួន។ តុល្យការបឋម ត្រឹមថ្ងៃសុក្រ គឺមានស្លាប់ជីវិតមនុស្សយ៉ាងហោច៥នាក់។ ផ្ទៃដី រាប់ម៉ឺនហិកតា កំពុងតែរងឥទ្ធិពលរបស់ផ្សែងភ្លើង ហើយអភិបាលរដ្ឋកាលីហ្វ័រញ៉ា ប្រកាសសុំជំនួយពីបណ្តារដ្ឋជិតខាង ដោយសារភាពថា ស្ថានការណ៍ទប់ទល់លែងបានហើយ។
ចុះផ្សាយនៅថ្ងៃ៖
ស្តាប់ - ០១:២៣
ពេលនេះ ប្រជាជនក្នុងរដ្ឋកាលីហ្វ័រញ៉ា រាប់សិបម៉ឺននាក់ កំពុងរត់ភៀសខ្លួន។ អាជ្ញាធរមូលដ្ឋាន បានអំពាវនាវឱ្យសណ្ឋាគារនិងផ្ទះសំណាក់ជិតមាត់ឆ្នេរ ទុកកន្លែងនិងគ្រែសម្រាប់ជួយដាក់ប្រជាជន។
អ្នកតំណាងទីភ្នាក់ងារពន្លត់អគ្គិភ័យ លើកឡើងថា ក្រុមសង្គ្រោះនិងក្រុមពន្លត់ភ្លើង ជាង១២ ០០០នាក់ បានប្រឹងធ្វើការសម្បើមណាស់ នាពេល២៤ម៉ោងចុងក្រោយនេះ តែអាកាសធាតុមិនអំណោយផលសោះ។ ពោលគឺរឹតតែក្តៅខ្លាំង និងនាំឱ្យកាន់តែឆេះព្រៃរឹងរឹតតែច្រើនទៀត រហូតដល់ជាង៥៦០កន្លែង។ តាមការព្យាករណ៍របស់ភ្នាក់ងារឧតុនិយមអាមេរិក គឺនៅថ្ងៃអាទិត្យ កម្តៅនឹងកាន់តែកើតឡើង ទៅដល់ជាង៥៤អង្សា ដែលអាចនឹងបង្កហានិយភ័យ ឆេះព្រៃរឹតតែធ្ងន់ថែមទៀត។
លោកប្រធានាធិបតីអាមេរិក ដូណាល់ ត្រាំ បានបន្ទោសអភិបាលរដ្ឋនេះ ថាមិនបានសម្អាតព្រៃឱ្យស្អាតល្អ ទើបធ្វើឱ្យវាឆេះរាលដាលខ្លាំងយ៉ាងដូច្នេះ។ ក៏ប៉ុន្តែ អភិបាលរដ្ឋ លោក Gavin Newsom នៅថ្ងៃសុក្របានលើកឡើងពីបញ្ហាប្រែប្រួលអាកាសធាតុ ដែលធ្វើឱ្យឆេះព្រៃ។ លោកថា ការកើនឡើងកម្តៅអាកាសធាតុ វាមានពិតមែន បើអ្នកមិនជឿទេ សូមជញ្ជើញមកកាលីហ្វ័រញ៉ា មកមើលផ្ទាល់ភ្នែកចុះ។
គួររម្លឹកជូនថា កាលពីខែវិច្ឆិកា ឆ្នាំ២០១៨ ភ្លើងឆេះព្រៃនៅភាគជើងកាលីហ្វ័រញ៉ា សម្លាប់មនុស្សយ៉ាងហោច ៨៦នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ