លោកត្រាំ គំរាមបញ្ជូនកងកម្លាំងសហព័ន្ធ ទៅកាន់ទីក្រុងដែលគ្រប់គ្រងដោយក្រុមប្រជាធិបតតេយ្យ
លោកប្រធានាធិបតីដូណាល់ ត្រាំ បានថ្លែងទៅកាន់អ្នកកាសែត កាលពីរសៀលថ្ងៃចន្ទ ទី២០កក្កដាថា លោកអាចនឹងសម្រេចបញ្ជូនកងកម្លាំងសហព័ន្ធ ទៅកាន់ទីក្រុងមួយចំនួន ដែលគ្រប់គ្រង ដោយគណបក្សប្រជាធិបតេយ្យ ដើម្បីបង្រ្កាបបាតុកម្មហិង្សា។ សូមរំលឹកថា កាលពីសប្តាហ៍កន្លងទៅ លោកដូណាល់ ត្រាំ បានសម្រេចដាក់ពង្រា កងកម្លាំងសហព័ន្ធ នៅទីក្រុង ផតលែន។ ក៏ប៉ុន្តែអភិបាលទីក្រុង និងអ្នកនយោបាយបក្សប្រជាធិបតេយ្យ បានលើកឡើងថា ការធ្វើបែបនេះ គឺមិនខុសយកសាំងទៅចាក់លើភ្លើងនោះទេ។
ចុះផ្សាយនៅថ្ងៃ៖
លោកដូណាល់ ត្រាំ បានថ្លែងទៅកាន់អ្នកកាសែតថា « យើងមិនអាចបោះបង់ចោល ញូយ៉ក ឈីកាហ្គោ ហ្វីឡាឌែលហ្វ៊ី ដេទ្រ័រ និង បាល់ទីម៉ បានទេ »។ លោកបន្តថា ទីក្រុងទាំងនេះ កំពុងតែរងគ្រោះដោយសកម្មភាពបាតុកម្មហិង្សា ជាពិសេសឈីកាហ្គោ ដែលមានសកម្មភាពបាញ់បោះ ផ្ទុះអាវុធ ធ្ងន់ធ្ងរខ្លាំងជាងនៅអាហ្វហ្កានីស្ថានផង។
លោកដូណាល់ត្រាំបន្ថែមថា ទីក្រុងទាំងនោះ សុទ្ធតែគ្រប់គ្រងដោយមនុស្សរបស់គណបក្សប្រជាធិបតេយ្យ ដែលសុទ្ធតែជាពួកឆ្វេងនិយមជ្រុល។ លោកត្រាំ សង្កត់ធ្ងន់ថា បើសិនជាលោកចូបៃដិន ឈ្នះឆ្នោតមែននោះ សហរដ្ឋអាមេរិក នឹងធ្លាក់នរកមិនខានទេ។
សូមរំលឹកថា កាលពីសប្តាហ៍កន្លងទៅ លោកដូណាល់ ត្រាំ បានសម្រេចបញ្ជូនកងកម្លាំងសហព័ន្ធ យកទៅពង្រាយនៅទីក្រុង ផតលែន រដ្ឋអូរេហ្គុន ដោយលោកបានអួតថា ត្រឹមតែ៣ថ្ងៃប៉ុណ្ណោះ កម្លាំងសហព័ន្ធ បានចាប់ក្រុមអាណាធិបតេយ្យ ញាត់គុកបានច្រើនណាស់។ តែយ៉ាងណា អ្នកនយោបាយក្នុងរដ្ឋនេះ បានអះអាងថា លោកដូណាល់ ត្រាំ បានយកសាំងទៅចាក់លើភ្លើង បន្ថែមបញ្ហាឲ្យកាន់តែធំឡើង។
គួររំលឹកថា មរណៈភាពរបស់បុរសស្បែកខ្មៅ George Floyd នៅទីក្រុងមីណេអាប៉ូលី កាលពីថ្ងៃទី២៥មេសាកន្លងទៅ បានញ៉ាំងឲ្យមានបាតុកម្ម សឹងតែទូទាំងប្រទេស ដើម្បីបរិហារអំពីអំពើហិង្សា របស់នគរបាល ធ្វើទៅលើជនស្បែកខ្មៅ។ បាតុកម្មដែលបានរីករាលដាល បង្កជាអំពើហិង្សា អាណាធិបតេយ្យ នៅតាមទីក្រុងមួយចំនួន។ ជាមួយនឹងការឃោសនាបោះឆ្នោត គេសង្កេតឃើញថា លោកដូណាល់ ត្រាំ បានច្បិចយកតែចំណុច សកម្មភាពហិង្សារបស់ក្រុមបាតុករជ្រុលនិយមមកនិយាយ ដោយ មិនបានឆ្កិះយកប្រភពនៃបញ្ហា មករកដំណោះស្រាយឡើយ។
ក្រុមអ្នកនយោបាយ បក្សប្រជាធិបតេយ្យ បានលើកឡើងថា លោកដូណាល់ ត្រាំ កំពុងតែយកបញ្ហាបាតុកម្មហិង្សាធ្វើជាចំណាប់ខ្មាំង ដោយមិនព្រមគិតគូរពិចារណា ដោះស្រាយវិបត្តិ ដែលជាប្រភពនៃបាតុកម្មទាំងនេះ នោះគឺបញ្ហារើសអើងប្រកាន់ពូជសាសន៍ និងអំពើហិង្សារបស់សមត្ថកិច្ចនគរបាល។ លោក Gretchen Whitmer អភិបាលរដ្ឋមីឈីហ្គិន បានចាត់ទុកសម្តីរបស់លោកប្រធានាធិបតីដូណាល់ ត្រាំ ថាមានលក្ខណៈញុះញង់បំបែកបំបាក់ ឲ្យមនុស្សក្នុងសង្គមកាន់តែស្អប់ខ្ពើមគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ