Twitter សុំទោសចំពោះហេតុការណ៍ការវាយប្រហារព័ត៌មានវិទ្យា
បីថ្ងៃក្រោយការវាយប្រហារព័ត៌មានវិទ្យាលើគណនីរបស់អ្នកនយោបាយនិងមហាសេដ្ឋីអាមេរិកជាច្រើនរូបមក ទ្វីតទ័រ Twitter បានចេញមុខសុំទោស នៅថ្ងៃសៅរ៍ទី ១៨ កក្កដានេះ។ បើតាមទ្វីតទ័រ ចោរអ៊ីនធ័រនែត ចូលលួចនិងគ្រប់គ្រងទិន្នន័យរបស់អ្នកប្រើប្រាស់បាន ដោយហេតុតែមានការស៊ុំគ្រលំពីបុគ្គលិករបស់ក្រុមហ៊ុនទ្វីតទ័រមួយក្តាប់តូច។ ជាមួយនឹងការសុំទោស ទ្វីតទ័របានទទួលស្គាល់ថាឧប្បត្តិហេតុនេះប៉ះពាល់ខ្លាំងណាស់លើទំនុកចិត្តរបស់អ្នកប្រើប្រាស់ចំពោះបណ្តាញ។
ចុះផ្សាយនៅថ្ងៃ៖
ស្តាប់ - ០២:១០
ជាសរុបចោរអ៊ីនធ័រនែតប៉ុនប៉ងវាយប្រហារលើគណនីរបស់អ្នកប្រើប្រាស់ចំនួន ១៣០នាក់ តែអាចជ្រៀតចូលបានសម្រេចក្នុងគណនីចំនួនតែ៤៥ប៉ុណ្ណោះ ដោយប្រើមធ្យោបាយរបស់ក្រុមការងារជួសជុលផ្ទៃក្នុងរបស់ក្រុមហ៊ុន។ ៤៥គណនីរងការវាយប្រហារព័ត៌មានវិទ្យាជាចំនួនដ៏ទេប្រើប្រៀបទៅនឹងចំនួនអ្នកប្រើប្រាស់សរុបជិត ៣៣០លាននាក់ក្នុងមួយខែៗឬ១៦៦លាននាក់ក្នុងមួយថ្ងៃៗ ប៉ុន្តែម្ចាស់គណនីសុទ្ធសឹងជាឥស្សរជននយោបាយសំខាន់ៗ និងមហាសេដ្ឋីធំៗរបស់អាមេរិក (លោក ចូ បៃដិន អតីតប្រធានាធិបតីអូបាម៉ា ស្ថាបនិកអាម៉ាហ្សូន លោក ប៊ីលហ្កេត ...)។
យោងទៅលើវិធីវាយប្រហារ បំណងធំរបស់ចោរអ៊ីនធ័រនែត ទំនងជាដើម្បីបានលុយ។ វេបសាយជំនាញខាងផ្ទេរប្រាក់ដែលមិនអាចកំណត់ដានអ្នកទទួលប្រាក់បាន សម្គាល់ឃើញមានការផ្ទេរទឹកលុយចំនួន១០ម៉ឺនដុល្លារ។
ប៉ុន្តែមានគណនីចំនួន៨ ដែលចោរជ្រៀតចូលបានទៅទាញយកទិន្នន័យផ្ទាល់ខ្លួនផ្សេងៗរបស់ម្ចាស់គណនីបាន។ នេះបើតាមការបញ្ជាក់របស់ទ្វីតទ័រ ដែលអះអាងទៀត ដោយហេតុមានមធ្យោបាយចូលទៅគ្រប់គ្រងគណនីបាន ចោរអ៊ីនធ័រនែត អាចទម្លាយព័ត៌មានផ្ទៀងផ្ទាត់គណនីដែលជារនាំងសុវត្ថិភាព បន្ថែមពីលើការប្រើលេខកូដសម្ងាត់ទៅទៀត។ សកម្មភាពបែបនេះកំពុងក្លាយជាតស៊ូមតិយ៉ាងខ្លាំងជុំវិញសុវត្ថិភាពនៃបណ្តាញសង្គមមួយនេះ ព្រោះការបោះឆ្នោតប្រធានាធិបតីអាមេរិកនឹងចូលមកដល់នៅខែវិច្ឆិកា ហើយលោកដូណាល់ត្រាំ និយមប្រើបណ្តាញមួយនេះខ្លាំងនិងមានអ្នកតាមដានដល់ជាង៨៣លាននាក់កន្លះ។ ហ្វេប៊ីអាយកំពុងបើកអង្កេតដែរ។
ទ្វីតទ័រមិនបានលម្អិតអំពីក្រុមបុគ្គលិកដែលមានពាក់ព័ន្ធនឹងការវាយប្រហារនេះ និងមិនបញ្ជាក់អំពីអត្តសញ្ញាណរបស់ក្រុមចោរដែរ។ ប៉ុន្តែបើតាមញូវយ៉កថែមស៍ ចោរអ៊ីនធ័រនែតនោះប្រើឈ្មោះ"Kirk" ដែលទំនងជាក្រុមចោរក្មេងៗរស់នៅជាមួយម្តាយនៅឡើយ មិនមែនជាក្រុមចោរដឹកនាំដោយរដ្ឋណាមួយ ឬជាក្រុមចោរធំៗធ្លាប់មានឈ្មោះល្បីទេ។ តែយ៉ាងណាក៏ដោយ ក៏ទ្វីតទ័រទទួលស្គាល់ថា ការវាយប្រហារព័ត៌មានវិទ្យានេះជះឥទ្ធិពលអាក្រក់ ធ្វើឱ្យអ្នកប្រើប្រាស់ចោទសួរអំពីសុវត្ថិភាពនៃបណ្តាញសង្គមរបស់ខ្លួនដោយចៀសមិនរួចឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ