សៀវភៅសរសេរដោយ ក្មួយស្រីលោកដូណាល់ ត្រាំ លក់បានជិត១លានក្បាល ចេញលក់ថ្ងៃទីមួយ
សៀវភៅសរសេរដោយ អ្នកស្រី ម៉ារី ត្រាំ ដែលជាក្មួយស្រី របស់លោកដូណាល់ ត្រាំ ចេញលក់ថ្ងៃដំបូង ដោយមានអ្នកទិញអាន ដល់ទៅជិត១លានក្បាល។ សៀវភៅដ៏ចម្រូងចម្រាសនេះ បានសរសេរអំពីប្រវត្តិក្រុមគ្រួសាររបស់លោកដូណាល់ ត្រាំ ព្រមទាំងអត្តចរិករបស់លោកដូណាល់ ត្រាំដែលអ្នកនិពន្ធបានអះអាងថា ជាមនុស្សកុហក អត្មានិយម ដ៏គួរឲ្យគ្រោះថ្នាក់បំផុត។ នេះក៏ជាលើកទីមួយដែរ ដែលសៀវភៅសរសេរពីលោកដូណាល់ ត្រាំ ត្រូវបានសរសេរដោយមនុស្សក្នុងគ្រួសារលោកផ្ទាល់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
សៀវភៅចំណងជើង « Too Much and Never Enough » ដែលយើងអាចប្រែបានថា « ជ្រុលសម្បើម និង មិនដែលស្កប់ » គឺជាស្នាដៃនិពន្ធរបស់លោកស្រី Mary Trump ក្មួយស្រីបង្កើត របស់លោកដូណាល់ ត្រាំ។ ក្នុងខ្លឹមសារនៃសៀវភៅនេះ លោកស្រី ម៉ារី ត្រាំ បានលើកឡើងថា លោកដូណាល់ ត្រាំ បានចូលរួមចំណែក ធ្វើឲ្យឪពុករបស់លោកស្រី ដែលត្រូវជាបងប្រុសរបស់លោកដូណាល់ ត្រាំ ក្លាយជាមនុស្សមានវិបត្តិ ទន់ខ្សោយ រហូតដល់ស្លាប់ទាំងវ័យ៤២ឆ្នាំ នៅឆ្នាំ១៩៨១។
លោកស្រី ម៉ារី ត្រាំ បានសរសេររៀបរាប់ អំពីបុគ្គលិកលក្ខណៈរបស់សមាជិកគ្រួសារត្រកូលត្រាំ ព្រមទាំងបញ្ហារកាំរកូសនានា នៅក្នុងគ្រួសារ ដែលកើតចេញពីមហិច្ឆិតា លោភលន់ របស់លោកដូណាល់ ត្រាំ។ អ្នកនិពន្ធ ដែលជាក្មួយស្រីរបស់លោកដូណាល់ ត្រាំ និងដែលជាអ្នកគ្រូពេទ្យចិត្តសាស្រ្តោផងនោះ បានចាត់ទុកថា "លោកដូណាល់ ត្រាំ ជាកំពូលមនុស្ស កុហក ក្រឡិកក្រឡុច លោភលន់ អត្មានិយម ហើយឆ្កូតវង្វេងនឹងខ្លួនឯង"។
គួររំលឹកថា លោក Robert Trump ប្អូនប្រុសរបស់លោកដូណាល់ ត្រាំ ធ្លាប់បានដាក់ពាក្យប្តឹងទៅតុលាការ ដើម្បីហាមសៀវភៅនេះ មិនឲ្យបោះពុម្ពចេញលក់។ តែតុលាការមិនបានសម្រេច យល់ព្រមតាមការទាមទេ។ សេតវិមានប្រធានាធិបតីអាមេរិកវិញ បានច្រានចោល ខ្លឹមសារនៃសៀវភៅនេះ ដោយបានអះអាងថា វាពោរពេញទៅដោយការ ពាក្យកុហក និងចោទប្រកាន់គ្មានមូលដ្ឋាន។
យោងតាម ក្រុមហ៊ុនបោះពុម្ព Simon & Schuster សៀវភៅនេះ បានលក់អស់ប្រមាណ៩៥០០០០ ក្បាល ក្នុងថ្ងៃទីមួយ នៃការចេញលក់ ដោយរាប់បញ្ចូលទាំងការទិញដោយផ្ទាល់ ការវកុម្មង់ទុកជាមុន និងសៀវភៅអានតាមប្រព័ន្ធព័ត៌មានវិទ្យា។ ក្រុមហ៊ុនបោះពុម្ពនេះ បានបញ្ជាក់ថា គេនឹងបោះពុម្ពជាសៀវភៅ បន្ថែមឲ្យបាន១លាន១សែន៥ម៉ឺនក្បាល ដើម្បីបំពេញតម្រូវការរបស់អ្នកអាន។ នៅលើគេហទំព័រ Amazon នៅអូស្ត្រាលី និងកាណាដា សៀវភៅនេះ គឺជាសៀវភៅដែលលក់ដាច់ជាងគេបង្អស់។
គួរកត់សំគាល់ថា មានសៀវភៅជាច្រើនមកហើយ ដែលនិយាយអំពីបុគ្គលិកលក្ខណៈ គួរឲ្យគ្រោះថ្នាក់ របស់លោកដូណាល់ ត្រាំ។ តែនេះជាលើកទីមួយ ដែលសៀវភៅរបៀបនេះ ត្រូវបានសរសេរដោយ សមាជិកម្នាក់ក្នុងក្រុមគ្រួសារវង្សត្រកូលត្រាំ ដែលជាអ្នកបានរស់នៅ ស្គាល់ជិតដិតនឹងក្រុមគ្រួសារនេះ។ ពាក្យពេចន៍ ប្រើក្នុងសៀវភៅនេះ គឺពោរពេញទៅដោយខ្លឹមសារ សង្កត់ធ្ងន់ៗ បង្កប់ដោយការឈឺចាប់ ទាក់ទិននឹងអ្វីដែលអ្នកនិពន្ធបានឆ្លងកាត់ផ្ទាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ